နိုင်ငံ သမိုင်းမှာ အဆိုးရွားဆုံး လေကြောင်း မတော်တဆမှုကြီးနဲ့ ကြုံအပြီး တောင်ကိုရီးယား ယာယီ သမ္မတ ချွိုင်ဆန်မော့ခ်က တစ်နိုင်ငံလုံးရဲ့ လေကြောင်းပို့ဆောင်ရေး စနစ်တွေမှာ အရေးပေါ် လုံခြုံရေး စုံစမ်းစစ်ဆေးမှုတွေ လုပ်ဆောင်ဖို့ အမိန့်ပေးလိုက်ပါတယ်။
ဒီဇင်ဘာ ၂၉ ရက်နေ့က မူအန် နိုင်ငံတကာ လေဆိပ်မှာ အရေးပေါ် ဆင်းသက်ရင်း ဂျယ်ဂျူ လေကြောင်းပိုင် ခရီးသည်တင် လေယာဉ်ဟာ ပြေးလမ်းအဆုံးက နံရံကို ဝင်တိုက်ပြီး မီးလောင်ခဲ့တာကြောင့် လူ ၁၇၉ ဦး သေဆုံးပြီး ၂ ဦးသာ အသက်ရှင်ခဲ့ပါတယ်။ ဒါဟာ တောင်ကိုရီးယား နိုင်ငံသမိုင်းမှာ အသေအပျောက် အများဆုံး လေကြောင်း မတော်တဆမှုအဖြစ် မှတ်တမ်းဆိုး တွင်ကျန်စေခဲ့ပါတယ်။
လေယာဉ်ဟာ ဘီးချလို့ မရတဲ့ အခြေအနေကြောင့် ပြေးလမ်းပေါ်မှာ ဝမ်းဗိုက်နဲ့ ရှပ်ဆင်းဖို့ ကြိုးစားရင်း အခြေအနေဆိုး ကြုံခဲ့တာ ဖြစ်ပါတယ်။ လေယာဉ်ပျက်ကျရတဲ့ အကြောင်းရင်းကို တိတိကျကျ မကြေညာသေးပေမယ့် ငှက်အုပ်နဲ့ တိုက်မိရာက လေယာဉ်ရဲ့ စနစ်တွေ ချွတ်ယွင်းမှု ကြုံခဲ့တာ ဖြစ်နိုင်ကြောင်း မီဒီယာတွေက ဖော်ပြထားခဲ့ပါတယ်။
လက်ရှိ အခြေအနေမှာတော့ ဦးစားပေး လုပ်ဆောင်ရမှာက သေဆုံးသူတွေ ဘယ်သူဘယ်ဝါဆိုတာ ခွဲခြားနိုင်ဖို့၊ မိသားစုဝင်တွေကို နှစ်သိမ့်ကူညီပေးဖို့၊ အသက်ရှင် ကျန်ရစ်သူတွေကို စောင့်ရှောက် ကုသပေးဖို့ ဖြစ်တယ်လို့ ချွိုင်က ဆိုးလ်မြို့တော်မှာ ပြုလုပ်တဲ့ အစည်းအဝေး တစ်ခုမှာ ပြောကြားခဲ့ပါတယ်။
Public Service Announcement
နောက်ဆုံးအဆင့် တရားဝင် စစ်ဆေးအတည်ပြုချက်တွေ ထွက်ပေါ် မလာသေးခင်မှာ ကတည်းက စုံစမ်းသိရှိပြီးသလောက် အကြောင်းအရာတွေကို ကျန်ရစ်သူ မိသားစုတွေဆီ အချိန်နဲ့ တပြေးညီ ပေးပို့နေဖို့ လိုအပ်ကြောင်း၊ လေယာဉ်ပျက်ကျတဲ့ နေရာမှာ ရှာဖွေရေးနဲ့ ကယ်ဆယ်ရေး လုပ်ငန်းတွေ ပြီးဆုံးပြီ ဆိုတာနဲ့ ပို့ဆောင်ရေး ဝန်ကြီးဌာနဟာ လေကြောင်းလိုင်း အားလုံးရဲ့ စနစ်တွေကို အရေးပေါ် လုံခြုံရေး စစ်ဆေးမှုတွေ လုပ်ဆောင်ရမှာဖြစ်ကြောင်း၊ ဒါမှသာ အလားတူ ဆိုးရွားတဲ့ မတော်တဆမှုတွေကို တားဆီးနိုင်မှာဖြစ်ကြောင်း ချွိုင်က ဆိုပါတယ်။
တောင်ကိုရီးယားမှာ သမ္မတ ယွန်ဆွတ်ခ်ယောနဲ့ ဝန်ကြီးချုပ် ဟန်ဒက်ခ်ဆူတို့ဟာ သမ္မတယွန်ရဲ့ စစ်အုပ်ချုပ်ရေး အရေးပေါ် ကြေညာအမိန့်နဲ့ ဆက်စပ်လို့ လွှတ်တော်ရဲ့ စွပ်စွဲပြစ်တင်မှုကို ခံရပြီး ရာထူးကနေ ဆိုင်းငံ့ခံထားရတာကြောင့် စီးပွားရေးနဲ့ ဘဏ္ဍာရေးဝန်ကြီး ချွိုင်က ယာယီ သမ္မတနဲ့ ဝန်ကြီးချုပ်အဖြစ် တာဝန်ယူထားတာ ဖြစ်ပါတယ်။
ဂျယ်ဂျူ လေကြောင်းလိုင်းရဲ့ ခရီးစဉ်အမှတ် 7C2216 လေယာဉ်ဟာ ခရီးသည် ၁၇၅ ဦးနဲ့ အမှုထမ်း ၆ ဦးကို တင်ဆောင်ပြီး ထိုင်းနိုင်ငံ၊ ဘန်ကောက်မြို့တော်ကနေ ပျံသန်းထွက်ခွာလာတဲ့နောက် မူအန်ကို ဆင်းဖို့ ကြိုးစားရင်း ဖြစ်ရပ်ဆိုး ကြုံခဲ့တာပါ။ မူလက ခရီးသည်တစ်ဦးနဲ့ အမှုထမ်းတစ်ဦး အသက်ရှင်တယ်လို့ သတင်းတွေက ဖော်ပြခဲ့ပေမယ့် အခုအခါမှာတော့ အသက်ရှင်သူ နှစ်ဦးစလုံးဟာ လေယာဉ် အမှုထမ်းတွေလို့ အတည်ပြုထားပါတယ်။
အာဏာပိုင်တွေက လေယာဉ်ပျက်ကျရတဲ့ အကြောင်းရင်းကို အတိအကျ မကြေညာသေးပေမယ့် ငှက်အုပ်နဲ့ တိုက်မိတာ၊ ရာသီဥတု ဆိုးရွားတာတွေက ဖြစ်နိုင်ခြေ ညွှန်ကိန်းတွေ ဖြစ်တယ်လို့ မှတ်ချက်ပေးထားပါတယ်။
ပညာရှင်တွေကတော့ လေယာဉ်ဟာ ဆင်းသက်လာချိန်မှာ ဘာကြောင့် အရမ်းအရှိန်များနေသလဲ၊ လေယာဉ်ဘီးတွေ ဘာကြောင့် ချမရသလဲစတဲ့ မေးခွန်းတွေ အများအပြား ရှိနေဆဲလို့ သုံးသပ်ထားပါတယ်။
ကိုးကား: Reuters
