နော်ဝေး အိမ်ရှေ့စံ ကြင်ရာတော်ရဲ့ သားဖြစ်သူဟာ မုဒိမ်းမှု စွပ်စွဲချက်တွေအတွက် ပြစ်မှုထင်ရှားတာကြောင့် ထောင်ဒဏ် ၄ နှစ် ချမှတ်ခြင်း ခံခဲ့ရပါတယ်။
အော့စလိုမြို့တော်မှာ ဇွန်လ ၁၅ ရက်နေ့က ပြုလုပ်ခဲ့တဲ့ တရားစီရင် စစ်ဆေးမှုမှာတော့ အသက် ၂၉ နှစ်အရွယ် မားရီရော့ ဘော့ဂ် ဟွိုင်ဘီဟာ မုဒိမ်းမှု စွပ်စွဲချက် ၂ ခုအတွက် ပြစ်မှုထင်ရှားကြောင်း တရားသုံးကြီး ၃ ဦးက ဆုံးဖြတ်ခဲ့ပါတယ်။ သူဟာ မုဒိမ်းမှု စွပ်စွဲချက် တခြား ၂ ခုအတွက် ကင်းရှင်းပေမယ့်လည်း နောက်ထပ် ပြစ်မှုတွေကို ကျူးလွန်ထားတယ်လို့ တရားသူကြီးတွေက စစ်ဆေး တွေ့ရှိခဲ့ပါတယ်။
ဟွိုင်ဘီဟာ သူ့ကို စီရင်ချက်ချတဲ့ တရားခွင်ကို ကိုယ်တိုင် မတက်ရောက်ခဲ့ပေမယ့် ဗီဒီယိုကနေ ချိတ်ဆက်ပြီး စောင့်ကြည့်ခဲ့ပါတယ်။ ဟွိုင်ဘီကို ထောင်ဒဏ် ၇ နှစ်နဲ့ ၇ လထိ ချမှတ်နိုင်ဖို့ အစိုးရ ရှေ့နေတွေက တောင်းဆိုခဲ့ပြီး သူ့ရဲ့ ရှေ့နေတွေကတော့ ထောင်ဒဏ် ၁၈ လလောက်သာ ကျဖို့နဲ့ ပြစ်ဒဏ်ကို အယူခံ ဝင်ခွင့်ရနိုင်ဖို့ ကြိုးစားခဲ့ပါတယ်။
ဟွိုင်ဘီဟာ လက်ရှိ နော်ဝေး အိမ်ရှေ့မင်းသား ဟာကွန်ရဲ့ မယားပါသား ဖြစ်ပါတယ်။ သူ့အသက် ၄ နှစ်အရွယ်မှာ မိခင်ဖြစ်သူ မက်တေး မာရစ်က မင်းသား ဟာကွန်နဲ့ ထိမ်းမြား လက်ထပ်ခဲ့တာပါ။
Public Service Announcement
ဟွိုင်ဘီဟာ တော်ဝင်မိသားစုထဲမှာ ကြီးပြင်းလာပေမယ့် တော်ဝင် မိသားစုဝင် တစ်ဦးတော့ မဖြစ်ခဲ့ပါဘူး။ သူ့မှာ ထီးနန်းဆက်ခံပိုင်ခွင့်၊ အများပြည်သူနဲ့ ပတ်သက်တဲ့ လုပ်ငန်းတာဝန်တွေ ရယူခွင့်၊ တရားဝင် ဘွဲ့ထူးဂုဏ်ထူး လက်ခံခွင့်တွေ မရှိခဲ့ပါဘူး။ သူဟာ အရင်ကတည်းက မူးယစ်ဆေးသုံးမှု၊ ရန်လို အကြမ်းဖက်မှုတွေလို ရာဇဝတ်ကြောင်းဆိုင်ရာ စွပ်စွဲချက်တွေနဲ့ အမှုပွေခဲ့ပါတယ်။
မိခင်ဖြစ်သူ မက်တေး မာရစ်ဟာ ပြင်းထန်တဲ့ အဆုတ်ရောဂါ တစ်မျိုး စွဲကပ် ခံစားနေရပြီး အိပ်ရာထဲ လဲနေသလို အဆုတ် အစားထိုး ကုသခွင့်အတွက် စောင့်ဆိုင်းနေချိန်မှာ ဟွိုင်ဘီက ထောင်ဒဏ် ချမှတ် ခံခဲ့ရတာ ဖြစ်ပါတယ်။ ဟွိုင်ဘီရဲ့ ရှေ့နေတွေကတော့ မိခင်ဖြစ်သူရဲ့ ကျန်းမာရေး အခြေအနေကြောင့် သူတို့ရဲ့ အမှုသည်ဟာ အနီးကပ် ပြုစု စောင့်ရှောက်ခွင့် ရသင့်တယ်လို့ အကြောင်းပြပြီး ထောင်ဒဏ်ကနေ လျှော့ပေါ့ခံရစေဖို့ ကြိုးစားနေကြပါတယ်။
ဟွိုင်ဘီဟာ ၂၀၁၇ တုန်းက မူးယစ်ဆေးဝါး လက်ဝယ်တွေ့ရှိမှုကြောင့် အဖမ်းခံရပြီး ဒဏ်ငွေဆောင်ခဲ့ရပါတယ်။ သူဟာ ၂၀၂၄ ခုနှစ်မှာတော့ မုဒိမ်းမှု စွပ်စွဲချက် ၄ ခုနဲ့ တခြား ပြစ်မှုတွေအတွက် တရားစွဲဆို ခံခဲ့ရတာ ဖြစ်ပါတယ်။ ဟွိုင်ဘီက စွဲချက်အားလုံးကို ငြင်းဆိုခဲ့ပေမယ့် တရားရုံးကတော့ သူဟာ အမှု ၂ ခုအတွက် အပြစ်ရှိတယ်လို့ ဆုံးဖြတ်ခဲ့တာပါ။ သူဟာ နော်ဝေးရဲ့ လူသိများတဲ့ influencer တစ်ဦးဖြစ်သူ ချစ်သူဟောင်း နိုရာ ဟော့ခ်လန်းအပေါ် အကြမ်းဖက် ရန်ပြုခဲ့တယ်လို့လည်း စွပ်စွဲ ခံခဲ့ရပါတယ်။
ဟွိုင်ဘီကို တရားရုံးက ထောင်ဒဏ်ချမှတ်မှုနဲ့ ပတ်သက်လို့ နော်ဝေး တော်ဝင်မိသားစုကတော့ သဘောထား မှတ်ချက် တစ်ခုခုပေးတာမျိုး မရှိသေးပါဘူး။
ကိုးကား: BBC
ဓာတ်ပုံ – NTB
