Connect with us

Hi, what are you looking for?

LuduNwayOo

နိုင်ငံတကာ

ဂါဇာမှာ စစ်ဆင်ရေးအရှိန် ဆက်မြှင့်သွားမယ်လို့ အစ္စရေး ဝန်ကြီးချုပ်ပြော

နိုင်ငံတကာ ဖိအားပေး ကန့်ကွက်မှုတွေ ရှိနေပေမယ့်လည်း ဂါဇာ ကမ်းမြှောင် ဒေသမှာ အစ္စရေးရဲ့ စစ်ဆင်ရေး အရှိန် ဆက်ပြီး မြှင့်တင်သွားဦးမယ်လို့ ဝန်ကြီးချုပ် ဘင်ဂျမန် နေတန်ညာဟူက ပြောကြားသွားပါတယ်။

အခု သီတင်းပတ် အစောပိုင်းကစလို့ အစ္စရေး စစ်တပ်နဲ့ ဂါဇာအခြေစိုက် ပါလက်စတိုင်း လက်နက်ကိုင် တပ်ဖွဲ့ ဟားမားစ်တို့ကြား တိုက်ပွဲတွေ ပြင်းထန်နေပြီး လူပေါင်း ရာနဲ့ချီ သေဆုံးခဲ့ပါတယ်။ ဟားမားစ်တွေက အစ္စရေးပိုင် မြို့တွေဆီ ဒုံးကျည်တွေ အမြောက်အမြားနဲ့ လှမ်းပစ်ခဲ့ပြီး အစ္စရေးကလည်း လက်နက်ကြီးတွေ၊ တိုက်လေယာဉ်တွေနဲ့ အပြင်းအထန် လက်တုံ့ပြန်ခဲ့ပါတယ်။ ဂါဇာ နယ်စပ်မှာလည်း အစ္စရေး တင့်ကားတပ်တွေ စုရုံးပြီး အသင့်အနေအထား ပြင်ဆင်ထားတာ တွေ့ရပါတယ်။

ဟားမားစ်တွေ ပစ်ခတ်တဲ့ ဒုံးကျည်တွေကို အစ္စရေးက ကြားဖြတ် ဟန့်တားပေမယ့် တဲလ်အဗစ်ဗ် မြို့ထဲမှာ ဒုံးကျည်တချို့ ကျရောက် ပေါက်ကွဲတာကြောင့် ဒေသခံတွေက ဗုံးခိုကျင်းတွေဆီ အပြေးအလွှား သွားရောက် တိမ်းရှောင်ခဲ့ရပါတယ်။ တစ်ဖက်မှာလည်း အစ္စရေးလေတပ်ဟာ ဂါဇာမှာ ရှိနေတဲ့ လူနေဧရိယာတွေကိုပါ မရှောင်ဘဲ တိုက်ခိုက်တဲ့အတွက် ပြစ်တင် ဝေဖန်မှုတွေ ခံနေရပါတယ်။

အမေရိကန် သမ္မတ ဂျိုးဘိုင်ဒန်ကတော့ ဝန်ကြီးချုပ် နေတန်ညာဟူရော၊ ပါလက်စတိုင်း သမ္မတ မာမွတ် အဘက်စ်ကိုပါ ဖုန်းနဲ့ ဆက်သွယ်ပြီး နှစ်ဖက်စလုံး အခြေအနေကို ထိန်းထိန်းသိမ်းသိမ်း လုပ်ဆောင်ကြဖို့ တိုက်တွန်းခဲ့ပါတယ်။ လက်ရှိ အချိန်ထိ နှစ်ဖက် ပဋိပက္ခကြောင့် ဂါဇာမှာ ကလေး ၄၁ ဦး အပါအဝင် ၁၄၈ ဦးထက်မနည်း သေဆုံးပြီး အစ္စရေးမှာတော့ ကလေး ၂ ဦး အပါအဝင် အသေအပျောက် ၁၀ ဦး ရှိလာပြီလို့ သိရပါတယ်။

ဂါဇာမှာ သေပျောက်နှုန်း မြင့်မားနေတဲ့အတွက် အစ္စရေးရဲ့ ထိုးစစ်တွေ ရပ်တန့်ဖို့ နိုင်ငံတကာ တောင်းဆိုသံတွေ ကျယ်လောင်လာပေမယ့် နေတန်ညာဟူကတော့ အစ္စရေးဟာ လိုအပ်နေသမျှ ကာလပတ်လုံး စစ်ဆက်တိုက်နေမယ်လို့ တုံ့ပြန်ခဲ့ပါတယ်။

