လှိုင် ခရီးစဥ်ကိုကန့်ကွက်ကြောင်း ဘန်နာချိတ်ပြီး သပိတ်အဖွဲ့တွေ ဆန္ဒပြ
“မြန်မာပြည်သွေးထွက်သံယိုဖြစ်နေတယ်။ ရက်စက်ကြမ်းကြုတ်တဲ့ အာဏာရှင်နဲ့လက်ဆွဲနှုတ်ဆက်ခြင်းမပြုရ”
— ရန်ကုန်သပိတ်၊ BEM
သြဂုတ်-၇၊၂၀၂၆။နေ့သစ်/People’s Spring
လုံခြုံရေးတင်းကြပ်တဲ့ထိုင်းနိုင်ငံ၊ ဘန်ကောက်မြို့ရှိ စိန့်လူးဝစ် (Saint Louis) BTS မှတ်တိုင်အနီး၊ မြန်မာသံရုံးရှေ့ လူကူးကုန်းတံတားပေါ်မှာ “Myanmar is bleeding. No handshakes with a brutal dictator”လို့ရေးထားတဲ့ စာတန်းပါဘန်နာကို ရန်ကုန်လူထုသပိတ်နှင့်Burmese Exile Movement (BEM)တို့မှ ပူးပေါင်း ချိတ်ဆွဲပြီး အာဏာသိမ်းခေါင်းဆောင် မင်းအောင်လှိုင်ရဲ့ ထိုင်းနိုင်ငံခရီးစဉ်ကို ဆန့်ကျင်ကန့်ကွက်တဲ့ လှုပ်ရှားမှုကိုယနေ့နံနက်ပိုင်းကပြုလုပ်ခဲ့ပါတယ်။
ဘန်နာစာတမ်းပါ စာသားဟာ “မြန်မာပြည် သွေးထွက်သံယို ဖြစ်နေတယ်ရက်စက်ကြမ်းကြုတ်တဲ့ အာဏာရှင်နဲ့လက်ဆွဲနှုတ်ဆက်ခြင်း မပြုရ” လို့ အဓိပ္ပါယ်ရပါတယ်။
Public Service Announcement
ရန်ကုန်လူထုသပိတ်၊ စမ်းချောင်းပင်မသပိတ်၊ စစ်အာဏာရှင်ဆန့်ကျင်ရေးရန်ကုန် အင်အားစုတို့ကထိုင်းအစိုးရကို အချက်(၅)ချက်ပါ တောင်းဆိုချက်ကိုလည်းထုတ်ပြန်ခဲ့ကြောင်းလည်းထပ်မံအသိပေးပါတယ်။
အဆိုပါအချက်(၅)ချက်မှာ
- (၁) အကြမ်းဖက်စစ်တပ်ရဲ့ အတုအယောင်ရွေးကောက်ပွဲ၊ အတုအယောင်သမ္မတကို သံတမန်ရေးရာအရ တရာဝင်မှုပေးခြင်း၊ လူရာသွင်းဆက်ဆံခြင်း လုံးဝမပြုလုပ်ရန်
- (၂) မြန်မာပြည်သူများအပေါ် အကြမ်းဖက်စစ်တပ်ရဲ့ လေကြောင်းအကြမ်းဖက်မှု၊ စစ်ရာဇဝတ်မှုများနှင့် လူ့အခွင့်အရေးချိုးဖောက်မှုများ အပေါ် ထိုင်းနိုင်ငံအပါအဝင် အာဆီယံနိုင်ငံများက တင်းတင်းကျပ်ကျပ် ရပ်တန့်ဖို့ဖိအားပေးရန်
