ဇူလိုင်-၁၆၊၂၀၂၆။ထားမြတ်/People’s Spring
ကရင်အမျိုးသားအစည်းအရုံး(KNU) ညောင်လေးပင်ခရိုင်(ခလယ်လွီထူခရိုင်) မုန်း(မူး)မြို့နယ်ကို စစ်တပ်က လေကြောင်းဗုံးကြဲတိုက်ခိုက်ခဲ့လို့ အရပ်သား၂ဦး သေဆုံးခဲ့ကြောင်း KNUက သတင်းထုတ်ပြန်ပါတယ်။
ဇူလိုင် ၁၃ရက်က မုန်းမြို့နယ်ကကျေးရွာတွေကို စစ်တပ်က Y12 လေယာဉ်နဲ့ ဗုံးအလုံးရေ ၂၀ ထက်မနည်း ကြဲချတိုက်ခိုက်ခဲ့တာလို့ဆိုပါတယ်။စစ်တပ်ကဟီအူးကျေးရွာ၊ ရှဲဒေးကျေးရွာနဲ့ မီးရထားကျေးရွာများပေါ်သို့ ဗုံးကြဲတိုက်ခိုက်ခဲ့လို့ မီးရထားကျေးရွာက အသက် ၅၇ နှစ်နဲ့ အသက် ၅၆ နှစ်အရွယ် အမျိုးသမီး ၂ဦး သေဆုံးခဲ့ရတာလို့ အသိပေးပါတယ်။
“တိုက်ခိုက်ခံရသည့် နေရာများတွင် တိုက်ပွဲဖြစ်ပွားခြင်း သို့မဟုတ် စစ်ရေးလှုပ်ရှားမှုများ မရှိခဲ့ဘဲ၊ အာဏာသိမ်းအကြမ်းဖက်စစ်တပ်က အရပ်သားပြည်သူများ နေထိုင်ရာ ကျေးရွာများကို ရည်ရွယ်ချက်ရှိရှိ လာရောက်ဗုံးကြဲတိုက်ခိုက်ခဲ့ခြင်းဖြစ်သည်” လို့ KNUက ထုတ်ပြန်ပါတယ်။
Public Service Announcement
စစ်တပ်လေကြောင်းတိုက်ခိုက်မှုကြောင့် စျေးဆိုင်အချို့ ပျက်စီးခဲ့ရကြောင်းလည်း အသိပေးပါတယ်။
KNU တပ်မဟာ(၃)နယ်မြေဖြစ်တဲ့ မုန်းမြို့နယ်အပါအဝင် KNU အုပ်ချုပ်နယ်မြေတွေက အရပ်သား နေထိုင်ရာနေရာတွေကို စစ်တပ်က လေကြောင်း တိုက်ခိုက်တာတွေအပြင် လက်နက်ကြီးတွေနဲ့ ပစ်ခတ်တာ၊ဒရုန်းနဲ့ ဗုံးကြဲတာတွေကိုလည်း မကြာခဏ လုပ်တာကြောင့် ပြည်သူသေဆုံးထိခိုက်မှုတွေ အများအပြားရှိခဲ့ပါတယ်။
စစ်တပ်က အရပ်သားတွေအပေါ် ပစ်မှတ်ထားတဲ့ လေကြောင်း တိုက်ခိုက်မှုတွေကြောင့် ပြည်သူတွေ နေ့စဉ် အသက်အန္တရာယ် စိုးရိမ် နေကြရပြီး လူသားချင်းစာနာမှုဆိုင်ရာ အကျပ်အတည်းများလည်း ပိုမိုဆိုးရွားလာလျက်ရှိတယ်လို့ KNUက ထုတ်ပြန်ပါတယ်။
