ကမ္ဘာ့ဖလား ပွဲစဉ်တွေမှာ ပွဲကြည့်စင် ခုံနေရာတွေ လွတ်နေတာဟာ ပရိသတ်တွေက သတ်မှတ်နေရာမှာ မထိုင်ကြလို့ဖြစ်ကြောင်း ကမ္ဘာ့ဘောလုံး အဖွဲ့ချုပ် (ဖီဖာ)က ဖြေရှင်းခဲ့ပါတယ်။
ဇွန်လ ၁၂ ရက်နေ့တုန်းက မက္ကဆီကိုနိုင်ငံ၊ ဂွာဒါလာဂျာရာမြို့မှာ ယှဉ်ပြိုင် ကစားခဲ့တဲ့ တောင်ကိုရီးယားနဲ့ ချက်အသင်းတို့ရဲ့ ပွဲစဉ်မှာ ပွဲကြည့်စင်ပေါ်က ခုံနေရာတွေ လူမပြည့်ဘဲ ဖြစ်နေတာကို အတော်ကြီး ထင်ထင်ရှားရှား တွေ့မြင်ခဲ့ရပါတယ်။
အထူးတန်း ပွဲကြည့်စင်ကြီးမှာရော၊ တခြားပွဲကြည့်စင်တွေမှာပါ လူလွတ်နေတဲ့ ထိုင်ခုံတွေ အများကြီးကို ကွက်ကျားကွက်ကျား တွေ့ခဲ့ရတာ ဖြစ်ပါတယ်။ ဒီအခြေအနေက ဖီဖာဟာ လက်မှတ်ရောင်းချမှုတွေကို ကောင်းကောင်း စီမံခန့်ခွဲနိုင်စွမ်း မရှိဘူးလားဆိုတဲ့ ဝေဖန် မေးခွန်းထုတ်မှုတွေကို ထွက်ပေါ်လာစေပါတယ်။
ဒါပေမဲ့ ဖီဖာကတော့ ခုံတွေ လွတ်နေတာဟာ လက်မှတ်ရောင်းအားနဲ့ မသက်ဆိုင်ဘဲ ပရိသတ်တွေက သတ်မှတ်ခုံနေရာကနေ ပွဲမကြည့်ဘဲ အစုလိုက် မတ်တပ်ရပ်ပြီး အားပေးခဲ့တာကြောင့်လို့ တုံ့ပြန်ခဲ့ပါတယ်။
Public Service Announcement
ဂွာဒါလာဂျာရာ အားကစားရုံရဲ့ ပရိသတ် ဝင်ဆံ့မှု အရေအတွက်က ၄၅၆၆၄ ဦးဖြစ်ပြီး အဲဒီနေ့က ပွဲလာကြည့်သူ ၄၄၉၈၅ ဦးထိ ရှိခဲ့ကြောင်း၊ ကွင်းထဲမှာ မြင်ခဲ့ရတဲ့ ထိုင်ခုံလွတ်တွေ ကိစ္စဟာ တကယ်တမ်း ပွဲကြည့်သူ ဦးရေနဲ့ တိုက်ရိုက် ဆက်နွှယ် ပတ်သက်မှု မရှိကြောင်း ဖီဖာက ထုတ်ပြန်ပါတယ်။
အဲဒီပွဲမှာ ပရိသတ်တချို့ဟာ သတ်မှတ်နေရာတွေမှာ မထိုင်ဘဲ ပွဲစဉ်တလျှောက်လုံး လူစုလူဝေးနဲ့ မတ်တပ်ရပ်နေခဲ့ကြတာကို ထည့်စဉ်းစားဖို့ လိုတယ်လို့လည်း ဖီဖာက ဆိုပါတယ်။
ကနေဒါနိုင်ငံ တိုရန်တိုမြို့မှာ ယှဉ်ပြိုင်ကစားခဲ့တဲ့ ကနေဒါနဲ့ ဘော့စ်နီးယား ပွဲစဉ်မှာလည်း ခုံအလွတ်တွေကို မြင်ခဲ့ရပါတယ်။ ဒါပေမဲ့ ဖီဖာရဲ့ စာရင်းအရ အဲဒီပွဲမှာလည်း ပရိသတ်က ရုံအပြည့်နီးပါး လာရောက် ကြည့်ရှု အားပေးခဲ့တယ်လို့ သိရပါတယ်။ BMO Field အားကစားရုံရဲ့ ပရိသတ် ဝင်ဆံ့အရေအတွက်က ၄၃၀၃၆ ဦးဖြစ်ပြီး ပွဲကြည့်သူ ၄၃၀၀၂ ဦး ရှိခဲ့တယ်လို့ ဖီဖာက ထုတ်ပြန်ပါတယ်။
ကမ္ဘာ့ဖလား ပြိုင်ပွဲတွေမှာ ထိုင်ခုံနေရာ အလွတ်တွေ များနေတာဟာ လက်မှတ်စျေးတွေ မတန်တဆ ကြီးနေလို့ဆိုတဲ့ ဝေဖန်စွပ်စွဲမှုတွေ ရှိနေတဲ့အပေါ် ဖီဖာက အခုလို တုံ့ပြန်နေတာ ဖြစ်ပါတယ်။
ကမ္ဘာ့ဖလား ပြိုင်ပွဲတွေအတွက် တရားဝင် သတ်မှတ်ထားတဲ့ လက်မှတ် စျေးနှုန်းတွေမှာ အနိမ့်ဆုံးက ဒေါ်လာ ၁၄၀ ဖြစ်ပြီး ဗိုလ်လုပွဲအတွက် ရိုးရိုးတန်းခုံ လက်မှတ်က ဒေါ်လာ ၈၆၈၀ ထိ မြင့်တက်သွားပါတယ်။ အထူးတန်း ပွဲကြည့်စင် လက်မှတ်ဖိုးက ဒေါ်လာ ၃၃၀၀၀ ဝန်းကျင်ထိ ရှိပါတယ်။
လက်မှတ် ပြန်လည်ရောင်းချမှုတွေကို ဖီဖာက ထိန်းချုပ်ခြင်း မရှိတာကြောင့်လည်း စျေးတွေက ပိုပြီး တက်ကုန်ပါတယ်။ ဥပမာ ဗိုလ်လုပွဲစဉ်ကို ကြည့်ရှုဖို့ နေရာကောင်း တစ်ခုကို အွန်လိုင်းပေါ်မှာ ပြန်ရောင်းနေတဲ့ ခေါ်စျေးက ဒေါ်လာ ၂.၃ သန်းနီးပါးလောက် ရှိပါတယ်။
လက်မှတ်စျေးတွေ အရမ်းများတဲ့အကြောင်း ဝေဖန်သံတွေ ကျယ်လောင်လာတဲ့နောက် ဖီဖာဟာ လက်မှတ်တချို့ကို ဒေါ်လာ ၆၀ စီ စျေးသတ်မှတ်ပြီး နိုင်ငံအလိုက် ဘောလုံးအဖွဲ့ချုပ်တွေဆီ ခွဲဝေရောင်းချပေးခဲ့ပါတယ်။ ဒါပေမဲ့ ကမ္ဘာ့ဖလား ပွဲစဉ် ၁၀၄ ပွဲအတွက် လက်မှတ်ပေါင်း ၆ သန်းနဲ့ ၇ သန်းကြား ရောင်းချရမယ့်ထဲက အဲဒီလို စျေးလျှော့ပေးတဲ့ အရေအတွက်ကတော့ ၁၃၀၀၀၀ သာရှိခဲ့ကြောင်း သိရပါတယ်။
ကိုးကား: Independent
