ထိုင်းမှာ မြန်မာလုပ်သားနှစ်ဦး က​​မ္ဘာဒီယားနဲ့မှားပြီး ထိုးကြိတ်ခံရ

ဇူလိုင်-၂၅၊၂၀၂၅။ခွန်ဖ/People’s Spring

ထိုင်း-ကမ္ဘောဒီးယားနယ်စပ်စစ်ရေးပဋိပက္ခကြောင့်ထိုင်းနိုင်ငံသားအချို့က ကမ္ဘောဒီးယားလုပ်သားတွေကို မောင်းထုတ်တာတွေ၊ ရိုက်နှက်တာတွေလုပ်နေပြီး ဘန်ကောက်မြို့မှာ မြန်မာလုပ်သားနှစ်ဦး က​​မ္ဘာဒီယားနဲ့မှားပြီး ထိုးကြိတ်ခံလိုက်ရပါတယ်။

ထိုင်းနိုင်ငံနေရာအချို့မှာ ထိုင်းအမျိုးသားရေးသမားတွေနဲ့ ထိုင်းလူမျိုးအချို့က ကမ္ဘောဒီးယားလုပ်သားတွေကို မောင်းထုတ်တာ၊ ရှာဖွေရိုက်နှက်တာတွေ လုပ်နေတာကြောင့် မြန်မာလုပ်သားတွေအနေနဲ့ အထူးသတိထားနေထိုင်ကြဖို့လည်း ထိုင်းနိုင်ငံရောက်မြန်မာလုပ်သားအရေးကူညီဆောင်ရွက်နေသူတွေက ပြောပါတယ်။

ဒီကနေ့(ဇူလိုင် ၂၅ရက်)မှာ ဘန်ကောက်မြို့က ဈေးတစ်ခုမှာ ထိုင်းမျိုးချစ်ဆိုသူတွေက မြန်မာလုပ်သားနှစ်ဦးကို ကမ္ဘောဒီးယားနိုင်ငံသားထင်မှတ်ပြီး ထိုးကြိတ်ခဲ့တာဖြစ်ပါတယ်။

Public Service Announcement

အဲဒီ ထိုင်းမျိုးချစ်တွေ ထိုးကြိတ်ခဲ့တဲ့ CCTVရုပ်သံဖိုင်ဟာ ထိုင်းနိုင်ငံရဲ့ လူမှုကွန်ရက်အသုံးပြုသူတွေကြားမှာ ပျံ့နေပါတယ်။

မြန်မာနဲ့ ကမ္ဘောဒီးယားလုပ်သားတွေဟာ သဏ္ဌာန်ဆင်တူတာကြောင့် မြန်မာနိုင်ငံသားဆိုတာ သိသာစေရန်သနပ်ခါးလိမ်းထားကြလို့လည်းထိုင်းရောက်မြန်မာတွေ အချင်းချင်း​ပြောနေကြပါတယ်။

ထိုင်းရောက်မြန်မာလုပ်သားတစ်ဦးက “မဖြစ်တော့ဘူး မြန်မာမှန်းသိအောင်သနပ်ခါးလိမ်းထားမှ ရတော့မယ်”ဆိုပြီး သနပ်ခါးလိမ်းထားတဲ့ ရုပ်ပုံနဲ့ လူမှုကွန်ရက်မှာတင်ထားပါတယ်။

ဒီကနေ့မှာ ကမ္ဘောဒီးယားလုပ်သားတွေ တိုက်ခိုက်ခံရတဲ့ ရုပ်သံဖိုင်တစ်ခုလည်း လူမှုကွန်ရက်မှာ ပျံံနှံ့နေပြီးကမ္ဘောဒီးယားလုပ်သားတွေနေရပ်ပြန်ဖို့ထိုင်းအာဏာပိုင်တွေက လုံခြုံရေးယူပေးခဲ့ရပါတယ်။

