“ဗုဒ္ဓကို မီးလောင်ပြင်မှာ ငါတွေ့ခဲ့တယ်”

သင့်သူ

ဗုဒ္ဓကို

မီးလောင်ပြင်မှာ ငါတွေ့ခဲ့တယ်။

ဗုဒ္ဓဟာ ကြောင့်ကျတော်မူနေတယ်။

ဗုဒ္ဓဟာ ဆင်းရဲတော်မူနေတယ်။

အမြိုက်ဆေးကို ငါရှာမတွေ့

ဗုဒ္ဓကိုတော့ မီးလောင်ပြင်မှာတွေ့ခဲ့တယ်။

ဗုဒ္ဓအရှေ့ဒူးတုတ်ဝတ်တွား

ဘုရားတပည့်တော်တို့ဘာမှားခဲ့သလဲဘုရားလို့

လျှောက်ကြည့်တော့။

ဗုဒ္ဓဟာ ဆိတ်ဆိတ်နေတော်မူတယ်။

ငါဟာအလိုမကျ

နောက်‌တစ်နေရာ မှာ

နောက်ထပ်ဗုဒ္ဓ တပါးကို‌ တွေ့လိုတွေ့ငြား

ငါထထွက်ခဲ့တယ်။

နောက်ထပ်ဗုဒ္ဓကိုလည်း

နောက်ထပ်မီးလောင်ပြင်တစ်ခုမှာငါတွေ့ခဲ့တယ်။

လောကငရဲ‌ဆိုတာ ဘယ်လိုပါလဲဘုရားလို့

ငါမေးလျှောက်ကြည့်ပြန်တော့

ဗုဒ္ဓက ဆိတ်ဆိတ်နေတော်မူပြန်တယ်။

ငါလည်းပြန်ရဦးမယ်

မျှော်နေသူတွေလည်း

မျှော်ရော့မယ်။

ရောက်လျှင်ရောက်ချင်းပဲ

အမြိုက်ဆေးကို တောင့်တသူတွေဟာ

ဗုဒ္ဓက ဘာတရားကို ဟောလိုက်သလဲလို့

ငါ့ ကိုဆီးမေးကြ

ဗုဒ္ဓက ဆိတ်ဆိတ်သာနေတော်မူတယ်လို့သာ

ငါဖြေရပေါ့။

ဗုဒ္ဓကိုတကယ်တွေ့ခဲ့ရလားတဲ့

ဗုဒ္ဓကို ဘယ်မှာတွေ့ခဲ့သလဲလို့မေးကြတော့။

ငါတကယ်တွေ့ခဲ့တယ်

မလှုပ်မယှက်

ထက်ဝယ်ဖွဲ့ခွေ ပါပဲကွာ။

ဗုဒ္ဓကိုလေ

မီးလောင်ပြင်မှာ

တွေ့ခဲ့တယ်။

ဗုဒ္ဓကို မီးလောင်ပြင်မှာ

ငါတွေ့ခဲ့တယ်။

ဗုဒ္ဓကို ရွာတစ်ရွာရဲ့ မီးလောင်ပြင်မှာ

ငါတကယ်တွေ့ခဲ့ရပါတယ် ကွာ။ ။

(The Call – ​ခေါ်သံ” အွန်လိုင်းမဂ္ဂဇင်းမှာ ဖော်ပြခဲ့တဲ့ ‘သင့်သူ’ ရဲ့ “ဗုဒ္ဓကို မီးလောင်ပြင်မှာ ငါတွေ့ခဲ့တယ်”ကဗျာကို People’s Spring က ပြန်လည်​ဖော်ပြ​ပေးတာ ဖြစ်ပါတယ်။အနုရသကဲပြီး တော်လှန်​ရေးအတွက် အ​ထောက်အကူ ပြုတဲ့ စာ​ပေကဏ္ဍမျိုးစုံကို “The Call – ​ခေါ်သံ” အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749… မှာလည်းသွား​ရောက်ဖတ်ရှုနိုင်ပါတယ်)