တောင်ကိုရီးယား နိုင်ငံ၊ ဆောင်နမ်မြို့မှာ စီးပွားရေး လုပ်ငန်းတွေ ရုံးစိုက်ရာ အဆောက်အအုံကြီးတစ်ခု မီးအပြင်းအထန် လောင်ကျွမ်းခဲ့တာကြောင့် လူပေါင်း ရာဂဏန်းလောက်ကို အရေးပေါ် ကယ်ဆယ် ရွှေ့ပြောင်းပေးခဲ့ရပါတယ်။
ဇန်နဝါရီ ၃ ရက်နေ့က မီးလောင်ကျွမ်းမှုမှာ မီးကို ထိန်းချုပ် ငြှိမ်းသတ်ဖို့ မီးသတ်တပ်ဖွဲ့ဝင် ၂၆၀ ကျော်နဲ့ မီးသတ်ကား ၈၀ ကျော် အသုံးပြုခဲ့ရပါတယ်။ မီးဟာ တစ်နာရီခွဲလောက် လောင်ကျွမ်းချိန်အတွင်း အဆောက်အအုံ တစ်ခုလုံးနီးပါးကို ဝါးမျို ဖျက်ဆီးခဲ့ပြီးမှ ငြိမ်းသွားခဲ့ပါတယ်။
ကယ်ဆယ်ရေး အဖွဲ့တွေဟာ ရှစ်ထပ် အဆောက်အအုံထဲက လူ ၂၄၀ ဝန်းကျင်ကို ကယ်ထုတ်နိုင်ခဲ့ပြီး နောက်ထပ် ၇၀ လောက်ကတော့ အကူအညီ မလိုဘဲ ထွက်ပြေးလွတ်မြောက်ခဲ့တယ်လို့ သိရပါတယ်။ ကယ်ဆယ်လာသူ အများစုကို အဆောက်အအုံရဲ့ အမိုးပေါ်ကနေ ရွှေ့ပြောင်းပေးခဲ့ရတာ ဖြစ်ပါတယ်။
မီးခိုးမွှန်ပြီး မွန်းကျပ်တာ အပါအဝင် အသေးစား ဒဏ်ရာရသူ ၂၈ ဦးရှိခဲ့ပြီး ဒဏ်ရာပြင်းထန်သူတော့ မရှိခဲ့ပါဘူး။ မီးလောင်မှုမှာ အသေအပျောက် မရှိဘူးလို့ ကနဦး ယူဆထားပေမယ့် အပျက်အစီးတွေအောက်မှာ ပိတ်မိနေတဲ့ ရုပ်အလောင်းတွေ ရှိနိုင်မလား ဆိုတာကို တာဝန်ရှိသူတွေက လိုက်လံ အတည်ပြု ရှာဖွေနေဆဲ ဖြစ်ပါတယ်။
Public Service Announcement
မီးလောင်မှု ဖြစ်ပွားတဲ့ တိုက်ရဲ့ အောက်ထပ်မှာ စားသောက်ဆိုင် ဖွင့်ထားသလို အပေါ်ထပ်တွေမှာလည်း ရုံးခန်းတွေ ရှိနေပါတယ်။ နောက်ပြီး ကလေးရေကူးသင်တန်းတွေ ဖွင့်လှစ်ထားရာ ရေကူးကန် တစ်ခုလည်း ရှိနေတာကြောင့် လူဝင်လူထွက် များပြားတဲ့ နေရာတစ်ခုပါ။
မီးစတင် လောင်ကျွမ်းရတဲ့ အကြောင်းရင်းကို တိတိကျကျ မသိရသေးဘဲ စုံစမ်းစစ်ဆေးမှုတွေ ဆက်လက် လုပ်ဆောင်နေဆဲ ဖြစ်ပါတယ်။
ကိုးကား: Reuters
