၁၂ နှစ်အတွင်း ပထမဆုံးအကြိမ်အဖြစ် တောင်ကိုရီးယား သမ္မတ တစ်ဦးဟာ ဂျပန်နိုင်ငံကို ရောက်ရှိလာခဲ့ပြီ ဖြစ်ပါတယ်။
တောင်ကိုရီးယား သမ္မတ ယွန်းဆွတ်ခ်ယိုလ်ဟာ ဂျပန် ဝန်ကြီးချုပ် ဖူမီယို ကီရှီဒါနဲ့ တွေ့ဆုံဆွေးနွေးဖို့အတွက် မတ် ၁၆ ရက်က ဂျပန်နိုင်ငံ၊ တိုကျိုမြို့တော်ကို လေကြောင်းကနေ ဆိုက်ရောက်လာပါတယ်။
တောင်ကိုရီးယားနဲ့ ဂျပန် နှစ်နိုင်ငံစလုံးဟာ အမေရိကန်ရဲ့ အရှေ့အာရှ အမာခံ မဟာမိတ်တွေ ဖြစ်တဲ့တိုင် အချင်းချင်း ကြားမှာတော့ သမိုင်းကြောင်းနဲ့ချီတဲ့ အားပြိုင်မှု၊ ဆက်ဆံရေး တင်းမာမှုတွေ ရှိနေခဲ့ပါတယ်။ ဒါပေမဲ့ မြောက်ကိုရီးယားရဲ့ ရန်လို ခြိမ်းခြောက်မှုတွေကြောင့် ပြီးခဲ့တဲ့ နှစ်တွေအတွင်း တောင်ကိုရီးယားနဲ့ ဂျပန်တို့ကြား လုံခြုံရေးနဲ့ စစ်ရေးဆိုင်ရာ ပူးပေါင်း ဆောင်ရွက်မှုတွေ သိသိသာသာ မြင့်တက်လာခဲ့ပါတယ်။
ယွန်းရဲ့ တိုကျို ခရီးစဉ်ကိုတော့ နှစ်နိုင်ငံ ဆက်ဆံရေးမှာ သမိုင်းဝင် အချိုးအကွေ့ တစ်ခုလို့ လေ့လာသူတွေက သုံးသပ်နေပြီး တစ်ချိန်တည်းမှာပဲ မြောက်ကိုရီးယားကလည်း အဲဒီနေ့ မနက်အစောပိုင်းမှာ တာဝေးပစ် တိုက်ချင်းပစ် ဒုံးကျည် ICBM တစ်စင်း ပစ်ခတ်ပြခဲ့ပါသေးတယ်။
Public Service Announcement
ဂျပန် အစိုးရ အတွင်းရေးမှူး ဟီရိုကာဇူ မတ်ဆူနိုက မြောက်ကိုရီးယားရဲ့ နောက်ဆုံး ICBM စမ်းသပ်မှုဟာ အဆင်ခြင် ကင်းမဲ့တဲ့ လုပ်ရပ်လို့ ဝေဖန်ပြီး ဒေသတွင်း တည်ငြိမ် အေးချမ်းမှုကို ထိခိုက် နှောင့်ယှက်နေကြောင်း ဝေဖန်သွားပါတယ်။
ဂျပန်နဲ့ တောင်ကိုရီးယားတို့ဟာ ၁၉၆၅ ခုနှစ်မှာ သံတမန် ဆက်ဆံရေး ထူထောင်ခဲ့ပေမယ့် နှစ်နိုင်ငံကြား ဆက်ဆံရေးက ရိုလာကိုစတာလို အနိမ့်အမြင့် အတက်အကျပေါင်းစုံ ကြုံခဲ့ပါတယ်။ ဥပမာ အနေနဲ့ ဂျပန်ကိုလိုနီ ဘဝတုန်းက တောင်ကိုရီးယား အမျိုးသမီးတွေကို လိင်ကျွန်အဖြစ် အသုံးပြုခဲ့တဲ့ သမိုင်းမှတ်တမ်းမျိုးက နှစ်နိုင်ငံကြား ဆက်ဆံရေးကို အပြုသဘောနဲ့ တည်ဆောက်ရာမှာ အခက်အခဲတွေ ကြုံတွေ့စေခဲ့ပါတယ်။
