ဇူလိုင်-၉၊၂၀၂၆၊ကတ်သရင်းနှင်း/People’s Spring
စစ်ကိုင်းတိုင်း၊ ခင်ဦးမြို့နယ်က သာဝတ္ထိကျေးရွာကို စစ်တပ်က အသေခံဒရုန်းနဲ့ ဗုံးကြဲတိုက်ခိုက်ရာ ဒေသခံပြည်သူ ၅ ဦး ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။
ဇူလိုင် ၉ ရက် ဒီကနေ့ မနက်၁၁နာရီခန့်က ရွှေဘိုမြို့ လက်နက်ကြီးတပ်ရင်း (လကရ-၈)ကနေ သာဝတ္ထိရွာကို အသေခံဒရုန်းနဲ့ ဗုံးကြဲခဲ့တာလို့ သိရပါတယ်။
ဗုံးဟာ ရွာတောင်ပိုင်းကျပြီး အမျိုးသား ၃ဦးနဲ့ အမျိုးသမီး ၂ဦး ထိခိုက်ဒဏ်ရာရခဲ့တာလို့ သိရပါတယ်။
Public Service Announcement
ဒဏ်ရာရပြည်သူတွေဟာ ကျောနဲ့ လက်တွေမှာ ဗုံးစထိမှန် ဒဏ်ရာတွေရခဲ့ပြီး ဒဏ်ရာမစိုးရိမ်ရဘူးလို့ သိရပါတယ်။
“ဘာသတင်းမှမရှိဘူး။location တိတိကျကျလည်း မဟုတ်ဘူး။ ဘာမှမဟုတ်ဘဲနဲ့ အသားလွတ် ပြည်သူလည်းမရှိ၊ လူလည်းမရှိတဲ့လမ်းတွေ တောင်အသားလွတ် လျှောက်ချနေတာ”လို့ ခင်ဦးမြို့နယ် ဒေသခံတဦးက ပြောပါတယ်။
ဒါ့အပြင် ရွှေဘိုမြို့လေ့ကျင့်ရေး(၈)တပ်ကနေလည်း ခင်ဦးနဲ့ ဝက်လက်မြို့နယ်တို့ကို မကြာခဏ ဒရုန်းနဲ့ဗုံးကြဲလေ့ ရှိတယ်လို့လည်း ဆိုပါတယ်။
ပြီးခဲ့တဲ့ ဇွန်လ၁ရက်ကလည်း ခင်ဦးမြို့နယ်၊စည်ပုတ္တရာမြို့ဟောင်းက ဘုန်းကြီးကျောင်းကို စစ်တပ်က ဗုံးကြဲခဲ့တာမို့ သက်ကြီးအဘိုး၊အဘွား ၂ဦး သေဆုံးခဲ့ပါတယ်။
