တရုတ်ရဲ့ ပြည်တွင်းဖြစ် ပထမဆုံး ခရီးသည်တင် လေယာဉ် တစ်စီးကို လက်တွေ့ ပျံသန်းမှု အစပြုခဲ့ကြောင်း သိရပါတယ်။
အစိုးရပိုင် သတင်းဌာနတွေက C919 အမျိုးအစား လေယာဉ်ဟာ စီးပွားရေး မြို့တော် ရှန်ဟိုင်းကနေ မြို့တော် ဘေဂျင်းဆီ မေလ ၂၈ ရက် မနက်အစောပိုင်းက ပျံသန်း ထွက်ခွာသွားတဲ့ ဗီဒီယိုတွေကို ထုတ်လွှင့် ပြသခဲ့ကြပါတယ်။ C919ဟာ စီးပွားဖြစ် အသုံးပြုဖို့ တရုတ်မှာ ပြည်တွင်းဖြစ် တည်ဆောက်ခဲ့တဲ့ ပထမဆုံး လေယာဉ် အမျိုးအစားပါ။
အဲဒီ လေယာဉ်ကို တရုတ် စီးပွားဖြစ် လေကြောင်း ကော်ပိုရေးရှင်း (Comac)က ဒီဇိုင်းထုတ် ဖန်တီး တည်ဆောက်ခဲ့ပြီး ပြည်တွင်း လေကြောင်း သယ်ယူပို့ဆောင်ရေး ကဏ္ဍမှာ Airbusနဲ့ Boeingတို့ကသာ ကြီးစိုးထားမှုကို တုံ့ပြန်ဖို့ ရည်ရွယ်ထားတာ ဖြစ်ပါတယ်။
တရုတ်ရဲ့ ပြည်တွင်းဖြစ် လေယာဉ်လို့ ခေါင်းစဉ်တပ်ထားတဲ့တိုင် ခရီးသည် ၁၆၄ ဦး စီးနင်း လိုက်ပါနိုင်တဲ့ C919ဟာ အင်ဂျင်နဲ့ လေယာဉ် ပုံစံပြု ထုတ်လုပ်မှု အီလက်ထရောနစ် စနစ်လို အစိတ်အပိုင်းတွေမှာ အနောက်နိုင်ငံတွေရဲ့ နည်းပညာနဲ့ ထုတ်ကုန်တွေကို အကြီးအကျယ် မှီခိုထားရဆဲပါ။
Public Service Announcement
ရှန်ဟိုင်းကနေ ဘေဂျင်းကို ပထမဆုံး ပျံသန်းမှု ခရီးစဉ်ဟာ ၃ နာရီ မပြည့်ခင် အချိန်အတွင်း အောင်အောင်မြင်မြင် ချောချောမွေ့မွေ့ ပြီးစီးခဲ့ပြီး ခရီးသည် ၁၃၀ ကျော် လိုက်ပါခဲ့တယ်လို့ သိရပါတယ်။ နောက်တော့ အဲဒီလေယာဉ်ဟာ ဘေဂျင်းကနေ ရှန်ဟိုင်းဆီ ပြန်လာဖို့လည်း စီစဉ်ထားပါတယ်။
အခုအခါမှာတော့ တရုတ် အစိုးရက ကျောထောက်နောက်ခံ ပေးထားတဲ့ အရှေ့တရုတ် လေကြောင်းလိုင်း (CEA)က C919 ၅ စီးကို မှာယူထားပြီး ဖြစ်ပါတယ်။ Comac ကုမ္ပဏီက လာမယ့် ၅ နှစ်တာအတွင်း နှစ်စဉ် C919 အစီးရေ ၁၅၀ လောက်စီ ထုတ်လုပ်နိုင်ဖို့ မျှော်လင့်ထားကြောင်းနဲ့ အခုဆိုရင် လေယာဉ်တွေအတွက် အမှာစာ ၁၂၀၀ ကျော် လက်ခံရရှိထားပြီးဖြစ်ကြောင်း ပြောပါတယ်။
လေ့လာသူတွေကတော့ အဲဒီ အမှာစာတွေထဲက အများစုဟာ တရုတ် လေကြောင်း ကုမ္ပဏီတွေရဲ့ ပြည်တွင်း ပျံသန်း ပြေးဆွဲမှုအတွက်သာ ဖြစ်လိမ့်မယ်လို့ သုံးသပ်ကြပါတယ်။
မကြာသေးခင် နှစ်ပိုင်းလောက်မှာ တရုတ် သမ္မတ ရှီကျင့်ဖျင်ဟာ C919ရဲ့ အတွင်းခန်း ဖွဲ့စည်းမှု ပုံစံတူ တစ်ခုကို ကိုယ်တိုင် သွားရောက် စစ်ဆေးခဲ့ပြီး အဲဒီ လေယာဉ် တည်ဆောက်မှု စီမံကိန်းဟာ တရုတ်ရဲ့ အရေးအကြီးဆုံး နည်းပညာ ထိုးထွင်း အောင်မြင်မှု တစ်ခုလို့ ချီးကျူးခဲ့ဖူးပါတယ်။
