“ဒီဆွေးနွေးပွဲကထူးခြားတာမရှိဘူး။ပုံမှန်တွေ့နေကြတွေ့ဆုံမှုသာဖြစ်တယ်။အရင်တုန်းက ဆိုရင်ကူမင်းမှာတွေ့ဆုံတာမျိုးတွေရှိတယ်။ဒီတကြိမ်မှာတော့နေပြည်တော်မှာတွေ့ဆုံတာပဲဖြစ်ပါတယ်။”
— TNLAပြောရေးဆိုခွင့်ရှိသူ
ဇူလိုင်-၁၉၊၂၀၂၆။ထားမြတ်/People’s Spring
တအာင်းတပ်မတော်(TNLA)နဲ့ အာဏာသိမ်းစစ်တပ်တို့ နေပြည်တော်မှာ ဒီကနေ့ တွေ့ဆုံဆွေးနွေးခဲ့ကြောင်း TNLပြောရေးဆိုခွင့်ရှိသူ လွေးယေဦးက အတည်ပြုပါတယ်။
အဖွဲ့ ဒုဥက္ကဋ္ဌ တားဂျုတ်ဂျား ဦးဆောင်တဲ့ ကိုယ်စားလှယ်တွေနဲ့စစ်တပ်ဟာဇူလိုင် ၁၉ရက်က စတင်ဆွေးနွေးနေတာလို့ ပြောပါတယ်။
“လောလောဆယ်မှာတော့ ဒီနေ့ဘာတွေ ဆွေးနွေးသွားတယ်နောက်ထပ်ဘာကို ဆွေးနွေးပြီးတော့ ဘာတွေ ရလဒ်တွေထွက်လဲဆိုတာ ကိုယ်စားလှယ်တွေ ပြန်ရောက်မှ ပဲအခြေအနေကို သိနိုင်မှာ ဖြစ်ပါတယ်”လို့လွေးယေဦးက ပြောပါတယ်။
Public Service Announcement
စစ်တပ်နဲ့ အရင်တုန်းက ဆွေးနွေးခဲ့တဲ့ အကြောင်းအရာတွေ၊ TNLA အဖွဲ့ရဲ့ ရပ်တည်ချက်တွေနဲ့ ပတ်သက်ပြီးမေးမြန်းရာ လောလောဆယ် ရှင်းပြနိုင်ခြင်းမရှိသေးဟု ပြောပါတယ်။
“ဒီဆွေးနွေးပွဲက ထူးခြားတာမရှိဘူး။ ပုံမှန်တွေ့နေကြ တွေ့ဆုံမှုသာဖြစ်တယ်။ အရင်တုန်းက ဆိုရင် ကူမင်းမှာ တွေ့ဆုံတာမျိုးတွေရှိတယ်။ ဒီတကြိမ်မှာတော့ နေပြည်တော်မှာ တွေ့ဆုံတာပဲဖြစ်ပါတယ်။” လို့ လွေးယေဦးက ပြောပါတယ်။
TNLAနဲ့ စစ်တပ်ဟာ ၂၀၂၅ အောက်တိုဘာ လကုန်ပိုင်းမှာ အပစ်ရပ်ပြီးနောက် တလတကြိမ် သို့မဟုတ်နှစ်လတကြိမ်ပုံမှန်ဆွေးနွေးတာရှိခဲ့တယ်လို့ ဆိုပါတယ်။
ဆွေးနွေးပွဲပြုလုပ်ရခြင်းနဲ့ပတ်သက်ပြီး တရုတ်အစိုးရရဲ့ ဖိအား ကြုံရတာရှိမရှိ မေးမြန်းရာ အဲဒီကိစ္စ ကြားသိရတာမရှိဟုလွေးယေဦးက ပြောပါတယ်။ TNLA အနေနဲ့ စစ်တပ်ရဲ့ လေကြောင်းစစ်ဆင်ရေးဖိအား၊တရုတ်အစိုးရရဲ့ ဖိအားကြောင့် စစ်တပ်နဲ့ အပစ်ရပ်စဲခဲ့ရကြောင်းအရင်ကထုတ်ဖော်ပြောဆိုထားဖူးပါတယ်။
TNLAနဲ့ ကိုးကန့်တပ် MNDAA တို့ဟာ ၂၀၂၃ နှစ်ကုန်ပိုင်းမှာ မဟာမိတ်တွေနဲ့အတူ ၁၀၂၇ စစ်ဆင်ရေးကို ဖော်ဆောင်ခဲ့ပြီး စစ်တပ်စခန်း ရာချီနဲ့ မြို့တွေများစွာ သိမ်းပိုက်ခဲ့ပါတယ်။
နောက်ပိုင်းမှာတော့ သိမ်းထားတဲ့ မြို့တွေကို စစ်တပ်ထံ ပြန်ပေးပြီး စစ်တပ်နဲ့ အပစ်ရပ်စဲခဲ့ကြသလို နောက်ဆက်တွဲ ဆွေးနွေးမှုတွေ လုပ်ဆောင် နေကြတဲ့ အဖွဲ့အစည်းတွေလည်းဖြစ်ပါတယ်။
