ထိုင်းထီစျေးကွက် ပြည်တွင်းမှာ ပိုတွင်ကျယ်လာ

အောင်ဘာလေထီကို NUG အစိုးရဖြတ်သိမ်းကြောင်း ကြေညာပြီးချိန်ကစလို့ ပြည်တွင်းက ထီဝါသနာအိုးတွေ ထိုင်းထီဘက်ကိုလှည့်လာလို့ အွန်းလိုင်း Page တွေ Group တွေဖွင့်ပြီးတွင်တွင်ကျယ်ကျယ်ရောင်းလာနေကြပါတယ်။

ထီကိုပဲ စီးပွားဖြစ်ရောင်းနေကြတာဖြစ်ပြီး တစ်ချို့က ငွေလွှဲလုပ်ငန်းတွေနဲ့တွဲလုပ်တာဖြစ်တယ်လို့ ထီလက်မှတ်တွေ အရောင်းအဝယ်လုပ်နေသူတစ်ဦးက ပြောပါတယ်။

ထိုင်းထီလက်မှတ်တွေကို အွန်လိုင်းကနေရောင်းချတာဖြစ်ပြီး မြန်မာငွေ ၆၀၀၀ ကျပ်ကျော်ကနေ ၇၀၀၀ ကျပ်ကျော်အထိ နံပတ်လှတာတာအပေါ်မူတည်ပြီး​စျေးသတ်မှတ်ရောင်းကြတယ်လို့ ပြောပါတယ်။

ထိုင်းထီက တစ်လနှစ်ကြိမ်ဖွင့်တာဖြစ်ပြီးတော့ အနိမ့်ဆုံးဆု ဘတ် ၂၀၀၀ ကနေ အမြင့်ဆုံးဆု ဘတ် ၆ သန်းအထိရှိပြီး မြန်မာတွေလည်းပေါက်ကြတယ်လို့ “ဘန်ကောက်သွားမယ်” Page က မနီလာဝင်းက အခုလိုပြောပါတယ်။

Public Service Announcement

ဒါကြောင့်လည်းပြည်တွင်းမှာ Online Shop Page တွေမှာ ထိုင်းထီကို လက်လီလက်ကားအရောင်းပိုတွင်ကျယ်လာကြတာဖြစ်ပါတယ်။

” ထိုင်းထီက ထိုးကြတယ်။ ရောင်းလည်းရောင်းရတယ်။ ကျွန်မက တစ်စောင် ၆၈၀၀ ကျပ်နဲ့ရောင်းတယ်” လို့ ထိုင်းထီကိုမကြာသေးခင်ကမှ လက်လီစရောင်းပြီး ခုလက္ကားပါ ဖြန့်ဖို့လုပ်နေတဲ့ အမျိုးသမီးတစ်ဦးက ပြောပါတယ်။

NUG က ရောင်းတဲ့ နွေဦးထီကိုလည်း တစ်ချိန်ထဲမှာပဲ ထိုးနေကြတာရှိပါတယ်။

NUG က အောင်လံလွှင့်ချီနွေဦးထီကို သြဂုတ်လ ၁၅ ရက်က စတင်စမ်းသပ်ရောင်းချခဲ့ပြီး စရောင်းတဲ့ရက်မှာပဲ ၁ နာရီအတွင်း သတ်မှတ်စောင်ရေ ကုန်သွားခဲ့ပါတယ်။

အောင်ဘာလေထီကို အာဏာမသိမ်းခင် ဇန်နဝါရီလအထိ ကျပ်သိန်းတစ်သောင်းခွဲဆုအထိဖွင့်နိုင်ခဲ့ပြီး သြဂုတ်လ ၂၁ ရက်မှာ NUG က ဖျက်သိမ်းကြောင်းကြေညာပြီးတဲ့နောက် ကျပ်သိန်းတစ်သောင်းခွဲ မဖွင့်နိုင်တော့တဲ့အပြင် ထီဖွင့်ပွဲရက်ရွှေ့ရတာတွေအထိ ဖြစ်လာခဲ့ပါတယ်။

နွေဦးထီ အွန်လိုင်းက ရောင်းချပြီး ပြည်သူတွေအပြည့်အဝအားပေးနေချိန်မှာ အောင်ဘာလေထီကို အွန်လိုင်းကနေ ရောင်းချဖို့ တင်ဒါခေါ်တာတွေခေါ်ပြီး စစ်ကောင်စီက ကြိုးစားလာတာရှိပါတယ်။

ခုနောက်ပိုင်းမှာ ထိုင်းထီတင်မက၊ စင်ကာပူထီ၊ ကိုရီးယားထီတွေကိုပါ တော်တော်လေးတွင်တွင်ကျယ်ကျယ်ရောင်းချလာတာတွေရှိတယ်လို့ အွန်လိုင်းအရောင်းအဝယ်လုပ်နေသူတစ်ဦးကပြောပါတယ်။