စပိန်က ဘောလုံးကွင်း တစ်ခုနားမှာ လူအုပ်ကို ကားဝင်တိုက်လို့ လူ ၁၃ ဦး ထိခိုက်ဒဏ်ရာ ရခဲ့ကြောင်း သိရပါတယ်။
မေလ ၁၅ ရက်နေ့ ညပိုင်းက စပိန်နိုင်ငံ၊ ဘာစီလိုနာမြို့ အခြေစိုက် ခါးသီး မြို့ခံ ပြိုင်ဘက်တွေဖြစ်တဲ့ အက်စ်ပန်ညိုနဲ့ ဘာစီလိုနာ အသင်းတို့ ယှဉ်ပြိုင် ကစားခဲ့ကြပါတယ်။ အဲဒီပွဲစဉ်အတွက် အက်စ်ပန်ညို အသင်း အိမ်ကွင်းရှေ့မှာ ပရိသတ်တွေ စုဝေးနေတဲ့အချိန် ကားတစ်စီးက လူအုပ်ထဲ ဝင်တိုက်ခဲ့တာ ဖြစ်ပါတယ်။
ဥရောပမှာ အကြမ်းဖက်သမားတွေက လူအုပ်ထဲ ကားနဲ့ တမင်ဝင်တိုက်တဲ့ ဖြစ်စဉ်မျိုးတွေ ရှိခဲ့ဖူးပေမယ့်လည်း ဘာစီလိုနာမြို့ တည်ရှိရာ ကာတာလန်ပြည်နယ် ရဲတပ်ဖွဲ့က အခု ကိစ္စကတော့ ယာဉ်မတော်တဆမှု တစ်ခုသာ ဖြစ်တယ်လို့ ကြေညာခဲ့ပါတယ်။
အခြေအနေကို မြန်မြန်ဆန်ဆန် ကိုင်တွယ် ထိန်းသိမ်းနိုင်ခဲ့ကြောင်း၊ အားကစားရုံထဲမှာ ရှိနေသူတွေ အတွက်လည်း ဘာအန္တရာယ်မှ မရှိခဲ့ကြောင်း ရဲတပ်ဖွဲ့က လူမှုကွန်ရက် မီဒီယာ Xမှာ ရေးသားထားပါတယ်။
Public Service Announcement
အခင်းဖြစ်တဲ့ နေရာဆီ သွားရောက်ကူညီခဲ့တဲ့ ကယ်ဆယ်ရေး အဖွဲ့တွေက ဒဏ်ရာရသူ ၉ ဦးဟာ အသေးအမွှားလောက်သာ ထိခိုက်ခဲ့ပြီး ကျန်တဲ့ ၄ ဦးကလည်း အသက်အန္တရာယ် မစိုးရိမ်ရဘူးလို့ ပြောပါတယ်။
ဘာစီလိုနာ အသင်းဟာ အခုပွဲစဉ်မှာ ၂-၀ နဲ့ အနိုင်ရခဲ့ပြီးတဲ့နောက် ၂၀၂၄-၂၅ ဘောလုံးရာသီရဲ့ လာလီဂါ စပိန် အဆင့်မြင့်တန်း အမှတ်ပေး ချန်ပီယံ ဖြစ်လာခဲ့ပါတယ်။
ဘာစီလိုနာနဲ့ အက်စ်ပန်ညိုတို့ရဲ့ ပြိုင်ဆိုင်မှုဟာ ရာစုနှစ် တစ်ခုကျော် ကြာမြင့်ခဲ့ပြီး နိုင်ငံရေး နောက်ခံ တင်းမာမှုတွေနဲ့လည်း ဆက်စပ်နေပါတယ်။ ကာတာလန် အမျိုးသားရေး ဝါဒီတွေအတွက် ဘာစီလိုနာ အသင်းက ကိုယ်စားပြု ရပ်တည်ပြီး အက်စ်ပန်ညိုကတော့ မက်ဒရစ်မှာရှိတဲ့ စပိန် အစိုးရကို ပိုမို အားပေး ထောက်ခံတဲ့ မူဝါဒမျိုးကို ဆွဲကိုင်ခဲ့ပါတယ်။
ကိုးကား: CNN