ဒီပဋိပက္ခမှာ တကယ်တမ်း အပြစ်ရှိတာဟာ အစ္စရေး မဟုတ်ကြောင်း၊ အစ္စရေးကို ရန်လာစတဲ့ အဖွဲ့အစည်းသာ ဖြစ်ကြောင်း နေတန်ညာဟူက ပြောကြားသွားပါတယ်။ အခု သီတင်းပတ်ကုန်က ဂါဇာစီးတီးမှာ အစ္စရေးရဲ့ လေကြောင်း တိုက်ခိုက်မှုကြောင့် ဒုက္ခသည် စခန်းတစ်ခုမှာ နေထိုင်တဲ့ မိသားစုတစ်ခုက လူ ၁၀ ဦးသေဆုံးခဲ့ပါတယ်။ အသက် ၅ လအရွယ် အိုမာအယ်လ်ဟာဒီဒီ တစ်ဦးတည်းသာ အသက်ရှင်ခဲ့ပြီး သူ့မိခင်၊ မွေးချင်းညီအစ်ကိုတွေ၊ အဒေါ်နဲ့ တခြား ဝမ်းကွဲ ညီအစ်ကိုတွေ သေဆုံးသွားခဲ့ပါတယ်။

အစ္စရေး စစ်တပ်ကတော့ ပါလက်စတိုင်းဖက်က ဒုံးကျည်နဲ့ ပစ်ခတ်မှုတွေ မရပ်သေးဘဲ လက်ရှိ အချိန်ထိ ဒုံးကျည် အစင်း ၃၀၀ နီးပါးလောက်ကို ကြားဖြတ် ဟန့်တား ပစ်ချခဲ့ရကြောင်း ပြောပါတယ်။ ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က လူနေ အဆောက်အအုံတွေ ပစ်မှတ်ထား တိုက်ခိုက် ခံနေရတဲ့ အခြေအနေအပေါ် အလွန်အမင်း စိတ်ပျက်မိကြောင်း ပြောကြားခဲ့ပါတယ်။ ဒါပေမဲ့ ဂူတာရက်စ် ကိုယ်တိုင်ကလည်း အစ္စရေး-ပါလက်စတိုင်း စစ်ပွဲတွေ ဖြစ်ပွားနေတဲ့အချိန် ပြဇာတ် သွားကြည့်နေတဲ့အတွက် ဝေဖန်မှုတွေနဲ့ ရင်ဆိုင်ခဲ့ရပါသေးတယ်။

You May Also Like

ဗီဒီယို

ရွေးကောက်ပွဲ ကော်မရှင်က မဲရေတွက်မှုတွေ ပြီးဆုံးကြောင်း တရားဝင် ကြေညာပြီးတဲ့အခါ အစ္စရေး ဝန်ကြီးချုပ် အိုင်ဆက် ဟာဇော့က နေတန်ညာဟုကို ဖိတ်ခေါ်ပြီး ၄၂ ရက်အတွင်း အစိုးရသစ် ဖွဲ့စည်းဖို့ တာဝန်ပေးအပ်သွားမှာ ဖြစ်ပါတယ်။

နိုင်ငံတကာ

လာပစ်ဒ်ဟာ ယာယီ ဝန်ကြီးချုပ် သဘောမျိုး ဇူလိုင် ၁ ရက်မှာ စတင် တာဝန်ယူပြီး နိုဝင်ဘာ ၁ ရက်မှာတော့ အစ္စရေး ရွေးကောက်ပွဲ အသစ်ကို ကျင်းပမှာ ဖြစ်ပါတယ်။ ဘန်းနက်ကတော့ သူဟာ အဲဒီ ရွေးကောက်ပွဲမှာ မယှဉ်ပြိုင်တော့ဖို့ ဆုံးဖြတ်ထားကြောင်း အတည်ပြုခဲ့ပါတယ်။

နိုင်ငံတကာ

အီရန်နဲ့ စစ်ရေး ပူးပေါင်း ဆောင်ရွက်မှုတွေကို လျှော့မချရင် သမ္မတ နန်းတော်တွေကို ဗုံးကြဲမယ်လို့ အစ္စရေးက ဆီးရီးယား သမ္မတ ဘာရှာ အာဆတ်ဒ်ကို ခြိမ်းခြောက်ထားကြောင်း သတင်းတွေ ထွက်ပေါ်လာပါတယ်။

ဗီဒီယို

အစ္စရေး စစ်တပ် ကွန်မန်ဒိုဟောင်း တစ်ဦးဖြစ်တဲ့ သန်းကြွယ်သူဌေး ဘန်းနက်တ်က သူ့အစိုးရဟာ မူဝါဒပိုင်း အငြင်းပွားစရာတွေ ရှိခဲ့တယ် ဆိုရင်တောင် နိုင်ငံရဲ့ စီးပွားရေး တိုးတက်အောင်၊ အလုပ်လက်မဲ့ ပြဿနာ လျော့ပါးအောင် ထိထိရောက်ရောက် လုပ်ဆောင်နိုင်ခဲ့ကြောင်း ကာကွယ် ပြောဆိုထားပါတယ်။