နျူကလီးယား စမ်းသပ်နယ်မြေမှာ အဆောက်အအုံသစ်တွေ မြောက်ကိုရီးယားစစ်တပ် တည်ဆောက်နေ

မြောက်ကိုရီးယား စစ်တပ်ရဲ့ နျူကလီးယားလက်နက် စမ်းသပ်နေကျ နေရာမှာ လှုပ်ရှားမှုတွေ ရှိနေတဲ့အပေါ် အမေရိကန်က သတိကြီးကြီး စောင့်ကြည့်နေပါတယ်။

အမေရိကန်နဲ့ ညှိနှိုင်းမှုတွေအပြီး ၂၀၁၈ ခုနှစ်မှာ မြောက်ကိုရီးယားခေါင်းဆောင် ကင်မ်ဂျုံအန်းက နျူကလီးယား စမ်းသပ်မှုတွေ ဆိုင်းငံ့ထားဖို့ သဘောတူခဲ့သလို ပွန်ဂီရီ နျူကလီးယား စမ်းသပ်ဇုန် နယ်မြေရဲ့ အစိတ်အပိုင်း တချို့ကို ဖြိုချခဲ့ပါတယ်။ ဒါပေမဲ့ နောက်ပိုင်းမှာတော့ နှစ်နိုင်ငံ ဆွေးနွေးမှုတွေက လုံးဝ တိုးတက်မှု ရှိမလာတော့သလို မြောက်ကိုရီးယားကလည်း ဒုံးကျည်နဲ့ နျူကလီးယား လက်နက် နည်းပညာ စမ်းသပ်မှုတွေ ပြန်လည် အရှိန်မြှင့်လာခဲ့ပါတယ်။

ဂြိုဟ်တု ဓာတ်ပုံတွေအရ ပွန်ဂီရီမှာ လှုပ်ရှားမှုတွေ ပြန်တွေ့နေရသလို အသစ်ဆောက်လုပ်ထားတဲ့ အဆောက်အအုံတွေပါ တိုးလာတာ တွေ့ရကြောင်း အမေရိကန်ရဲ့ မြောက်ကိုရီးယားအရေး လေ့လာသူတွေက ပြောပါတယ်။

လောလောဆယ် အခြေအနေမှာတော့ ပွန်ဂီရီမှာ နောက်ထပ် နျူကလီးယားလက်နက် စမ်းသပ်ဖို့ အဆင်သင့် မဖြစ်နိုင်သေးကြောင်း၊ ဒါပေမဲ့ လက်ရှိအတိုင်း ပြန်လည် တည်ဆောက်မှုတွေ ရှိနေဦးမယ်ဆိုရင် ဒီနှစ်ကုန်လောက်မှာ လက်နက် စမ်းသပ်နိုင်တဲ့ အခြေအနေထိ ရောက်သွားနိုင်ကြောင်း စောင့်ကြည့် လေ့လာသူတွေက မှတ်ချက် ပေးခဲ့ပါတယ်။

Public Service Announcement

မြောက်ကိုရီးယား အစိုးရရဲ့ သဘောထားကို အတိအကျ မသိရသေးပေမယ့် ပွန်ဂီရီကို အချိန်မရွေး နျူကလီးယားလက်နက် စမ်းသပ် ဖောက်ခွဲနိုင်တဲ့ နေရာတစ်ခုအဖြစ် ပြန်လည် ထားရှိချင်နေတာမျိုး ဖြစ်နိုင်တယ်ဆိုတဲ့ သုံးသပ်ချက်တွေလည်း ထွက်ပေါ်နေပါတယ်။

ပွန်ဂီရီဟာ မြောက်ကိုရီးယားနိုင်ငံ အရှေ့မြောက်ပိုင်းမှာ တည်ရှိပြီး ၂၀၀၆ ခုနှစ်နောက်ပိုင်း အဲဒီနေရာမှာ နျူကလီးယားလက်နက် စမ်းသပ် ဖောက်ခွဲမှု အနည်းဆုံး ၆ ကြိမ်လောက် လုပ်ဆောင်ခဲ့ပြီး ဖြစ်ပါတယ်။