အင်း​တော် နဲ့ ​မော်လူးကိုစစ်တပ်ကဗုံးမကြာခဏကြဲ​နေလို့ စစ်​ဘေး​ရှောင်​တွေကို​တော်လှန်​ရေးအင်အားစု​တွေသတိ​ပေး

ဇူလိုင်-၁၅၊၂၀၂၆။ဇော်ရမ်း/People’s Spring

အင်းတော်နဲ့မော်လူးမြို့နယ်ပတ်ဝန်းကျင်ကို စစ်တပ်က လေကြောင်းမှ ဗုံးမကြာခဏကြဲနေလို့ စစ်ဘေးရှောင် တွေလုံခြုံရေးအန္တရာယ်သတိပြုကြဖို့ တော်လှန်ရေးအင်အားစုတွေကသတိပေးထားပါတယ်။

ဇူလိုင်လဆန်းကနေ ဇူလိုင်လလယ်အထိ အင်းတော်မြို့နယ်မဲဇာဒေသက ပင်သချေရွာနဲ့ မော်လူးမြို့နယ်ထဲကို ပစ်မှတ်ထားပြီးစစ်တပ်ကဗုံးမကြာခဏကြဲနေဝာာလို့သိရပါတယ်။

“ထင်ရာမြင်ရာကိုရမ်းသမ်းပြီးပစ်နေတာ။ပင်သချေရွာကိုဆိုရင် အရပ်သားတွေရှိနေတဲ့နေရာကို နှစ်ကြိမ်ဗုံးကြဲသွားတယ်။ ပထမ နေ့က ကြဲတာဒဏ်ရာရကြတယ်။ နောက်ရက်ကျတော့အဲဒီနေရာကိုထပ်ပစ်တယ်။ စာသင်ကျောင်းတွေရောအိမ်တွေရောပျက်စီးတယ်” လို့ အင်း‌တော်မြို့ခံတဦးကပြောပါတယ်။

Public Service Announcement

ယခုရက်ပိုင်းမှာ ကသာ၊ အင်းတော်၊ မော်လူးမြို့နယ်တွေမှာ စစ်ရေးတင်းမာနေသလို စစ်တပ်ရဲ့လေကြောင်းနဲ့ ဒရုန်းတိုက်ခိုက်မှုတွေလည်းရှိနေတာပါ။မြေပြင်တိုက်ပွဲတွေမှာအထိနာနေတဲ့စစ်တပ်က စစ်ရေးပစ်မှတ်မဟုတ်တဲ့နေရာတွေကိုပါဗုံးကြဲနေတာလို့ တော်လှန်ရေးရဲဘော်တဦးကပြောပါတယ်။

“စစ်တပ်ကတော့ရှုံးမဲမဲပြီးလုပ်နေတာပဲ။ အရပ်သားတွေဘေးကင်းလုံခြုံရေးကိုဦးစားပေးပြီး သတိပေးချက်တွေကိုရတဲ့နည်းနဲ့ထုတ်ပြန်ပေးနေတယ်”လို့ ၎င်းကပြောပါတယ်။

ဇူလိုင်လ၇ရက်နေ့က ကသာမြို့နယ်ထဲက ပင်းမလွတ်ရွာအနီး တိုက်ပွဲပြင်းထန်ခဲ့ပြီး စစ်တပ်ဘက်မှာထိခိုက်သေဆုံးမှုတွေရှိခဲ့တယ်လို့ စစ်ရေးသတင်းမြစ်တွေကပြောပါတယ်။ အဲဒီနေ့ကတိုက်ပွဲမှာ စစ်တပ်က လေယာဉ်နဲ့ဗုံးအလုံး၄၀ကျော်ကြဲချသွားတယ်လို့ ဒေသတွင်း စစ်ရေးနဲ့လုံခြုံ ရေးသတင်းတွေဖော်ပြပေးနေတဲ့ Indaw Revolution-IR က ထုတ်ပြန်ထားပါတယ်။

စစ်တပ်ဘက်ကရုပ်အလောင်းတွေနဲ့လက်နက်ခဲယမ်းတွေကို တော်လှန်ရေးတပ်တွေကရရှိခဲ့တယ်လို့ Indaw Revolution-IR က ထုတ်ပြန်ပါတယ်။မန္တလေး – မြစ်ကြီးနားကားလမ်းပေါ်မှာရှိတဲ့အင်းတော်မြို့နယ် နးဘားလမ်းဆုံအနီးက ကမ်းနီရွာကို စစ်တပ်က ဒရုန်းနဲ့ ဗုံးကြဲလို့ အရပ်သားနှစ်ဦး သေဆုံးခဲ့ပါတယ်။

ဇူလိုင်လဆန်းက တိုက်ပွဲတွေမှာ အင်းတော်မြို့နယ်အတွင်း မြစ်ကြီးနား-ရွှေဘို မီးရထားလမ်းပေါ်က မဲဇာရွာနဲ့ နန့်သဲရွာက‌နေ တော်လှန်ရေးတပ်တွေဆုတ်ခွာခဲ့ရပေမယ့် တခြားစစ်မျက်နှာတွေကို တော်လှန်ရေးတပ်တွေက စစ်ရေးဖော်ဆောင်နေတာလို့စစ်​​ရေးသတင်းရင်းမြစ်အချို့က​ပြောပါတယ်။

ဒါ့အပြင် ကသာမြို့နဲ့ဆက်စပ်နေတဲ့ ကချင်ပြည်နယ်ရွှေကူမြို့နယ်မှာလည်း တိုက်ပွဲတွေပြင်းထန်နေတယ်လို့ ဇူလိုင်လ၁၅ရက် မနက်ပိုင်းအထိအခြေအနေကို မြို့ခံတစ်ဦးကပြောပါတယ်။

အလားတူရွှေကူမြို့နယ်နဲ့ဆက်စပ်နေတဲ့ ငါးအိုးဒေသမှာလည်း တိုက်ပွဲတွေဆက်ဖြစ်နေပြီး ဇွန်လအတွင်းက လက်လွှတ်ခဲ့ရတဲ့ စခန်းတချို့ကို KIA နဲ့ ပူးပေါင်းတပ်တွေက သိမ်းယူလိုက်တယ်လို့ ဒေသခံသတင်းရင်းမြစ်တွေက ပြောပါတယ်။အင်းတော်၊ ကသာ၊ ရွှေကူ၊ ငါးအိုးဒေသတွေဟာ စစ်ကိုင်းတိုင်း၊ ကချင်ပြည်နယ်နဲ့ ရှမ်းပြည်နယ်ဆက်စပ်နေတဲ့ ဒေသဖြစ်ပြီး တိုက်ပွဲဧရိယာကျယ်ကျယ်ပြန့်ပြန့်ဖြစ်ပွားနေတာဖြစ်ပါတယ်။

ဇူလိုင်လ ၁၄ရက်နဲ့ ဇူလိုင် ၁၅ ရက်​နေ့​တွေမှာပဲ စစ်တပ်က စစ်ကိုင်းတိုင်းထဲက အရာတော်မြို့နယ်၊ မကွေးတိုင်းထဲက နတ်မောက်မြို့နယ်၊ ချင်းပြည်နယ် မင်းတပ်နဲ့ ကန်ပက်လက်မြို့နယ်တွေကို လေကြောင်းကနေ ဗုံးကြဲလို့ အရပ်သားထိခိုက်သေဆုံးမှုတွေ ရှိနေပါတယ်။