ရန်ကုန်မြို့မှာ ဖုန်းလိုင်းတွေ ပြတ်တောက်

ဇူလိုင်-၁၉၊၂၀၂၆။သုည/People’s Spring

ရန်ကုန်မြို့မြို့နယ်အများစုမှာ အာဇာနည်နေ့ နံနက်ပိုင်းက ဖုန်းလိုင်းတွေ တစ်နာရီနီးပါး လိုင်းပြတ်တောက်နေကြောင်း ဒေသခံပြည်သူတွေက ပြောပါတယ်။

ဒီကနေ့ (ဇူလိုင် ၁၉) နံနက် ၈ နာရီဝန်းကျင်မှ လက်ရှိ ၉ နာရီအထိ တစ်နာရီနီးပါး MPT ၊ ATOM ၊ Ooredoo စတဲ့ တယ်လီဖုန်းလိုင်းတွေ ပြတ်တောက်ကာဆက်သွယ်မရကြောင်း ရန်ကုန်မြို့နေပြည်သူတစ်ဦးကပြောပါတယ်။

“ရန်ကုန်မှာ MPT ၊ ATOM ၊ Ooredoo ဖုန်းလိုင်းတွေ မရတော့တာ တစ်နာရီနီးပါး ရှိပြီ။

Public Service Announcement

၈ နာရီလောက်ထဲကမရတာပါ။မအလ အာဇာနည်ကုန်းကို လာလို့ ဖုန်းလိုင်းတွေ မရတာလို့တော့ သိရတယ်။Jumper ဆင်ထားတဲ့ စစ်ကားတွေ ရန်ကုန်မှာ နေရာတိုင်နီးပါး ပတ်နေတာ တွေ့ရပါတယ်။ တချို့ဖုန်းတွေက လိုင်းတစ်တုံးပေါ်ပေမယ့် ဆက်လို့မရဘူး။ Wifi နဲ့တော့ အင်တာနက်တွေ သုံးလို့ရပါသေးတယ်” လို့ရန်ကုန်မြို့နေပြည်သူတစ်ဦးကပြောပါတယ်။

အာဏာသိမ်းစစ်တပ်က ဒီက​နေ့မနက်ပိုင်းကရန်ကုန်မြို့၊ဒဂုံမြို့နယ် အာဇာနည်ကုန်းမှာ အာဇာနည်နေ့ အခမ်းအနားကျင်းပနေပြီး တစ်မြို့လုံးရှိ လမ်းဆုံလမ်းခွနဲ့ နေရာအများအပြားမှာ စစ်တပ်က လုံခြုံရေး တင်းကြပ်နေတဲ့အပြင် ဂျန်မာ တပ်ဆင်ထားတဲ့ စစ်ကားတွေလည်း လှည့်ပတ်သွားလာနေကြောင်း ရန်ကုန်မြို့ရှိ အဌားယာဥ်မောင်းတစ်ဦးက ပြောပါတယ်။

ရန်ကုန်မြို့​​နေပြည်သူတဦးက​တော့”အာဏာရူး မင်းအောင်လှိုင် အာဇာနည်နေ့ အခမ်းအနားကို တက်နေလို့ ဖုန်းလိုင်းတွေ ဖြတ်ထားတာ ထင်ပါတယ်။ သူ့ကို ဒရုန်းနဲ့ပစ်ချမှာ ကြောက်ပြီး တစ်မြို့လုံးနီးပါးကို ဂျန်မာ တပ်ထားတဲ့ စစ်ကားတွေ သွားနေတာပါ။ ဂျပုက လူရှေ့လည်း ထွက်ချင်တယ် ပြည်သူတွေ သူ့ကိုဝိုင်းလုပ်မှာလည်းကြောက်နေတာပါ”လို့ မြို့ပြသပိတ်အဖွဲ့ဝင်လူငယ်တဦးကပြောပါတယ်။

စစ်တပ်အာဏာသိမ်းပြီး​နောက်ပိုင်း စစ်တပ်က မြို့နယ်​ပေါင်း ၁၀၀ ​ကျော်မှာအင်တာနက်ဖြတ်​တောက်မှု​တွေလုပ်ခဲ့တယ်လို့ အင်တာနက်ဖြတ်​တောက်မှု​တွေကို​စောင့်ကြည့်မှတ်တမ်းတင်​နေတဲ့ Access Now က​ဖော်ပြပါတယ် ။

ဒါ့အပြင် အင်တာနက်လွတ်လပ်ခွင့်၊ အင်တာနက်ပိတ်ဆို့မှု​တွေ ကို စောင့်ကြည့်လေ့လာ​နေတဲ့ Myanmar Internet Project (MIP) ရဲ့ ၂၀၂၅ ခုနှစ် အစီရင်ခံစာ မှာ ၂၀၂၅ တစ်နှစ်တည်းမှာစစ်တပ်ကအင်တာနက်/မိုဘိုင်းဝန်ဆောင်မှု ဖြတ်တောက်မှု ၁၀၅ ကြိမ် ကို ပြည်နယ်နဲ့တိုင်း ၁၄ ခုရှိ မြို့နယ် ၇၃ ခု မှာလုပ်ခဲ့တယ်လို့​ဖော်ပြထားပါတယ်။