မေလ ၁၄ ရက် ညပိုင်းက နိုင်ငံ အလယ်ပိုင်း ဝူဟန်မြို့မှာ လေဆင်နှာမောင်း တိုက်ခဲ့တာကြောင့် လူ ၈ ဦးသေပြီး အရှေ့ဖျားက ရှန်ဇီးမြို့မှာလည်း နောက်ထပ် လေဆင်နှာမောင်း တစ်ခုကြောင့် လူ ၄ ဦး သေဆုံးခဲ့ကြောင်း ဒေသဆိုင်ရာ အာဏာပိုင်တွေက အသီးသီး ထုတ်ပြန်ပါတယ်။
ရှန်ဇီးမှာ တိုက်ခတ်တဲ့ လေဆင်နှာမောင်းကြောင့် အိမ်နဲ့ စက်ရုံတွေ ထိခိုက် ပျက်စီးခဲ့ကြပါတယ်။ ရှန်ဇီးဟာ အရှေ့ဖက် ကမ်းရိုးတန်းက အဓိက စီးပွားရေး ဗဟိုချက် မြို့ကြီးဖြစ်တဲ့ ရှန်ဟိုင်းနဲ့ မနီးမဝေးမှာ တည်ရှိနေပါတယ်။
ကုန်းတွင်းပိုင်း မြို့ဖြစ်တဲ့ ဝူဟန်မှာ တိုက်ခတ်တဲ့ လေဆင်နှာမောင်းကြောင့် အိမ်ခြေ ၃၀ နီးပါးလောက်ထိ ပြိုကျခဲ့ပါတယ်။ လေဆင်နှာမောင်း နှစ်ခုကြောင့် ဒဏ်ရာရသူ ၃၀၀ လောက် ရှိခဲ့ပြီး အများစုကတော့ အခြေအနေ မဆိုးကြပါဘူး။ ဝူဟန်က ဆောက်လုပ်ရေး လုပ်ငန်းခွင် တစ်ခုမှာ ဆင်ထားတဲ့ ကရိန်းကြီး နှစ်ခုမှာလည်း ထိခိုက် ပျက်စီးမှုတွေ ရှိခဲ့ကြောင်း သိရပါတယ်။
ပြည်တွင်း မီဒီယာတွေက ဖော်ပြထားတဲ့ ဓာတ်ပုံတွေမှာတော့ ဝူဟန်မြို့က ပြိုကျ အဆောက်အအုံ တစ်ခုမှာ ကယ်ဆယ်ရေး အဖွဲ့တွေ အလုပ်ရှုပ်နေကြတာကို တွေ့ရပါတယ်။ ဝူဟန်ဟာ Covid-19 ကပ်ရောဂါဆိုးကြီး အစပြု ဖြစ်ပွားလာတဲ့ မြို့လည်း ဖြစ်ပါတယ်။
တရုတ်မှာ လေဆင်နှာမောင်းတွေ သိပ်များများစားစား ဖြစ်ပေါ်လေ့ မရှိပါဘူး။ ၂၀၁၉ ခုနှစ်၊ ဇူလိုင်လတုန်းကတော့ လျောင်နင်း ဒေသမှာ လေဆင်နှာမောင်း တိုက်ပြီး ၆ ဦး သေဆုံးခဲ့သလို နောက်တစ်လ အကြာ ဟိုင်နန်ကျွန်းမှာ နောက်ထပ် လေဆင်နှာမောင်းကြောင့် လူ ၈ ဦး အသက် ဆုံးရှုံးခဲ့ဖူးပါတယ်။
၂၀၁၆ တုန်းက လေဆင်နှာမောင်း တစ်ခုနဲ့ နောက်ဆက်တွဲ မိုးသီးမုန်တိုင်းတွေကြောင့် အရှေ့ပိုင်းက ကျန်းဆု ဒေသမှာ လူပေါင်း ၉၈ ဦး သေဆုံးခဲ့ပါတယ်။