ထိုင်းနိုင်ငံရောက်မြန်မာလုပ်သားအရေးကူညီဆောင်ရွက်နေသူတွေကထိုင်း-ကမ္ဘောဒီးယား နယ်စပ် စစ်ရေးပဋိပက္ခနဲ့ပတ်သက်လို့ မြန်မာလုပ်သားတွေအနေနဲ့ သတိထားနေထိုင်ကြဖို့နဲ့ ဝေဖန်ပြောဆိုတာတွေ မလုပ်ကြဖို့ သတိပေးပြောကြားလိုက်ပါတယ်။

ဒါ့အပြင် မြန်မာတချို့က ဝေဖန်ပြောဆိုမှုတွေ လုပ်နေတဲ့အပေါ်လည်း မလုပ်ကြဖို့ ထိုင်းရောက်မြန်မာလုပ်သားအရေးကူညီဆောင်ရွက်နေသူတွေက အကြံပြုထားပါတယ်။

အမျိုးသားညီညွတ်ရေအစိုးရ(NUG)နိုင်ငံခြားရေးဝန်ကြီးဌာနက လက်ရှိ စစ်ရေးအခြေအနေတင်းမာနေတဲ့ ဒေသတွေမှာ ရောက်ရှိနေသူ၊ ခရီးသွားလာနေသူ၊အလုပ်လုပ်ကိုင်နေသူမြန်မာနိုင်ငံသားများအနေနဲ့ မိမိတို့ ရောက်ရှိနေတဲ့ နိုင်ငံရှိ သက်ဆိုင်ရာ နိုင်ငံ့လုံခြုံရေးတာဝန်ရှိသူများရဲ့ ဘေးအန္တရာယ်ဆိုင်ရာအရေးပေါ်အခြေအနေ ညွှန်ကြားချက်များ သတိပေးချက်​တွေကို လိုက်နာဆောင်ရွက်ကြဖို့ နှိုးဆော်ထားပါတယ်။ ဒါ့အပြင် ထိုင်း၊ ကမ္ဘောဒီးယားနဲ့ မြန်မာပြည်သူများမှာ လုပ်ငန်းခွင်များအတွင်း အတူတကွ လုပ်ကိုင် နေထိုင်ကြတာဖြစ်လို့မြန်မာပြည်သူများအနေနဲ့ ဂရုတစိုက်သတိပြုနေထိုင်ကြဖို့ NUG နိုင်ငံခြားရေးဝန်ကြီးဌာနက သတိပေးထားပြီး ပဋိပက္ခကို ပိုမိုတင်းမာစေမယ့် ပြောဆိုရေးသားမှုများ၊ လူမှုကွန်ရက်မှာ မျှဝေခြင်းများကို ဆင်ခြင်ကြဖို့ တိုက်တွန်းထားပါတယ်။

အာဏာသိမ်းစစ်ကောင်စီရဲ့ မြန်မာသံရုံးကလည်းထိုင်းနိုင်ငံရောက်မြန်မာနိုင်ငံသားများအနေနဲ့ ထိုင်းနဲ့ ကမ္ဘောဒီးယား နယ်စပ်ဒေသကို ခရီးသွားလာတာ ရှောင်ရှားကြဖို့နဲ့ နှစ်နိုင်ငံအကြား ဖြစ်ပေါ်နေတဲ့ ပဋိပက္ခများအကြား မလိုလားအပ်တဲ့ ဖြစ်ရပ်တွေ ဖြစ်ပေါ်ခြင်း မရှိစေဖို့ လုံခြုံရေးကို သတိပြုကြဖို့ ဇူလိုင် ၂၅ရက်မှာထုတ်ပြန်ထားပါတယ်။

လက်ရှိနှစ်နိုင်ငံ နယ်စပ်စစ်ရေးပဋိပက္ခဖြစ်ပွားနေတဲ့ ထိုင်းနိုင်ငံနယ်စပ်က ဆီဆကစ်၊ကျန်ထဘူရီနဲ့ ရယောင်းခရိုင်မှာ မြန်မာနဲ့ ကမ္ဘောဒီးယားလုပ်သားတွေ အများစုလုပ်ကိုင်ပြီး မြန်မာလုပ်သားက ၂ သိန်းကျော်လောက်ရှိနေတယ်လို့ ထိုင်းရောက်မြန်မာလုပ်သားအရေးကူညီဆောင်ရွက်နေသူတွေက ခန့်မှန်းပါတယ်။