- (၃) နယ်စပ်မျဉ်းတစ်လျှောက် တရားမဝင် ဒုစရိုက်လုပ်ငန်းများ၊ လူကုန်ကူးမှုများနှင့် အွန်လိုင်းငွေလိမ်ဂိုဏ်း (ကျားဖြန့်) များသည် စစ်ကောင်စီနှင့် ၎င်း၏ လက်အောက်ခံ တပ်ဖွဲ့များကအကာအကွယ်ပေးလုပ်ကိုင်နေကြခြင်းဖြစ်သောကြောင့် နယ်စပ်ဒေသလုံခြုံအေးချမ်းတည်ငြိမ်မှု ပျက်ပြားစေသည့်အတွက် အကြမ်းဖက်စစ်တပ်နှင့် ဆက်ဆံရေး လုံးဝဖြတ်တောက်ရန်
- (၄) မြန်မာပြည်သူများ အမှန်တကယ် လိုလားသည့် ဒီမိုကရေစီနှင့် ဖက်ဒရယ်ပြည်ထောင်စု တည်ဆောက်ရေးအတွက် အမျိုးသားညီညွတ်ရေးအစိုးရ (NUG)၊ တိုင်းရင်းသား လက်နက်ကိုင် အဖွဲ့အစည်းများ (EAOs) နှင့် တော်လှန်ရေး အင်အားစုများ၏ အသံကိုသာ ထိုင်းအစိုးရနှင့် အာဆီယံအဖွဲ့တို့က တရားဝင်အသိအမှတ်ပြုပေးရန်
- (၅) ထိုင်းနိုင်ငံတာဝန်ရှိသူများအနေဖြင့် အကြမ်းဖက်စစ်တပ်နှင့် ဆက်သွယ်မှုတစ်စုံတစ်ရာပြုလုပ်ပြီးတိုင်း နယ်စပ်မျဉ်းတစ်လျှောက်နှင့် ထိုင်းရောက် မြန်မာစစ်ဘေးရှောင်များ၊ ရွှေ့ပြောင်းအလုပ်သမားများအပေါ် ဖိနှိပ်ချုပ်ချယ်မှုများ မပြုလုပ်ရန်နှင့် လူ့အခွင့်အရေးနှုန်းစံများကို လေးစားလိုက်နာပါရန် တို့ဖြစ်ပါတယ်။
အာဏာသိမ်းခေါင်းဆောင်ဟာ ထိုင်းအစိုးရရဲ့ ဖိတ်ကြားမှုနဲ့ ထိုင်းနိုင်ငံ၊ဘန်ကောက်မြို့ကို သြဂုတ် ၆ ရက်မှာရောက်လာတာဖြစ်ပြီးဒီကနေ့ (သြဂုတ် ၇) မှာပြန်မှာဖြစ်ပါတယ်။မင်းအောင်လှိုင်ရဲ့ခရီးစဥ်အပေါ် ကန့်ကွက်ရှုတ်ချကြောင်း တောက်ပသောအနာဂါတ်-Bright Future ကွန်ယက်က ဘန်ကောက်မြို့ရှိ ကုလသမဂ္ဂရုံးရှေ့မှာ သြဂုတ် ၆ ရက်က ဆန္ဒပြခဲ့ပါတယ် ။
ထိုင်းနိုင်ငံက တက်ကြွလှုပ်ရှားသူတွေကလည်း စစ်ရာဇဝတ်ကောင် မင်းအောင်လှိုင်ကို မကြိုဆိုကြောင်း UN ရုံးရှေ့ နဲ့ ဘန်ကောက်မြို့လယ်မှာ ယမန်နေ့ညနေပိုင်းက ဆန္ဒပြခဲ့ကြပါတယ် ။ ထိုင်းအဓိကအတိုက်အခံပါတီပြည်သူ့ပါတီ-PP ကလည်း မင်းအောင်လှိုင်ကိုဖိတ်ကြားခဲ့တဲ့အတွက် ထိုင်းနိုင်ငံရဲ့ပုံရိပ်ကိုထိခိုက်စေကြောင်းကန့်ကွက်ထားပါတယ်။
