မိထက်/People’s Spring
ရခိုင်ပြည်နယ်၊ သံတွဲမြို့ရှိ စစ်ဘေးရှောင်စခန်းကို ယနေ့(စက်တင်ဘာလ ၂၆ ရက်) နံနက်တွင် စစ်ကောင်စီက လေကြောင်းမှ ဗုံးကြဲရာ ကလေးငယ်များအပါအဝင် စစ်ဘေးရှောင်ပြည်သူ ၁၃ ဦး သေဆုံးပြီး ၂၃ ဦး ဒဏ်ရာရရှိသွားသည်။
စစ်ဘေးရှောင်များ ခိုလှုံနေသည့်သံတွဲမြို့နယ်ခန်းမ နှင့် သဘာ၀ပတ်ဝန်းကျင်ထိန်းသိမ်းရေးရုံးကို နံနက်၇ နာရီ ၄၀ မိနစ်တွင် ဂျက်ဖိုက်တာဖြင့် ဗုံး နှစ်လုံးကြဲချခြင်းခဲ့ခြင်းဖြစ်ကြောင်းဒေသခံတစ်ဦးကပြောသည်။
Public Service Announcement
“သေဆုံးတာမှာ ကလေးတွေပါ ပါတယ်။ ဒီနေရာက စစ်ရှောင်စခန်းပါ။ မြင်သာထင်သာရှ်ိတဲ့ စခန်းပါ။ အဲ့ဒီဟာကို တည်ပစ်တာ။ အကယ့်ကို သွေးတွေ ဖုံးသွားတာပါ။ ဒဏ်ရာရသူတွေကိုလည်း စိတ်ပူနေရတယ်။ နေစရာလည်း မရှိတော့ဘူး”ဟု ဒေသခံတစ်ဦးက People’s Sring သို့ပြောသည်။
သံတွဲမြို့ကို ပြီးခဲ့သည့် ဧပြီလတွင် အာရက္ခတပ်တော်(AA)က တိုက်ခိုက်ပြီးနောက် ဇူလိုင်လတွင် စစ်ကောင်စီစခန်းများအားလုံးကိုသိမ်းယူခဲ့သည်။ နောက်ဆုံးကျန်ရှိနေသည့် မောင်ရွှေလေးရေတပ်စခန်းကို စက်တင်ဘာ ၅ရက်တွင် အပြီးသတ်သိမ်းနိုင်ခဲ့ကြောင်း AAက စက်တင်ဘာလ ၆ရက်တွင် သတင်းထုတ်ပြန်ခဲ့သည်။ ထိုကြောင့် သံတွဲ မြို့နှင့် သံတွဲ မြို့နယ်တစ်ခုလုံးကိုအာရက္ခတပ်တော်(AA)က သိမ်းပိုက်ထိန်းချုပ်ထားခြင်းဖြစ်သည်။
စစ်ကောင်စီ၏လေကြောင်းရန်ကြောင့် ဒေသခံများပြန်လည်နေထိုင်ခြင်းမရှိသေးဘဲ ယာယီစစ်ဘေးရှောင်စခန်းများ၌ နေထိုင်ကြသည်။ ယခုအခါ စစ်ကောင်စီက စစ်ဘေးရှောင်စခန်းကို ဦးတည်တိုက်ခိုက်သွားခြင်းဖြစ်သည်။
စစ်ကောင်စီဝါဒဖြန့် တယ်လီဂရန်အချို့ကမူ ထိုရုံးများတွင် AA တပ်ဖွဲ့ဝင် တစ်ထောင်ကျော်နေပြီးများစွာသေဆုံး ဒဏ်ရာရသွားကြောင်းသတင်းအမှားတင်နေကြသည်ကိုတွေ့ရသည်။
စစ်ရှောင်စခန်း ထိခိုက်ပျက်စီးမှုနှင့် သေဆုံး ၊ဒဏ်ရာရသူများ၏ သတင်းဓါတ်ပုံများကို ရခိုင်ဒေသတွင်းမီဒီယာတစ်ခုဖြစ်သော Arakan Princess Media က ဖော်ပြရာသေဆုံးသူများတွင် ကလေးငယ်နှင့် အမျိုးသမီး အများစုဖြစ်နေသည်ကိုတွေ့ရသည်။ သတင်းဓါတ်ပုံများကို People’s Spring တယ်လီဂရန် https://t.me/PeopleSpring/56490? တွင် ကြည့်ရှုနိုင်ပါသည်။
စစ်ကောင်စီသည် စက်တင်ဘာ ၂၅ ရက်ညကလည်း ရခိုင်ပြည်နယ်မြေပုံမြို့ကို လေကြောင်းမှဗုံးလေးလုံးကြဲချတိုက်ခိုက်ခဲ့ကြောင်း ဒေသခံများထံမှသိရသည်။ ထိခိုက်ပျက်စီးမှုမှုကိုမသိရသေးပေ။ ထို့အပြင် စက်တင်ဘာလ ၂၄ ရက်နေ့ ညနေ ၇ နာရီ ၄၀ မိနစ်တွင် တောင်ကုတ်မြို့နယ်၊ တန်းလွဲရွာမကို လေကြောင်းမှ ဗုံးကြဲတိုက်ခိုက်ရာ အရပ်သားနှစ်ဦးသေဆုံးပြီး ငါးဦးဒဏ်ရာရရှိခဲ့သည်။
စစ်ကောင်စီတပ်သည် ယခုလပိုင်းအတွင်း တော်လှန်ရေးတပ်များသိမ်းပိုက်ထားသော မြို့များကို လေကြောင်းမှ ဗုံးကြဲ၍ ဆက်တိုက် အကြမ်းဖက်နေပြီး ဒေသခံ ပြည်သူအများအပြားသေဆုံးနေသည်။
