ရုရှားကို လိုလားတဲ့ ယူကရိန်း စစ်ခေါင်းဆောင် တစ်ဦးဟာ မော်စကိုမှာ ဖြစ်ပွားတဲ့ ပေါက်ကွဲမှုအတွင်း ဒဏ်ရာရခဲ့ပြီး ဆေးရုံမှာ သေဆုံးသွားခဲ့ပါတယ်။
ဖေဖော်ဝါရီ ၃ ရက်နေ့က အာဘတ် တပ်ရင်းရဲ့ ခေါင်းဆောင် အာမန် ဆားစ်ဂျန် သေဆုံးသွားတဲ့ သတင်းကို ရုရှားမီဒီယာတွေက ဖော်ပြခဲ့ပါတယ်။ သူဦးဆောင်တဲ့ တပ်ရင်းဟာ ယူကရိန်း အရှေ့ပိုင်း နယ်မြေတွေမှာ အဓိက လှုပ်ရှားပြီး ရုရှားအတွက် အရန်တပ် တစ်ခုအဖြစ် ကူညီ တိုက်ခိုက်ပေးနေပါတယ်။
ဆားစ်ဂျန်ဟာ မော်စကို အနောက်မြောက်ပိုင်းက လူနေအဆောက်အအုံ တစ်ခုကနေ အပြင်ထွက်ခါနီး တံခါးဝနားမှာ ဖြစ်ပွားတဲ့ ပေါက်ကွဲမှုကြောင့် သေဆုံးခဲ့တာလို့ ဆိုပါတယ်။ အဲဒီနေရာဟာ ကရင်မလင် နန်းတော်နဲ့ ၇ မိုင်သာ ဝေးပါတယ်။
သူ့ကို လူနာတင် ရဟတ်ယာဉ်ပေါ်တင်ပြီး ဆေးရုံကို အမြန်ဆုံး ရွှေ့ပြောင်းပေးခဲ့ပေမယ့် ဒဏ်ရာတွေ ပြင်းလွန်းတာကြောင့် သေဆုံးသွားခဲ့တယ်လို့ ရုရှားစစ်တပ်ကို ထောက်ခံတဲ့ Telegram channel တချို့မှာပါ ရေးသားထားခဲ့ပါတယ်။
Public Service Announcement
ပေါက်ကွဲမှု အတွင်းမှာ ဆားစ်ဂျန်ရဲ့ သက်တော်စောင့် တချို့ပါ အပြင်းအထန် ဒဏ်ရာရခဲ့ပြီး အတည်မပြုနိုင်သေးတဲ့ သတင်းတွေအရ သူတို့ထဲက တစ်ဦးလည်း သေဆုံးခဲ့တယ်လို့ သိရပါတယ်။
ဒီတိုက်ခိုက်မှုနဲ့ ပတ်သက်လို့ ယူကရိန်းဖက်ကတော့ လောလောဆယ် ဘာမှတ်ချက်ပေး တုံ့ပြန်တာမှ မရှိသေးဘဲ နှုတ်ဆိတ်နေပါတယ်။
ယူကရိန်း ထောက်လှမ်းရေးဌာန SBUက ဒုစရိုက်ခေါင်းဆောင် ဆားစ်ဂျန်ဟာ ယူကရိန်း စစ်မြေပြင်မှာ ပါဝင်တိုက်ခိုက်ဖို့ အကျဉ်းထောင်တွေထဲ လှည့်လည်ပြီး ရာဇဝတ်သားတွေကို လူစုခဲ့တယ်လို့ သံသယရှိကြောင်း စွပ်စွဲ ဖော်ပြခဲ့ဖူးပါတယ်။
ဆားစ်ဂျန်ဟာ ပြည်ပြေး ယူကရိန်း သမ္မတဟောင်း ဗစ်တာ ယာနူကိုဗစ်ချ်ရဲ့ အတွင်းစည်း အသိုင်းအဝန်းထဲ ပါဝင်သူ တစ်ဦးဖြစ်တယ်လို့လည်း SBUက ပြောပါတယ်။
ဆားစ်ဂျန်ရဲ့ အာဘတ် တပ်ရင်းဟာ လက်ရှိမှာတော့ ယူကရိန်း တပ်တွေ နယ်စပ်ဖြတ်ကျော် ဝင်ရောက်ပြီး နယ်မြေတွေ သိမ်းပိုက်ထားရာ ရုရှားနိုင်ငံ အနောက်ပိုင်း၊ ကာ့စ်ခ်ဒေသက စစ်ဆင်ရေးတွေမှာ အဓိက လှုပ်ရှားနေတယ်လို့လည်း သိရပါတယ်။
ကိုးကား: CNN
