မေလ ၁ ရက်က ယူတာပရာဒက်ရှ်မှာ ပွဲပျက်ခဲ့တဲ့ မင်္ဂလာဆောင် သတင်းဟာ အခု ရက်ပိုင်းအတွင်း အိန္ဒိယ လူမှုကွန်ရက် မီဒီယာတွေပေါ်မှာ လူပြောများလာခဲ့ပါတယ်။ သတို့သားနဲ့ သတို့သမီးတို့ဟာ အောင်သွယ်ရဲ့ စေ့စပ်ပေးမှုနဲ့ မင်္ဂလာဆောင်ခဲ့ကြတာလို့ ဆိုပါတယ်။
ဒါပေမဲ့ သတို့သားဖက်က သူ့ရဲ့ ပညာအရည်အချင်း နောက်ခံကို ရှင်းရှင်းလင်းလင်း အသိမပေးခဲ့ပါဘူး။ ဒီကိစ္စအပေါ် သံသယ ရှိလာတဲ့ သတို့သမီးက မင်္ဂလာဆောင်မှာပဲ သတို့သားကို ပညာစမ်းဖို့ ဆုံးဖြတ်ခဲ့ပါတယ်။ သတို့သမီးက နှစ်အလီ ဆိုခိုင်းတဲ့အခါ သတို့သားလောင်းက အထစ်အထစ် ဖြစ်နေပြီး အဖြေနှစ်ခု မှားသွားပါတယ်။ အဲဒီတော့ သတို့သမီးက မင်္ဂလာပွဲကို ဖျက်ပြီး အခမ်းအနားကနေ ထွက်ခွာသွားခဲ့ပါတယ်။
သတို့သမီးရဲ့ ဝမ်းကွဲ ညီအစ်မ တစ်ယောက်ကတော့ အခြေခံ သင်္ချာလောက်တောင် မတတ်တဲ့သူနဲ့ သူ့အနာဂတ်ကို မဖြတ်သန်းဖို့ သတို့သမီးက ဆုံးဖြတ်ခဲ့တာလို့ ပြောပါတယ်။ ဒီဆုံးဖြတ်ချက်အတွက်လည်း သတို့သမီးကို ချီးကျူးရမယ်လို့ သူက ဆိုပါတယ်။
အောင်သွယ်ကနေတဆင့် နားဖောက် ကြောင်းလမ်းချိန်က သတို့သားဟာ ပညာတတ် တစ်ယောက်လို့ သူ့မိသားစုက လိမ်လည်ခဲ့တယ်လို့လည်း သတို့သမီးဖက်က စွပ်စွဲခဲ့ပါတယ်။ မင်္ဂလာပွဲ ပျက်သွားတဲ့နောက် နှစ်ဖက် မိသားစုက လက်ခံထားတဲ့ လက်ဆောင် ပစ္စည်းတွေကို လက်ဖွဲ့သူတွေဆီ ပြန်လည် ပို့ဆောင်ခဲ့တယ်လို့လည်း သိရပါတယ်။