နတ်မောက်မှာ စစ်တပ်ကထိန်းချုပ်ဖွင့်ထားတဲ့ စာသင်ကျောင်းကို လေကြောင်းက ပြန်ဗုံးကြဲ

ဇူလိုင် ၁၅၊ ၂၀၂၆။ဟာနာဆန်/People’s Spring

မကွေးတိုင်း၊ နတ်မောက်မြို့နယ်၊ ကန်လေးကုန်းကျေးရွာ စာသင်ကျောင်းကို အာဏာသိမ်းစစ်တပ်က လေကြောင်းတိုက်ခိုက်လို့ မူလတန်း ကျောင်းသား ၁ဦးသေဆုံးပြီး ၇ ဦး ဒဏ်ရာရရှိခဲ့ကြောင်း ဒေသခံတွေက ပြောပါတယ်။

မနေ့က ဇူလိုင် ၁၄ ရက် နေ့လယ် ၁ နာရီခန့်က နတ်မောက်မြို့နယ်၊ ကန်လေးကုန်းကျေးရွာက စစ်ကောင်စီဖွင့်လှစ်ထားတဲ့ စာသင်ကျောင်းကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာဖြစ်ကြောင်း ဒေသခံတွေက ပြောပါတယ်။

“ညောင်ဦးလေဆိပ်က Mi-35နဲ့ ရော့ကတ်၊ ပွိုင့်ဖိုက်တို့ ပစ်ခတ်ခဲ့တာပါ။ ကျောင်းသား ၁ဦး သေဆုံးပြီး ကျောင်းသား ၁ဦး ပေါင်ပြတ်ခဲ့ပါတယ်။ ဒါ့အပြင် တခြားထိခိုက်ဒဏ်ရာရရှိသူများလည်း ရှိပါသေးတယ်။”လို့ နတ်မောက် သတင်းစုံ natmoukရဲ့ တာဝန်ရှိသူက ပြောပါတယ်။

Public Service Announcement

သေဆုံးသူဟာ မူလတန်း ကျောင်းသားငယ် မောင်ဖြိုးဝေဦးဖြစ်ပြီး အခြားကျောင်းသားတွေဖြစ်တဲ့ မောင်ကောင်းပြည့်ဇော်၊ မောင်အောင်ပြည့်ဇော်၊ မောင်သော်ဇင်ဖြိုး (ခ) အာကျယ်၊ မောင်ဇေရဲထက်၊ မောင်နေခန့်ပိုင်၊မောင်ဇင်လင်းကို၊ မောင်စိုင်းမင်းလတ်တို့ ထိခိုက်ဒဏ်ရာတွေ ရရှိခဲ့ကြောင်း ဒေသခံတွေက ပြောပါတယ်။

ဒါ့အပြင် နေအိမ် ၄ လုံးထက်မနည်း ပျက်စီးခဲ့ကြောင်း သိရပါတယ်။ PDF ရဲဘော်တွေလည်းမရှိ၊ တိုက်ပွဲ ဖြစ်ပွားခြင်းလည်းမရှိ၊ စစ်ကောင်စီရဲ့စာသင်ကျောင်းကိုပဲ လေကြောင်းတိုက်ခိုက်သွားလို့ အံ့သြနေကြောင်း ဒေသခံတွေက ပြောပါတယ်။

ဇွန်လ ၂၅ ရက်ကလည်း နတ်မောက်မြို့နယ်၊ သမန်းကုန်းကျေးရွာကို အာဏာသိမ်းစစ်တပ်က

တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်လို့ ကလေးငယ် ၂ ဦး အပါအဝင် ပြည်သူ ၅ ဦး ပွဲချင်းပြီး သေဆုံးခဲ့ပါသေးတယ်။