ဇွန်-၂၆၊၂၀၂၆။ထားမြတ်၊ဇော်ရမ်း/People’s Spring
စစ်ကိုင်းတိုင်း၊ယင်းမာပင်ခရိုင် ၊အမှတ် (၆) တပ်ရင်း တပ်ရင်းမှူး ပုလဲမောင် ပစ်ခတ်ခံရပြီး ကျဆုံးခဲ့တဲ့ အပေါ် မိသားစုဝင်များ၊ ရဲဘော် ရဲဘက်များနဲ့ ထပ်တူ ဝမ်းနည်းကြောင်း အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော်(PDF) ထုတ်ပြန်ခဲ့ပြီး ကျူးလွန်သူ ရဲဘော်ကို ဖမ်းဆီးထားသလို မလိုလားအပ်တဲ့နောက်ဆက်တွဲတွေ မဖြစ်ဖို့ ဆောင်ရွက်နေတယ်လို့ အသိပေးပါတယ်။
ဇွန် ၂၆ရက်မှာ တပ်ရင်းမှူး ပုလဲမောင်ကို ရဲဘော်ငဖြိုးက ပစ္စတိုနဲ့ ပစ်ခတ်ခဲ့လို့ ကျဆုံးခဲ့ရတာဖြစ်ပြီး ကျူးလွန်သူ ရဲဘော်ငဖြိုးအား လက်နက်ဖြုတ်သိမ်းကာ ယင်းမာပင်ခရိုင် စစ်ဌာန အချုပ်ထောင်တွင် ဖမ်းဆီးထိန်းသိမ်းထားပြီး ဖြစ်တယ်လို့ ဖော်ပြပါတယ်။
“ယခုဖြစ်စဥ်နှင့်ပတ်သတ်၍ အသေးစိတ်အခြေအနေများသိရှိနိုင်စေရန် နှင့် မလိုလားအပ် သော နောက်ဆက်တွဲကိစ္စရပ်များ မဖြစ်ပေါ်စေရေး စစ်ကိုင်းတိုင်းစစ်ဌာန တာဝန်ရှိသူများက အနီးကပ် ကွင်းဆင်းဆောင်ရွက်နေပြီး ပြည်သူ့ကာကွယ်ရေးတပ်မတော်၊ စစ်ရုံးချုပ်အနေဖြင့်လည်း စစ်ဘက်ဆိုင်ရာ ဥပဒေ၊ လုပ်ထုံးလုပ်နည်းများနှင့်အညီအထူးအလေးပေး ကိုင်တွယ်ဆောင်ရွက် သွားမည် ဖြစ်ပါသည်”လို့ပြည်သူ့ကာကွယ်ရေးတပ်မတော် စစ်ရုံးချုပ်ကထုတ်ပြန်ပါတယ်။
Public Service Announcement
တပ်ရင်းမှူး ပုလဲမောင်ဟာ ဒီကနေ့ ပြုလုပ်တဲ့ အစည်းအဝေး တခုမှာ ပစ်ခတ်ခံရပြီး ကျဆုံးခဲ့တာဖြစ်ပါတယ်။ ပစ်ခတ်မှု ကျူးလွန်ခဲ့တဲ့ ရဲဘော်ဟာ ခရိုင်ကွပ်ကဲရေးမှူး စွမ်းသူမောင်ရဲ့ ကိုယ်ရေးအရာရှိတာဝန်ယူထားတဲ့ ရဲဘော်လို့ ရေးသားမှုတွေရှိပေမယ့် ယင်းမာပင်ခရိုင် အမှတ်(၆)တပ်ရင်းရဲ့ ထုတ်ပြန်ချက်နဲ့ ပြည်သူ့ကာကွယ်ရေးတပ်မတော်ရဲ့ ထုတ်ပြန်ချက်မှာ ဖြစ်စဉ် အသေးစိတ်ဖော်ပြမထားပါဘူး။
ယင်းမာပင်ခရိုင်အမှတ်-၆တပ်ရင်း ကလည်း တပ်ရင်းမှူး ပုလဲမောင်(ခ)ပီတာ ကျဆုံးခြင်းနဲ့ ပတ်သက်ပြီး ဒီညပိုင်းမှာထုတ်ပြန်ခဲ့ရာ ဒီကနေ့ ယင်းမာပင်ခရိုင်ပေါင်းစပ်ညှိနှိုင်းအစည်းအဝေးပြုလုပ်နေစဥ်အတွင်း နေ့လည် ၂နာရီမှာ တပ်ရင်းမှပေးအပ်သောတာ၀န်များကိုယ်ထမ်းဆောင်နေစဉ်အတွင်း တိုင်းပြည်နဲ့ ပြည်သူလူထုအပေါ် အသက်နဲ့ ခန္ဓာပေးဆပ်သွားခဲ့တာလို့ ဖော်ပြထားပါတယ်။
ပစ်ခတ်မှုကျူးလွန်သူရဲဘော်ငဖြိုးကို လက်နက်ဖြုတ်သိမ်း၍ ယင်းမာပင်ခရိုင် စစ်ဌာန အချုပ်ထောင်တွင် ဖမ်းဆီးထိန်းသိမ်းထားပြီး ဖြစ်ဟုလည်း အသိပေးထားပါတယ်။
“တပ်ရင်းမှူးတစ်ယောက်ကို အစည်းဝေးခန်းမှာပစ်တာတော့ လွန်လွန်းအားကြီးတယ်။ ဒါကို ပြင်းပြင်းထန်ထန်ထိထိရောက်ရောက် အရေးယူဖို့လိုတယ်။ နောက်ပြီး ယင်းမာပင်ခရိုင်ထဲက အခြေအနေကို သေချာလေး ထိန်ထိန်းသိမ်းသိမ်းကိုင်တွယ်ဖို့လိုနေပြီ” လို့ ဆားလင်းကြီးမြို့နယ်ကပြည်သူ့ကာကွယ်ရေး ရဲဘော်တစ်ဦးကပြောပါတယ်။
ဒေသခံတွေကတော့ ဖြစ်ပျက်ခဲ့တဲ့အခြေအနေကို NUG ကာကွယ်ရေးဝန်ကြီးဌာန အနေနဲ့ အမှုမှန်ပေါ်ပေါက်အောင်စစ်ဆေးအရေးယူဖို့ လိုလားတယ်လို့ပြောကြပါတယ်။
