ဇူလိုင်-၁၀၊၂၀၂၆။ဇော်ရမ်း/People’s Spring
ရှမ်းပြည်နယ်အရှေ့ပိုင်း၊’ဝ’ကိုယ်ပိုင်အုပ်ချုပ်ခွင့်ရဒေသ၊ မိုင်းပေါက်မြို့ မှာ ရေဘေးကြုံတွေ့နေလို့ အရေး ပေါ်ကယ်ဆယ်ရေးတွေလုပ်ဆောင်နေရပြီး တရုတ်ဘက်ကရေကာတာ ဖွင့်ချနိုင်လို့ မြန်မာ- တရုတ်နယ်စပ်ရွှေလီမြစ်ဘေးနေရာတွေ ရေကြီးနိုင်တယ်လို့ အရပ်ဖက်အဖွဲ့စည်းတွေကသတိပေးထားပါတယ်။
မိုင်းပေါက်မြို့ မှာ မြို့ပေါ်ရပ်ကွက်တွေရော ကျေးရွာတွေမှာပါရေကြီးနစ်မြုပ်ပြီး ဒေသခံတွေရေ ဘေးကြုံနေတာဖြစ်ပါတယ်။
” မိုးကငါးရက်ဆက်တိုက်ရွာတာ။အရမ်းရွာတာ။တရုတ်ဘက်ကလည်းရေကြီးနေတာ။ အခု မိုင်းပေါက်လည်း ရေဘေးက ကြီးတယ်နော်။ မြို့ထဲရေပြည့်နေတာ”လို့ ဒေသခံတဦးကပြောပါတယ်။
Public Service Announcement
မိုင်းပေါက်မြို့မှာ၂၀၂၅ခုနှစ်ဇူလိုင်လကလည်း မိုးကြီးပြီးရေဘေးကြုံလို့ ရဲအရာရှိတစ်ဦးအပါအဝင် ငါးဦးထက်မနည်းသေဆုံးခဲ့ပါတယ်။ လက်ရှိရင်ဆိုင်နေရတဲ့ရေ ဘေးမှာလည်း ဝရဲတပ်ဖွဲ့ နဲ့ ကယ်ဆယ်ရေးအဖွဲ့တွေက ဒေသခံတွေ ဘေးလွတ်ရာကို အရေးပေါ်ပို့ဆောင်နေရတယ်လို့ သတင်းရရှိပါတယ်။
လက်ရှိမှာ ရှမ်းပြည်နယ်မြောက်ပိုင်းနဲ့အရှေ့ပိုင်းက မြို့နယ်အချို့မှာလည်း မိုးသည်းထန်စွာရွာသွန်းနေတယ်လို့ ဒေသခံတွေကပြောပါတယ်။ဝဒေသနဲ့ဆက်စပ်နေတဲ့တန့်ယန်းမြို့၊ လားရှိုးမြို့ တွေမှာလည်း ပုံမှန်ထက်မိုးများနေတယ်လို့သိရပါတယ်။
ရှမ်းပြည်နယ်နဲ့ဆက်စပ်နေတဲ့တရုတ်နိုင်ငံဘက်မှာလည်း မိုးကြီးပြီးရေဘေးကြုံနေတဲ့အတွက် ရေကာတာတွေကိုဖောက်ချနေတာကြောင့် ရေဘေးအခြေအနေပိုဆိုးမှာကိုဒေသခံတွေကစိုးရိမ်နေပါတယ်။
မြန်မာ-တရုတ် နယ်စပ်နဲ့ ဆက်စပ်နေတဲ့ တရုတ်နိုင်ငံဘက်မှ မြစ်လက်တက်တွေက ရေကာတာတွေကို လိုအပ်ရင်ဖောက်ချမယ်လို့ တရုတ်အစိုးရကကြေညာထားလို့ရှမ်းပြည်နယ်မြောက်ပိုင်း ရွှေလီမြစ်ကမ်းဘေးနဲ့ နမ့်ခမ်းမြို့နယ်အတွင်း ရွှေလီမြစ်ရေကြီးရေလျှံမှုအန္တရာယ်ကို အထူးသတိပြုကြဖို့ တအာင်းသဘာဝပတ်ဝန်းကျင်စောင့်ကြည့်ရေးအဖွဲ့ (TEWG) က ဒီနေ့ ဇူလိုင်လ၁၀ရက်နေ့မှာသတိပေးထားပါတယ်။လက်ရှိမှာ တရုတ်နိုင်ငံမှာလည်း ဆိုးရွားတဲ့ရေ ဘေးကြုံတွေ့နေပါတယ်။
တောင်တရုတ်ပင်လယ်အတွင်းလေဖိအားနည်းရပ်ဝန်းဖြစ်နေပြီး ရှမ်းပြည်နယ်နဲ့ဆကစပ်နေတဲ့ ထိုင်းနိုင်ငံမှာလည်း မိုးကြီးမယ့်သတိပေးချက်တွေထုတ်ပြန်ထားပါတယ်။
ဒါ့အပြင် ဘင်္ဂလားပင်လယ်အော်အတွင်းမှာလည်းလေဖိအားနည်းရပ်ဝန်းဖြစ်နေပြီး ရခိုင်ပြည်နယ်အပါအဝင် မြန်မာနိုင်ငံဒေသအနှံ့အပြားမှာ မိုးကြီးနိုင်တယ်လို့ အမျိုးသားညီညွတ်ရေးအစိုးရ(NUG)၊လူမှုရေးရာ၊ အလုပ်သမားနဲ့လူသားချင်းစာနာထောက်ထားရေးဝန်ကြီးဌာန(MoSLHA)ကထုတ်ပြန်ထားပါတယ်။ မနက်ဖြန်ဇူလိုင်လ(၁၂)ရက်ခန့်မှာလည်း ဘင်္ဂလားပင်လယ်အော်မြောက်ပိုင်းမှာ လေဖိအားနည်းရပ်ဝန်းတစ်ခု ထပ်ဖြစ်နိုင်တယ်လို့သတိပေးထားပါတယ်။
လတ်တလောအခြေအနေအရ ရခိုင်ပြည်နယ်မှာရေဘေးအများဆုံးရင်ဆိုင်နေရပြီး ကျောက်တော်၊ မြောက်ဦး၊ မင်းပြား၊ ရသေ့တောင်၊ ပုဏ္ဏားကျွန်း၊ တောင်ကုတ်၊ ဘူးသီးတောင်နဲ့ မောင်တောမြို့နယ်တို့မှာ လူဦးရေတစ်သိန်းကျော်ရေ ဘေးရင်ဆိုင်နေရတယ်လို့ ရခိုင်အရပ်ဘက်အဖွဲ့စည်းတွေကထုတ်ပြန်ထားပါတယ်။
