ကမ္ဘာလုံးဆိုင်ရာ ကျန်းမာရေး အေဂျင်စီ အသစ်တစ်ခု ပေါ်ထွန်းလာရေးအတွက် ဦးဆောင် တိုက်တွန်းသွားမယ်လို့ အင်ဒိုနီးရှား သမ္မတ ဂျိုကို ဝီဒိုဒိုက ပြောကြားသွားပါတယ်။
G20 ညီလာခံမှာ အင်ဒိုက အလှည့်ကျ ဥက္ကဋ္ဌ တာဝန်ယူမယ့် အချိန်မှာ အခုကိစ္စကို အလေးပေး ဆွေးနွေးဖို့ စီစဉ်ထားကြောင်း ဂျိုကိုကိုက ကမ္ဘာ့စီးပွားရေး အွန်လိုင်း ဖိုရမ်မှာ အတည်ပြုခဲ့ပါတယ်။ အဲဒီ အေဂျင်စီ အသစ်ဟာ တစ်ကမ္ဘာလုံးရဲ့ ကျန်းမာရေး ကိုယ်ခံအားကို ပိုမို မြှင့်တင်ပေးမှာ ဖြစ်သလို အကျပ်အတည်း ကာလတွေမှာလည်း ပိုပြီး ထိထိရောက်ရောက် တုံ့ပြန်နိုင်စွမ်း၊ ပိုပြီး တာဝန်ယူနိုင်စွမ်းမျိုး ရှိစေချင်တယ်လို့ သူက ဆိုတယ်။
G20မှာ အင်ဒိုနီးရှားရဲ့ ဥက္ကဋ္ဌ တာဝန်ယူမှုဟာ ကမ္ဘာ့ကျန်းမာရေးကဏ္ဍ တည်ဆောက်မှုကို အားဖြည့်နိုင်ရေး တောင်းဆို တိုက်တွန်းဖို့ အဓိက ဖြစ်လာနိုင်ကြောင်း၊ ဒီအတွက်လည်း တစ်ကမ္ဘာလုံးနဲ့ သက်ဆိုင်တဲ့ အေဂျင်စီတစ်ခု ရှိဖို့လိုကြောင်း ဝီဒိုဒိုက ဖိုရမ်မှာ ထည့်သွင်း ဆွေးနွေးသွားပါတယ်။
ကမ္ဘာ့ကျန်းမာရေး အဖွဲ့ကြီး (WHO)ရဲ့ စီမံ ဆောင်ရွက်မှုတွေဟာ ကိုဗစ် ကပ်ရောဂါ ကာလမှာ အကန့်အသတ်တွေ အရမ်းများနေတာ တွေ့နိုင်ကြောင်းလည်း သူက ထောက်ပြပါတယ်။ ကမ္ဘာကြီးအတွက် လိုအပ်တဲ့ မဟာဗျူဟာ ရှုထောင့် တော်တော်များများမှာ WHOရဲ့ အခန်းကဏ္ဍက အလျဉ်မီအောင် ဖြည့်ဆည်းနိုင်ဖို့ ခက်ခဲနေဆဲလို့ အင်ဒို သမ္မတက ပြောပါတယ်။ အင်ဒိုမှာ ကိုဗစ်ကြောင့် သေဆုံးသူ ၁၄၄၀၀၀ ကျော် ရှိခဲ့ပါတယ်။
Public Service Announcement
အင်ဒိုနီးရှားဟာ G20 ညီလာခံရဲ့ ဥက္ကဋ္ဌ တာဝန်ကို အခုနှစ်မှာ ပထမဆုံးအကြိမ် ရယူခဲ့တာပါ။ ညီလာခံရဲ့ အဓိက ရည်မှန်းချက်ဟာ ကပ်ရောဂါ ကာလအလွန် စီးပွားရေး ပြန်လည် ထူထောင်မှု မူဝါဒတွေကို လေးလေးနက်နက် ဆွေးနွေးနိုင်ရေး ဖြစ်ကြောင်းလည်း သိရပါတယ်။
