အင်ဒိုနီးရှားမှာ လူ ၂၀၀ နီးပါး လိုက်ပါသွားတဲ့ ကူးတို့ရေယာဉ် မီးလောင်

KM Karya Indah လို့ နာမည်ပေးထားတဲ့ ကူးတို့ရေယာဉ်ဟာ အင်ဒိုနီးရှား အရှေ့မြောက်ပိုင်းက လူနေ ကျဲပါးတဲ့ ဆာနာနာကျွန်းဆီ ခုတ်မောင်းချိန်မှာ မီးလောင်မှုနဲ့ ကြုံခဲ့ရတာပါ။ မေလ ၂၉ ရက်က ဖြစ်စဉ်မှာ ခရီးသည်တွေနဲ့ ရေယာဉ် အမှုထမ်းတွေဟာ ရေပေါ် ပေါ်နိုင်မယ့် ပစ္စည်းတွေကို ဆုပ်ကိုင်ထားရင်း ရေထဲ ခုန်ချခဲ့ကြရပါတယ်။

အနီးအနားမှာ ရှိနေတဲ့ တံငါလှေတွေကလည်း ကယ်ဆယ်ရေး ကဏ္ဍမှာ အဆောတလျင် ပူးပေါင်း ကူညီခဲ့တဲ့အတွက် ကူးတို့ ရေယာဉ်ပေါ် ပါလာသူ အားလုံးကို အသက်ရှင်လျက် ကယ်ဆယ်နိုင်ခဲ့ကြောင်း ကမ်းခြေ လုံခြုံရေး တပ်ဖွဲ့က ပြောပါတယ်။ ရေယာဉ်ပေါ်မှာ ကလေး ၂၂ ဦး အပါအဝင် ခရီးသည် ၁၈၁ ဦးနဲ့ အမှုထမ်း ၁၄ ဦး လိုက်ပါလာခဲ့ကြပါတယ်။

ကူးတို့ရေယာဉ်ဟာ တာနက်တီ ဆိပ်ကမ်းက ခွာလာပြီး ၁၅ မိနစ်လောက်အကြာ အင်ဂျင်ခန်းကနေ မီးစလောင်ခဲ့တယ်လို့ ယုံကြည်ရပါတယ်။ အင်ဒိုနီးရှားဟာ ကျွန်းစုနိုင်ငံ တစ်ခုဖြစ်ပြီး ရေလမ်းခရီးကို အထူးတလည် အားကိုးနေရသလို တစ်ဖက်မှာလည်း ရေကြောင်း မတော်တဆမှုတွေနဲ့ မကြာခဏ ကြုံတွေ့ခဲ့ဖူးပါတယ်။