စစ်ဘေးကြောင့် နိုင်ငံကို စွန့်ခွာ ထွက်ပြေးခဲ့ရတဲ့ ယူကရိန်း ဒုက္ခသည် တစ်သန်းကျော်လောက် ရှိလာပြီလို့ ကုလသမဂ္ဂက ပြောကြားခဲ့ပါတယ်။
စစ်ပွဲစပြီး ၇ ရက် အတွင်းမှာတင် စစ်ဘေးဒုက္ခသည် သန်းဂဏန်းထိ ရောက်ရှိလာတာလို့ ကုလသမဂ္ဂက ဆိုပါတယ်။ ၂၀၁၅ ခုနှစ်တုန်းက ဥရောပမှာ ကြုံခဲ့တဲ့ ရွှေ့ပြောင်း ဒုက္ခသည် ဂယက်မှာ နေရပ်စွန့်ခွာသူ ၁.၃ သန်းလောက်ထိ များပြားခဲ့ကြောင်း၊ ယူကရိန်းက ဒီစံချိန်ကို ၇ ရက်တည်းနဲ့ လိုက်မီလုနီးပါး ဖြစ်လာကြောင်း BBC သတင်းထောက် လီဝစ် ဂွတ်ဒေါလ်က ပြောပါတယ်။
ကုလသမဂ္ဂ လက်အောက်ခံ ဒုက္ခသည်များဆိုင်ရာ မဟာမင်းကြီးရုံးရဲ့ အကြီးအကဲဖြစ်သူ ဖိလစ်ပို ဂရန်ဒီကလည်း ယူကရိန်းမှာ သေနတ်သံတွေ အမြန်ဆုံး တိတ်ဆိတ်သွားဖို့ လိုအပ်နေပြီး လိုအပ်တဲ့ လူသားချင်း စာနာမှုဆိုင်ရာ အထောက်အပံ့တွေ အလျင်အမြန် ပေးပို့နိုင်ဖို့ အရေးကြီးနေကြောင်း Twitterမှာ ရေးသားထားပါတယ်။
ယူကရိန်း စစ်ပွဲကြောင့် နေရပ်စွန့်ခွာ ထွက်ပြေးသူ စုစုပေါင်းဟာ ၁၂ သန်းလောက်ထိ များပြားလာနိုင်တယ်လို့လည်း ဒုက္ခသည်များဆိုင်ရာ မဟာမင်းကြီးရုံးက ခန့်မှန်းထားပါတယ်။ လတ်တလောမှာ ယူကရိန်း ဒုက္ခသည်တွေကို ပိုလန်က အများဆုံး လက်ခံပေးထားပြီး ဆလိုဗေးကီးယား၊ ဟန်ဂေရီ၊ ရိုမေးနီးယား၊ မော်လ်ဒိုဗာနဲ့ တခြား ဥရောပ နိုင်ငံတွေကလည်း ဒုက္ခသည်တွေ လက်ခံပေးနေကြောင်း သိရပါတယ်။