ဟန်နွေ/People’s Spring
ကရင်အမျိုးသားအစည်းအရုံး(KNU) ဖာပွန်(မူတြော်)ခရိုင် တပ်မဟာ(၅)နယ်မြေတွင် စက်တင်ဘာအတွင်း တိုက်ပွဲများအတွင်း စစ်ကောင်စီဘက်က တပ်ရင်းမှူးအပါအဝင် သေဆုံးသူ ၇၄ ဦးရှိခဲ့ကြောင်း KNU တပ်မဟာ(၅) က သတင်းထုတ်ပြန်သည်။
စက်တင်ဘာ ၁ရက်မှ ၃၀ရက်အထိ ဖာပွန်ခရိုင် အတွင်း ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၅) ပူးပေါင်းတပ် နှင့် စစ်ကောင်စီတပ်အကြား တိုက်ပွဲ ၁၄၄ ကြိမ်ရှိခဲ့သည်ဟု အသိပေးသည်။
တိုက်ပွဲအတွင်း သေဆုံးခဲ့သည့် စစ်ကောင်စီတပ်ဖွဲ့ဝင်များတွင် တပ်ရင်းမှူး တစ်ဦး၊ တပ်ခွဲမှူး နှစ်ဦး နှင့် ဒုတပ်ခွဲမှူးတစ်ဦး ပါဝင်သည်ဟုဆိုသည်။
Public Service Announcement
ထို့ပြင် တပ်ရင်းမှူးအပါအဝင် စစ်ကောင်စီတပ်ဖွဲ့ဝင် ၄၁ဦးဒဏ်ရာရခဲ့ကြောင်း KNUက ထုတ်ပြန်သည်။
တိုက်ပွဲအတွင်း လက်နက်ခဲယမ်းသိမ်းပိုက်ရရှိမှု ရှိ၊မရှိ နှင့် KNLA ပူးပေါင်းတပ်မှ ကျဆုံးထိခိုက် ရှိမရှိ အခြေအနေများ ဖော်ပြမထားပေ။
စစ်ကောင်စီတပ်မှလည်း လက်နက်ကြီးရမ်းသမ်းပစ်ခတ်မှုများပြုလုပ်ခဲ့ရာ အရပ်သားပြည်သူ ၁ဦးသေဆုံးကာ ၅ဦး ဒဏ်ရာရခဲ့သည်ဟု ဆိုသည်။
စစ်ကောင်စီတပ်သည် စက်တင်ဘာ ၃၀ရက် မွန်းလွဲပိုင်းကလည်း ဖာပွန်မြို့ကို လေကြောင်း ဗုံးကြဲတိုက်ခိုက်ခဲ့ရာ အမျိုးသမီးတစ်ဦးသေဆုံးခဲ့သည်ဟု KNU တပ်မဟာ(၅)က ထုတ်ပြန်သည်။
KNLA တပ်မဟာ(၅)ပူးပေါင်းတပ်ဖွဲ့များသည်ဖာပွန်မြို့ နယ်တစ်ခုလုံးအပြီးသတ် သိမ်းပိုက်နိုင်ရေး အတွက် စစ်ကောင်စီတပ်များကို ပိတ်ဆို့တိုက်ခိုက်မှု၊ ပြောက်ကျားတိုက်ခိုက်မှုများ ပြုလုပ်လျက်ရှိရာ လက်ရှိတွင် မြို့ကို ထိန်းချုပ် ထားသည်။
