စစ်ရိပ်စစ်ငွေ့တွေ ယှက်သန်းလာတဲ့နောက် ယူကရိန်းမှာ ရှိနေတဲ့ အမေရိကန် နိုင်ငံသားတွေ အားလုံး ထွက်ခွာလာကြဖို့ အမေရိကန် သမ္မတ ဂျိုးဘိုင်ဒန်က တိုက်တွန်းလိုက်ပါတယ်။
တကယ်လို့ ယူကရိန်းကို ရုရှားတပ်တွေက ဝင်တိုက်ပြီဆိုရင် အဲဒီအချိန်ကျမှ ပိတ်မိနေတဲ့ အမေရိကန် နိုင်ငံသားတွေကို ကယ်ထုတ်ဖို့ တပ်တွေ စေလွှတ်တော့မှာ မဟုတ်ကြောင်း ဘိုင်ဒန်က သတိပေးခဲ့ပါတယ်။ ယူကရိန်းကို ရုရှားက ကျူးကျော် စစ်ပြုမှာ နေ့လား၊ ညလားလို့ စိုးရိမ်နေရတဲ့ အခြေအနေမှာ ဘိုင်ဒန်က သူ့နိုင်ငံသားတွေကို အမြန်ဆုံး ထွက်ခွာဖို့ ပြောကြားလိုက်တာ ဖြစ်ပါတယ်။
ယူကရိန်းရဲ့ အနေအထားက ဘာမဆို ကြိုတွေးထားလို့ မရလောက်အောင် ရုတ်ချည်း အလှည့်အပြောင်းတွေ ဖြစ်သွားနိုင်တယ်လို့ ဘိုင်ဒန်က ပြောပါတယ်။ ရုရှား သမ္မတ ဗလာဒီမာ ပူတင်က ယူကရိန်းကို ကျူးကျော်ဖို့ အစီအစဉ် မရှိပါဘူးလို့ အကြိမ်ကြိမ် ငြင်းဆိုထားပေမယ့် ယူကရိန်းနိုင်ငံ ပတ်ပတ်လည်မှာ စစ်သည် တစ်သိန်းလောက် ဖြန့်ကျက် ဝန်းရံထားစေပါတယ်။
အမေရိကန်နဲ့ NATO မဟာမိတ် အဖွဲ့ထဲက အရာရှိကြီး တချို့ကတော့ အခုလလယ်လောက်မှာတင် ယူကရိန်း ပိုင်နက်ထဲ ရုရှားတပ်တွေ စတင် ဝင်ရောက်လာနိုင်တယ်လို့ ခန့်မှန်းထားပါတယ်။ ရုရှားဟာ ယူကရိန်းပိုင် ခရိုင်းမီးယား ကျွန်းဆွယ်ကိုလည်း ၂၀၁၄ တုန်းက စစ်အင်အားသုံးပြီး ကျူးကျော် သိမ်းပိုက်ခဲ့ဖူးပါတယ်။
Public Service Announcement
လတ်တလောမှာ ယူကရိန်းနဲ့ နယ်စပ်တလျှောက် ရုရှားပိုင်နက်ထဲမှာ စစ်တပ်တွေ ဖြန့်ကျက်ထားသလို ယူကရိန်းရဲ့ နောက်ထပ် အိမ်နီးချင်း နိုင်ငံတစ်ခုဖြစ်တဲ့ ဘီလားရုစ်မှာလည်း ရုရှားက အင်အား အလုံးအရင်းနဲ့ စစ်ရေး လေ့ကျင့်နေပါတယ်။
လက်ရှိ တင်းမာမှုတွေနဲ့ ပတ်သက်လို့ ဗြိတိန် ဝန်ကြီးချုပ် ဘောရစ်ဂျွန်ဆန်က ဥရောပတိုက်ဟာ ဆယ်စုနှစ်ပေါင်း အတော်များများအတွင်း အကြီးမားဆုံး လုံခြုံရေးဆိုင်ရာ အကျပ်အတည်းကြီး တစ်ခုနဲ့ ရင်ဆိုင်နေရပြီလို့ မှတ်ချက် ပေးခဲ့ပါတယ်။
ဘိုင်ဒန်ကတော့ ယူကရိန်းက အမေရိကန် နိုင်ငံသားတွေဟာ အမြန်ဆုံး ထွက်ခွာသင့်ပြီဖြစ်ကြောင်း၊ ကမ္ဘာပေါ်မှာ အင်အား အကြီးဆုံး စာရင်းဝင် စစ်တပ်ကြီး တစ်ခုနဲ့ ဆက်စပ်နေတဲ့ ပြဿနာဟာ အချိန်မရွေး အပြောင်းအလဲတွေ ကြုံသွားနိုင်ကြောင်း ပြောကြားခဲ့ပါတယ်။
တကယ်လို့ ယူကရိန်းမှာ စစ်ဖြစ်ရင် ပိတ်မိနေတဲ့ အမေရိကန် နိုင်ငံသားတွေကို ကယ်ထုတ်ဖို့ တပ်တွေ စေလွှတ်မလားလို့ သတင်းထောက်တွေက မေးတဲ့အခါ ဘိုင်ဒန်က ဒီကိစ္စ မဖြစ်နိုင်ကြောင်း၊ အမေရိကန်နဲ့ ရုရှား စစ်တပ်တွေသာ ထိပ်တိုက် ပစ်ခတ်မှုတွေ ဖြစ်လာရင် ကမ္ဘာစစ်ကြီး အစပြုသွားနိုင်ကြောင်း တုံ့ပြန်သွားပါတယ်။
အနောက်အုပ်စု နိုင်ငံ ခေါင်းဆောင်တွေကတော့ ရုရှားအနေနဲ့ လက်ရှိ အခြေအနေတွေကို သံတမန်ရေးရာ နည်းလမ်းတွေနဲ့ ဖြေရှင်းဖို့ မျှော်လင့်နေဆဲလို့လည်း သိရပါတယ်။
