'/%3E%3C/svg%3E){kind=small}
ဇူလိုင်-၁၁ ၊၂၀၂၆။ဇော်၀င်း/People’s Spring
ရှမ်း-ကရင်နီ ပြည်နယ်အစပ်က မိုးဗြဲမြို့တိုက်ပွဲမှာ စစ်တပ်စစ်ကြောင်းက သေဆုံးရုပ်အလောင်းတွေထားပြီး ဆုတ်ခွာသွားတယ်လို့ မိုးဗြဲ PDF တာ၀န်ရှိသူက လူထုနွေဦးကို ပြောပါတယ်။
မိုးဗြဲမြို့ကတဆင့် မြို့ အနောက်တောင်ဘက်က လွယ်ယင်းမင်္ဂလာကျေးရွာကို တက်လာတဲ့ စစ်တပ်စစ် ကြောင်း နဲ့ တော်လှန်ရေးတပ်တွေဟာ နှစ်ပတ်၀န်းကျင်ကြာ အပြန်အလှန် ထိတွေ့မှုတွေမှာ စစ်တပ်အထိနာသွားတယ်လို့ ဆိုပါတယ်။
“လွယ်ယင်းတောင်ခြေဖြစ်ပါတယ်။တက်လာတဲ့စစ်ကြောင်းက ထိတွေ့မှုရှိတာလည်း လွယ်ယင်းတောင်ခြေကျေးရွာမှာဖြစ်ပါတယ်။ ဆုတ်သွားတာအတည်ပြုလို့ရပါတယ်။၈ ရက်နဲ့ ၉ ရက်နေ့ကတည်းကဆုတ်သွားတာဖြစ်ပါတယ်”လို့ မိုးဗြဲ PDF တာ၀န်ရှိသူက ပြောပါတယ်။
Public Service Announcement
တိုက်ပွဲတွေအတွင်းမှာ စစ်တပ်ဘက်က သေဆုံးသူ ၂၀ နဲ့ ၃၀ ၀န်းကျင်ရှိတယ်လို့ သူက ခန့်မှန်းပါတယ်။
“၇ ရက်နဲ့ ၈ ရက်နေ့ထိတွေ့မှုတိုက်ပွဲမှာ ခဲယမ်းကတော့ မရခဲ့ပါဘူး။စစ်အသုံးဆောင်အချို့ထားခဲ့တာမျိုးတွေတွေ့ရပါတယ်။ရုပ်အလောင်းတွေ တွေ့ရတယ်”လို့ မိုးဗြဲ PDF တာ၀န်ရှိသူက လတ်တလောစစ်ရေးကို ရှင်းပြပါတယ်။
စစ်တပ်က လွယ်ယင်းမင်္ဂလာကျေးရွာကတဆင့် နန်းမယ်ခုံမြို့ ဆင်တောင်ကျေးရွာအထိ ခြေကုပ်ယူပြီး မိုးဗြဲ-နန်းမယ်ခုံလမ်းမကြီးကို ထိန်းချုပ်ဖို့ ကြိုးစားနေတာ ဖြစ်ပါတယ်။
ထိတွေ့တိုက်ပွဲတွေ မဖြစ်မီက ဒရုန်းတွေနဲ့ စစ်တပ်တပ်စွဲတဲ့ လွယ်ယင်းတောင်ခြေတဝိုက်ကို တိုက်ခိုက်ခဲ့မှုတွေမှာလည်း ထိခိုက်သေဆုံးသူတွေရှိတယ်လို့ ရှမ်းတောင်စစ်ဒေသ ဗျူဟာ(၁၄) တာ၀န်ရှိသူက ပြီးခဲ့တဲ့ရက်ပိုင်းက လူထုနွေဦးကို ပြောထားပါတယ်။
ဇွန်လ ၂၈ ရက်ကလည်း လွိုင်ကော်- မိုးဗြဲမြို့နယ်ကြားက စစ်တပ်ကာကင်းစခန်းတွေကို ကရင်နီ JOC တော်လှန်ရေးတပ်ပေါင်းစုက ထိုးစစ်ဆင်ခဲ့ပြီး လက်နက်ခဲယမ်းအချို့ကိုရရှိခဲ့ပါတယ်။
အာဏာသိမ်းစစ်တပ်က မိုးဗြဲမြို့ကို ပြီးခဲ့တဲ့နှစ်လယ်ပိုင်းက ပြန်ထိန်းချုပ်ခဲ့ပေမယ့် မြို့အနီးတဝိုက်ကို တော်လှန်ရေးတပ်တွေက ပိတ်ဆို့ထားပါတယ်။
“နန်းမယ်ခုံရရင် မိုးဗြဲ ၊လွိုင်ကော် နဲ့ ဒီမောဆိုရှေ့ခြမ်းကိုကောင်းကောင်းထိန်းချုပ်လို့ရသွားမယ့်အခြေ အနေ”လို့ ကရင်နီစစ်ရေးသတင်းရင်းမြစ်က ပြောထားပါတယ်။
နန်းမယ်ခုံမြို့ကို တော်လှန်ရေးတပ်တွေက ၂၀၂၃ နှစ်ကုန်ပိုင်းကစပြီး ထိန်းချုပ်ထားတာဖြစ်ပါတယ်။
