ကာမာလာ ဟားရစ်ဟာ အမေရိကန်အတွက် အရမ်းမိုက်တဲ့ သမ္မတမျိုး ဖြစ်လာလိမ့်မယ်လို့ သမ္မတ ဂျိုးဘိုင်ဒန်က ထောက်ခံ ပြောကြားသွားပါတယ်။
ဒုတိယ သမ္မတ ဟားရစ်ဟာ ဘိုင်ဒန်အစား လာမယ့် နိုဝင်ဘာ ရွေးကောက်ပွဲမှာ ဝင်ရောက် ယှဉ်ပြိုင်ဖို့ အတည်ပြုပြီးတဲ့ နောက်ပိုင်း ပထမဆုံး အကြိမ်အဖြစ် သူတို့နှစ်ဦးဟာ အခမ်းအနား တစ်ခုမှာ အတူထွက်ပေါ်ခဲ့တဲ့အချိန် ဘိုင်ဒန်က အခုလို ထောက်ခံခဲ့တာ ဖြစ်ပါတယ်။
ဩဂုတ် ၁၅ ရက်နေ့ ညပိုင်းက ဝါရှင်တန်ဒီစီ မြို့တော် အပြင်ဖက်မှာ ဒီမိုကရက်တစ် ပါတီက ကြီးမှူးကျင်းပတဲ့ အခမ်းအနားမှာ ဘိုင်ဒန်က သူဟာ အစိုးရကို ဦးဆောင်ခဲ့တဲ့ ကာလတလျှောက် မယုံနိုင်လောက်စရာ ထူးခြားကောင်းမွန်တဲ့ ပါတနာ တစ်ဦးကို ရရှိခဲ့ကြောင်း၊ ဟားရစ်ဟာ အရမ်းမိုက်တဲ့ သမ္မတ တစ်ဦး ‘One hell of a president’ ဖြစ်လာနိုင်ကြောင်း ညွှန်းဆိုသွားခဲ့ပါတယ်။
Public Service Announcement
အခုအခမ်းအနားဟာ ပါတီရဲ့ ရွေးကောက်ပွဲကြို စည်းရုံးမှု အစီအစဉ် တစ်ခုအဖြစ် ယူဆနိုင်ပေမယ့်လည်း လက်တွေ့မှာတော့ ဘိုင်ဒန်ဟာ မူဝါဒတွေကို မိတ်ဆက် ဆွေးနွေးတာထက် ဒုတိယ သမ္မတ ဟားရစ်ကို ချီးကျူး ဂုဏ်တင်ပေးတဲ့ အပိုင်းကို ဦးစားပေးသွားပါတယ်။
ဟားရစ်ကလည်း အမေရိကန် သမိုင်းမှာ ပြည်သူတွေအတွက် စရိတ်သင့်တော်တဲ့ ကျန်းမာရေး စောင့်ရှောက်မှု ကဏ္ဍတွေ ချဲ့ထွင်တာ အပါအဝင် ထိရောက် အားကောင်းတဲ့ အစီအမံတွေ အကောင်အထည်ဖော် ပေးနိုင်ခဲ့သူ သမ္မတမျိုး များများစားစား မရှိဘူးလို့ တုံ့ပြန် ချီးကျူးသွားခဲ့ပါတယ်။
ဟားရစ်ဟာ သမ္မတ နေရာအတွက် ယှဉ်ပြိုင်ဖို့ ဆုံးဖြတ်ပြီးချိန် ကတည်းက မီဒီယာတွေနဲ့ အင်တာဗျူးတာမျိုးကို သတိကြီးကြီး ရှောင်ဖယ်နေဆဲ ဖြစ်တာကြောင့် အဲဒီ အခြေအနေဟာ ပြိုင်ဘက် ရီဘတ်ပလစ်ကန် ပါတီက ဝေဖန် ထိုးနှက်စရာ ဖြစ်နေပါတယ်။ ဒါပေမဲ့ သူက ဘိုင်ဒန်အစား ရွေးကောက်ပွဲ ဝင်မယ်လို့ ကြေညာခဲ့ချိန်နောက်ပိုင်း ဒီမိုကရက် ပါတီရဲ့ လူထုထောက်ခံမှု အခြေအနေက ပိုမိုမြင့်တက်လာပြီး အစောပိုင်းမှာ အပြတ်အသတ် ရှေ့ကပြေးနေတဲ့ ထရမ့်ကို ဖိအားပေးလာနိုင်ပါတယ်။
တကယ်လို့ ဟားရစ်သာ အမေရိကန် ရွေးကောက်ပွဲမှာ အနိုင်ရခဲ့မယ်ဆိုရင် သူဟာ သမိုင်းတလျှောက် အမေရိကန်ရဲ့ ပထမဆုံး အမျိုးသမီး သမ္မတ၊ အာရှတောင်ပိုင်း အဆက်အနွှယ်ဝင် ပထမဆုံး သမ္မတအဖြစ် မှတ်တမ်းသစ် ရေးထိုးနိုင်မှာ ဖြစ်ပါတယ်။
ကိုးကား: BBC
