ဟောင်ကောင်မှာ ကိုဗစ်ရောဂါကြောင့် အသေအပျောက် များလာတဲ့အတွက် ကွယ်လွန်သူတွေရဲ့ ရုပ်အလောင်းတွေကို ကွန်တိန်နာ ပုံးကြီးတွေထဲမှာပါ ထည့်သွင်း ထားရှိနေရကြောင်း သိရပါတယ်။
ဟောင်ကောင်ဟာ ကိုဗစ်နဲ့ ပတ်သက်ရင် ကောင်းမွန်တဲ့ အစီအမံတွေနဲ့ တုံ့ပြန် ထိန်းချုပ်နိုင်ခဲ့ဖူးပေမယ့် လောလောဆယ်တော့ ကူးစက်နှုန်း မြန်ဆန်လွန်းတဲ့ Omicron မျိုးကွဲသစ် ကိုရိုနာဗိုင်းရပ်စ်ရဲ့ ဖိစီးမှုတွေနဲ့ ရင်ဆိုင်နေရပါတယ်။
အခုအခါ ဟောင်ကောင်မှာ ရေခဲတိုက်တွေက သိုလှောင် သိမ်းဆည်းနိုင်တဲ့ ပမာဏထက် အလောင်းတွေ ပိုများလာတဲ့အတွက် ကွန်တိန်နာ ပုံးကြီးတွေကို အအေးခန်း စနစ်တွေ ထည့်သွင်းပြီး ယာယီ ရေခဲတိုက်တွေအဖြစ် ပြောင်းလဲ အသုံးပြုနေရပါတယ်။
အခုဆိုရင် ဟောင်ကောင်မှာ ကိုဗစ် အတည်ပြုလူနာ ၁ သန်းနီးပါး ရှိလာပြီး အသေအပျောက် ဦးရေက ၅၀၀၀ ကျော်လွန်လာပါပြီ။ အခုဆိုရင် ဟောင်ကောင်က ခေါင်းတလား လုပ်ငန်းတွေလည်း ပစ္စည်းပြတ်လပ်တဲ့ အခြေအနေ ရင်ဆိုင်နေရတယ်လို့ ဆိုပါတယ်။ လက်ကျန် ရှိနေတဲ့ အခေါင်း ၃၀၀ လောက်ကလည်း လာမယ့် သီတင်းပတ်လောက်ဆို ကုန်နေလောက်ပြီလို့ ခန့်မှန်းထားပါတယ်။
Public Service Announcement
ဟောင်ကောင် အစိုးရအဖွဲ့ ခေါင်းဆောင် ကယ်ရီလမ်က တရုတ်ဆီကနေ အခေါင်းတွေ ကုန်တင် သင်္ဘော နှစ်စီးစာ အရေးပေါ် မှာယူထားကြောင်း ပြောပါတယ်။ အခုအခါမှာ တာဝန်ရှိသူတွေက ကိုဗစ်ကြောင့် သေဆုံးသွားသူတွေရဲ့ ရုပ်အလောင်းတွေကို ဆရာဝန်ဆီက သေစာရင်း ထောက်ခံလက်မှတ် မလိုဘဲ မိသားစုဝင်တွေ အမြန်ဆုံး ထုတ်ယူ သင်္ဂြိုဟ်နိုင်အောင်လည်း ကြိုးစား ပေးနေရပါတယ်။
သုတေသီတွေက ဟောင်ကောင်မှာ ဆေးစစ်ရလဒ် Positiveဖြစ်တဲ့ လူနာ ၁ သန်းလောက် တွေ့ထားတယ် ဆိုပေမယ့် လူဦးရေ စုစုပေါင်း ၇.၄ သန်းရဲ့ ထက်ဝက်လောက်ထိ ရောဂါကူးစက်ပြီး ဖြစ်နိုင်တယ်လို့ ခန့်မှန်းထားပါတယ်။ ဒီအတောအတွင်း ဟောင်ကောင်က ဒေသခံ တချို့ဟာ အပန်းဖြေ ကမ်းခြေတွေမှာ နှာခေါင်းစည်း မတပ်ဘဲ နေပူစာ လှုံနေတဲ့ ဓာတ်ပုံတွေ ထွက်ပေါ်လာတဲ့နောက် အစိုးရ ထိန်းချုပ် စီမံမှုအောက်မှာ ရှိနေတဲ့ ကမ်းခြေ တချို့ကို ပိတ်ထားလိုက်ပါတယ်။
လေ့လာမှုတွေအရ ဟောင်ကောင်မှာ ကိုဗစ်ကြောင့် သေဆုံးသူ အချိုးအစား အများစုဟာ ကာကွယ်ဆေးထိုးဖို့ ငြင်းဆိုခဲ့တဲ့ သက်ကြီးရွယ်အိုတွေ ဖြစ်တယ်လို့လည်း သိရပါတယ်။
