ဇူလိုင် ၁၇၊ ၂၀၂၆။ ထားမြတ်/People’s Spring
ကရင်အမျိုးသားအစည်းအရုံး(KNU) ဖာပွန်ခရိုင်(မူတြော်ခရိုင်) တပ်မဟာ(၅)နယ်မြေကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ စာသင်ကျောင်းနဲ့ နေအိမ်အဆောက်အဦး ပျက်စီးခဲ့ကြောင်း ကရင်ငြိမ်းချမ်းရေးအထောက်အကူပြုကွန်ရက်(KPSN)က ထုတ်ပြန်ပါတယ်။
ဇူလိုင် ၁၆ရက်က မူတြော်ခရိုင် ဒွယ်လိုးမြို့နယ် ထီးလောသီထာရွာကို စစ်တပ်က ဗုံး ၄လုံး ကြဲချတိုက်ခိုက်ခဲ့ရာ လူနေအိမ် ၁၃လုံးနဲ့ စာသင်ကျောင်း ၁ကျောင်း ပျက်စီးခဲ့ပြီး လူထိခိုက်သေဆုံးမှု မရှိဟု အသိပေးထားပါတယ်။
အာဏာသိမ်းစစ်တပ်ဟာ KNU ခရိုင်နဲ့ တပ်မဟာအသီးသီးမှာ အရပ်သား ပြည်သူတွေကို ပစ်မှတ်ထားတဲ့ လေကြောင်းတိုက်ခိုက်မှု၊ လက်နက်ကြီးတိုက်ခိုက်မှုတွေ မကြာခဏ ပြုလုပ်လျက်ရှိပါတယ်။
Public Service Announcement
ဇူလိုင် ၁၃ရက်ကလည်း တပ်မဟာ(၃)နယ်မြေ ညောင်လေးပင်ခရိုင် မုန်းမြို့နယ်အတွင်း ကျေးရွာတွေကို စစ်တပ်က Y12 လေယာဉ်နဲ့ ဗုံးအလုံးရေများစွာ ကြဲချတိုက်ခိုက်ခဲ့လို့ အမျိုးသမီး ၂ဦးသေဆုံးခဲ့ရပါတယ်။
KNU တပ်မဟာ(၁)နယ်မြေ သထုံခရိုင်မှာလည်း ဇွန်လနဲ့ ဇူလိုင်အတွင်း စစ်တပ်က တိုက်ပွဲမရှိတဲ့ ဒေသတွေကို လေကြောင်း၊ လက်နက်ကြီး ပစ်ခတ်မှုတွေ ဆက်တိုက်ပြုလုပ်ခဲ့လို့ အရပ်သားပြည်သူ သေဆုံးထိခိုက်မှုများ ဖြစ်ခဲ့ကြောင်း KNU ဗဟိုက ထုတ်ပြန်ထားပါတယ်။
စစ်တပ်က တိုက်ပွဲမရှိတဲ့ ဒေသက အရပ်သားနေထိုင်ရာတွေကို ပစ်မှတ်ထားတိုက်ခိုက်နေတာကြောင့် ပြည်သူတွေ အသက်အိုးအိမ်စည်းစိမ် ဆုံးရှုံးနေရတဲ့အပြင် နေ့စဉ်လူနေမှုဘ၀ အသက်မွေးဝမ်းကြောင်းလုပ်ငန်းနဲ့ လုံခြုံရေးအခြေအနေများ ဆိုးရွားစွာ ထိခိုက်လျက်ရှိဟု ဖော်ပြထားပါတယ်။
