ဇေအောင်/People’s Spring
စစ်ကိုင်းတိုင်း၊ ရွှေဘိုခရိုင်၊ ဒီပဲယင်းမြို့နယ်တွင် စစ်ဘေးရှောင်များအား ဆေးကုသပေးနေသော S&C အဖွဲ့၏ ဆေးခန်း၌ လူနာများပြားနေပြီး ဆေးဝါးများလိုအပ်နေကြောင်း အဆိုပါအဖွဲ့တာဝန်ခံက ကိုစိုးမိုးအောင်က ပြောသည်။
ဒီပဲယင်းမြို့နယ်တွင် ဖွင့်လှစ်ထားသည့် S&Cအဖွဲ၏ ဆေးခန်းတွင် ဒီပဲယင်းမြို့နယ်အပြင် ရွှေဘိုနှင့် အရာတော်မြို့နယ်ရှိ ဒေသခံပြည်သူများ၊ စစ်ဘေးရှောင်များ စုပြုံဝင်ရောက်ကာ လာရောက်ကုသနေ၍ လူနာအရေအတွက် မြင့်တက်နေကြောင်း S&C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့၏ တာဝန်ခံ ကိုစိုးမိုးအောင်က ပြောသည်။
Public Service Announcement
ထို့ကြောင့် ဆေးဝါးများပိုမိုကုန်ကျကာ လိုအပ်မှုရှိနေကြောင်း ၎င်းက ပြောသည်။
” ကူညီလှူဒါန်းမှုအားကလည်း လျော့ကျတယ်။ လျော့ကျတယ်ဆိုတာကလည်း နှစ်ကကြာလာတော့ တခေါက်တခေါက် ဆေးဖိုးတွေကိုက ကျွန်တော်တို့ သိန်းရာနဲ့ချီပြီးတော့ ရှင်းရတယ်။ အခုကပိုဆိုးတာပေါ့။ ဆေးစျေးတွေက တက်နေတော့ စဖွင့်ခါစနဲ့စာရင် နှစ်ဆလောက်ပေးနေရတယ်။”ဟု ကိုစိုးမိုးအောင်က ရှင်းပြသည်။
S&C မီးဘေးစစ်ဘေးပညာရေးကူညီစောင့်ရှောက်ရေးအဖွဲ့၏ ဆေးခန်းသည် တစ်လလျှင် လူနာလူဦးရေ ၅၀၀အထက်မှ ၇၀ဝ ခန့်အထိ ကုသပေးနေကြောင်း၊ ဆေးခန်းဖွင့်လှစ်မှု ၁၄လကျော်ကာလအတွင်း လူဦးရေ ရှစ်ထောင်ကျော် ကုသပေးနိုင်ခဲ့ကြောင်း သိရသည်။
ဆေးခန်းသို့ ဖျားနာလူနာအများဆုံးလာရောက်ပြီး ကိုယ်ဝန်ဆောင်မိခင်များ၊ ထိခိုက်ရှနာနှင့် အသေးစားခွဲစိတ်ရမည့်လူနာများ၊ မြွေကိုက်ခံရသည့်လူနာများ အများဆုံး လာရောက်လေ့ရှိကြောင်း သတင်းရရှိသည်။
