ဇူလိုင်-၁၄၊၂၀၂၆။ရောင်နီ/People’s Spring
ရန်ကုန်မြို့၊ မြောက်ဥက္ကလာပမြို့နယ် တံတားကြီးရပ်ကွက်မှာ ဈေးရောင်းဖို့ ထွက်လာတဲ့ လူငယ် ၃ ဦးကို (ဃ)ရပ်ကွက် ရာအိမ်မှူးအဖွဲ့ က ဖမ်းဆီးပြီး စစ်မှုထမ်းစုဆောင်းတဲ့နေရာကိုပို့ဆောင်လိုက်တယ်လို့ Rangoon Scout Network-RSN ရဲ့ ပြန်ကြားရေးတာဝန်ခံက ပြောပါတယ်။
“ဃ ရပ်ကွက်ရုံးကို ဖမ်းသွား၊ ရုံးတံခါးပိတ် ခဏချုပ်ထားပြီး အဲ့မနက်တွင်းပဲ စစ်မှုထမ်းဖို့ တခြားနေရာကို လွှဲလိုက်တယ်လို့ သိရပါတယ်ဗျ။” လို့ ပြောပါတယ်။
ဇူလိုင် ၁၀ ရက် မနက် ၅ နာရီခွဲလောက်မှာ ဖမ်းဆီးခဲ့တာဖြစ်ပြီး ဖမ်းဆီးခံရသူတွေက အသက် ၂၃ နှစ်ဝန်းကျင် လူငယ်တွေလို့ သိရပါတယ်။
Public Service Announcement
ရန်ကုန်မြို့မှာ ဇူလိုင် ၆ရက် ကနေ ၁၂ ရက်အတွင်း ဖမ်းဆီးခံရသူ ၉ဦးရှိပြီး လမ်းပေါ်မှာ အဖမ်းခံရသူ ၆ဦး နဲ့ စက်ရုံအတွင်း ရှာဖွေကာ ဖမ်းဆီးခံရသူ ၃ ဦးရှိတယ်လို့ RSN က ထုတ်ပြန်ထားပါတယ်။
ဇူလိုင် ၅ ရက်ကလည်း လှည်းတန်းဘူတာမှာ ထိုင်နေတဲ့ လူငယ် ၂ဦးကို ရဲတစ်ဦးနဲ့ အရပ်ဝတ်တစ်ဦးက ဖုန်းတွေယူစစ်ပြီး ပရဟိတကားနဲ့ ဖမ်းဆီးသွားတယ်လို့ RSN က အသိပေးထားပါတယ်။
စစ်တပ်ဟာ စစ်မှုထမ်းအပတ်စဉ် ၁ခုကို လူဦးရေ ၅,၀၀၀ ခေါ်ယူမယ်လို့ ကြေညာထားပြီး လက်ရှိမှာ အပတ်စဉ် (၂၇)ကို စတင်ခေါ်ယူနေပါတယ်။
