ဇူလိုင် ၂၃၊ ၂၀၂၆။ဟာနာဆန်/People’s Spring
အမြန်ရထားတွေပေါ်မှာ အာဏာသိမ်းစစ်တပ်က ခရီးသည်တွေကို PSMS စနစ်နဲ့ စစ်ဆေးမှုတွေ စတင်လုပ်ဆောင်နေကြောင်း ခရီးသွားအချို့က ပြောပါတယ်။
ဇူလိုင် ၂၁ ရက်ကစပြီး ရန်ကုန်-မန္တလေး အမြန်ရထားနဲ့ ရန်ကုန်-နေပြည်တော် အမြန်ရထား ခရီးစဥ်တွေမှာ အာဏာသိမ်းစစ်ကောင်စီတပ်ဖွဲ့ဝင်တွေက ခရီးသည်တွေကို မှတ်ပုံတင်ထုတ်ပြခိုင်းပြီးနောက် Tablet နဲ့ Person Scrutinization and Monitoring System (PSMS) စနစ် အသုံးပြုပြီး စစ်ဆေးမှုတွေ ပြုလုပ်လာကြောင်း ခရီးသွားပြည်သူအချို့က ပြောပါတယ်။
“ကိုယ့်ရှေ့က အမျိုးသမီးတစ်ယောက်ကိုစစ်တာ။ စာရင်းထဲပါလို့ ခေါ်သွားတယ်”လို့ ရန်ကုန်-နေပြည်တော် ခရီးစဥ်မှာ ကြုံတွေ့ခဲ့ရတဲ့ ခရီးသည်တစ်ဦးက ပြောပါတယ်။
Public Service Announcement
ရန်ကုန်-မန္တလေးနဲ့ ရန်ကုန်-နေပြည်တော် ခရီးစဥ်မှာ ယခုမှစတင်စစ်ဆေးလာတာဖြစ်ပြီး ရန်ကုန်-မော်လမြိုင်ခရီးစဥ်ကတော့ ယခင်ကတည်းက PSMS နဲ့ စစ်ဆေးလေ့ရှိကြောင်း ခရီးသွားအချို့က ပြောပါတယ်။
PSMS စနစ်ဟာ စစ်တပ်ရဲ့ စောင့်ကြည့်ရေး ယန္တရားတစ်ခုဖြစ်ပြီး CDM ဝန်ထမ်းတွေ၊ နိုင်ငံရေးလှုပ်ရှားသူတွေ၊ ဘဏ်အကောင့်ပိတ်ခံထားရတဲ့သူတွေနဲ့ စစ်ကောင်စီဝရမ်းထုတ်ထားတဲ့သူတွေရဲ့စာရင်းကို ပြုစုထားတာဖြစ်ပြီး မှတ်ပုံတင်နံပါတ် ရိုက်လိုက်တာနဲ့ စာရင်းမှာပါနေခဲ့ရင် ဖမ်းဆီးခံရမှာဖြစ်ပါတယ်။ PSMS စနစ်ကြောင့် ဖမ်းဆီးခံရတဲ့ ပြည်သူတွေ အများအပြားရှိခဲ့ပြီး ယခင်က လေဆိပ်နဲ့ မြို့ဝင်မြို့ထွက်ဂိတ်တွေမှာ ခရီးသွားတွေကို စစ်ဆေးနေတာဖြစ်ကာ ယခုအခါ မီးရထားနဲ့ခရီးသွားသူတွေကိုပါ စစ်ဆေးလာတာဖြစ်ပါတယ်။
