တောင်ကိုရီးယားဟာ နိုင်ငံရဲ့ ပထမဆုံး ဗုဒ္ဓဘာသာ ဘုန်းတော်ကြီးကို ပွဲထုတ် မိတ်ဆက်လိုက်ပါတယ်။
မေလ ၆ ရက်နေ့တုန်းက မဟာယန ဗုဒ္ဓဘာသာ ပွဲတော် တစ်ခုမှာ အမြင့် ၁၃၀ စင်တီမီတာရှိတဲ့ လူတူစက်ရုပ်ဟာ လူသား ဘုန်းတော်ကြီးတွေနဲ့အတူ လက်အုပ်ချီရင်း ဗုဒ္ဓ တရားတော်တွေကို ရွတ်ပွားနေတာ တွေ့ခဲ့ရပါတယ်။
အမြင့် ၁၃၀ စင်တီမီတာရှိတဲ့ စက်ရုပ်ကို ဂါဘီလို့ နာမည်ပေးထားပါတယ်။ အဲဒီ စက်ရုပ်ဟာ တရုတ်ကုမ္ပဏီ Unitree Roboticsက ထုတ်လုပ်တဲ့ G1 မော်ဒယ် လူတူစက်ရုပ် တစ်ခုကို အခြေခံ ဖန်တီးထားတာ ဖြစ်ပါတယ်။ ဂါဘီဟာ ဗုဒ္ဓ တရားတော်တွေကို ရွတ်ဖတ်တာ၊ ဝတ်ပြုသူတွေနဲ့ ထိတွေ့ဆက်ဆံတာတွေ လုပ်ဆောင်နိုင်ပါတယ်။ စက်ရုပ် ဘုန်းတော်ကြီးကို မိတ်ဆက်ခြင်းဟာ နည်းပညာနဲ့ ပိုမိုအကျွမ်းတဝင်ရှိတဲ့ လူငယ်မျိုးဆက်တွေကို ဘာသာရေးနဲ့ ပိုမို ထိတွေ့လာအောင် ဆွဲဆောင်နိုင်ဖို့လည်း ရည်ရွယ်ထားတဲ့ သဘောပါ။
ဗုဒ္ဓကို ပူဇော်ပြီး ဗုဒ္ဓတရားတော်တွေကို ရွတ်ဖတ်တဲ့ အဲဒီ ဘာသာရေး အခမ်းအနားမှာ စက်ရုပ် ဘုန်းတော်ကြီးတစ်ပါး ပါဝင်လာခြင်းက တောင်ကိုရီးယားမှာတော့ ပထမဆုံး ဖြစ်ပါတယ်။
Public Service Announcement
ဆိုးလ်မြို့တော်နားက ဂျောင်ဂို-ဂူ ဘုရားကျောင်းဇုန်ထဲမှာ ပါဝင်တဲ့ ဂျိုဂျီဆာ ဘုရားကျောင်းထဲက အခမ်းအနားကို ဂါဘီက မဟာယန ဘုန်းတော်ကြီးတွေရဲ့ သင်္ကန်းကို ဝတ်ရုံပြီး ရောက်လာခဲ့ပါတယ်။ ဘုန်းတော်ကြီးတွေက ဂါဘီကို သာသနာ့ ဝန်ထမ်းအဖြစ် ခံယူမလားဆိုတဲ့ မေးလျှောက်မှုကို ဂါဘီကလည်း ခံယူပါ့မယ်လို့ ဝန်ခံခဲ့တဲ့နောက် စက်ရုပ်ရဲ့ လည်ပင်းမှာ ၁၀၈ လုံး ပုတီးကို ချိတ်ဆွဲပေးခဲ့ပါတယ်။
ဘုန်းတော်ကြီးတွေက စက်ရုပ်အတွက် သီးခြား သတ်မှတ်ပေးထားတဲ့ ငါးပါးသီလကို သတ်မှတ်ပေးပြီး ဂါဘီကလည်း ကြားနာ ခံယူနေတာကို တွေ့ရပါတယ်။ ဂါဘီအတွက် သတ်မှတ်ထားတဲ့ ငါးပါးသီလကတော့ သတ္တဝါတွေရဲ့ အသက်တွေကို ကူညီကာကွယ်ပေးဖို့၊ တခြားစက်ရုပ်တွေနဲ့ ပစ္စည်းတွေကို မဖျက်ဆီးဖို့၊ လူသားတွေကို လေးစားပြီး စကားနားထောင်ဖို့၊ ဆိုးယုတ်တဲ့ အကျင့်တွေကနေ ရှောင်ကြဉ်ဖို့၊ အလွန်အကျွံ ဓာတ်အားသွင်းတာမျိုး မလုပ်ဘဲ စွမ်းအင်ချွေတာဖို့ ဆိုတာတွေ ဖြစ်ပါတယ်။
Unitree Roboticsဟာ စက်ရုပ်နည်းပညာပိုင်းကို အပြိုင်အဆိုင် ကြိုးစား မြှင့်တင်နေတဲ့ တရုတ်နည်းပညာ ကုမ္ပဏီတွေထဲမှာ ထိပ်ဆုံးက ဦးဆောင်နေတဲ့ လုပ်ငန်းတွေထဲက တစ်ခုဖြစ်ပါတယ်။ တရုတ်နိုင်ငံမှာ စက်ရုပ်တွေကို လုပ်ငန်းနယ်ပယ်စုံမှာ ချဲ့ထွင် အသုံးပြုနေကြပြီး မေလ ၁ ရက်နေ့တုန်းကတော့ တရုတ်နိုင်ငံတောင်ပိုင်း ဟန်ကျိုးမြို့မှာ လူတူစက်ရုပ် ၁၅ ရုပ်ကို နိုင်ငံရဲ့ ပထမဆုံး ယာဉ်ထိန်းရဲ စက်ရုပ်တွေအဖြစ် စတင်အသုံးပြုခဲ့ကြောင်း သိရပါတယ်။
ကိုးကား: Korea Herald
