ဇေအောင်/People’s Spring
စစ်ကိုင်းတိုင်း၊ မြောင်မြို့နယ်၊ ဇရပ်ကုန်းကျေးရွာကို စစ်ကောင်စီက တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့ရာ ကလေးတစ်ဦးအပါအဝင် ပြည်သူ ၆ဦး သေဆုံးခဲ့ကြောင်း သတင်းရရှိသည်။
ယမန်နေ့(အောက်တိုဘာ ၂၃ ရက်) ညနေ ၅ နာရီ မိနစ်၂၀ခန့်က ဇရပ်ကုန်းကျေးရွာကို စစ်ကောင်စီက တိုက်ပွဲဖြစ်ပွားခြင်းမရှိဘဲ တိုက်လေယာဉ် ၂ စီးဖြင့် ဗုံးကြဲတိုက်ခိုက်ခဲ့ရာ အသက်(၈၀) ဝန်းကျင်အဘွားအို တစ်ဦးနှင့် အသက် (၁၅)နှစ် အရွယ် မိန်းကလေးတစ်ဦး အပါအဝင် ပြည်သူ ၆ဦး သေဆုံးခဲ့ပြီး ၇ ဦး ဒဏ်ရာရရှိခဲ့ကြောင်း ဒေသခံများက ပြောသည်။
“ဖိုက်တာနဲ့ Y12 နဲ့ နှစ်စီးချသွားတယ်။ ၁၅ မိနစ်လောက်ကြာတယ်။ ရွာထဲပြည်သူတွေနေတဲ့ လူနေအိမ် ၂ လုံးကြားကိုချတာ။ လုံးဝတိုက်ပွဲဖြစ်ပွားခြင်းမရှိပါဘူး။”ဟု ဒေသကာကွယ်ရေးရဲဘော်တစ်ဦးက ပြောသည်။
Public Service Announcement
ဒဏ်ရာရရှိသူများမှာလည်း စိုးရိမ်ရသည့်အခြေအနေရှိ၍ ဆေးကုသမှုခံယူနေရကြောင်း သိရသည်။
ထို့အပြင် လေကြောင်းတိုက်ခိုက်မှုကြောင့်နေအိမ် ၄လုံးနှင့် အိမ်မွေးတိရိစ္ဆာန်အချို့ သေကြေပျက်စီးခဲ့ကြောင်း ဒေသခံများက ပြောသည်။
အလားတူ ယမန်နေ့ကပင် နေ့လယ် ၂ နာရီ မိနစ် ၄၀ ခန့်က နွားထိုးကြီးမြို့နယ်၊ မင်းစုံတောင်ပေါဘုန်းကြီးကျောင်းကိုစစ်တပ်က ဂျက်ဖိုက်တာဖြင့် ၄ ကြိမ်လေကြောင်းတိုက်ခိုက်ခဲ့ရာ သက်တော် (၈၀)ဝန်းကျင် ကျောင်းထိုင်ဆရာတော် ထိခိုက်ဒဏ်ရာရရှိခဲ့ကြောင်း၊ ထို့အပြင် ဘုန်းကြီးကျောင်းနှင့် ဓမ္မာရုံပါ ပြိုကျပျက်စီးသွားကြောင်း ဒေသခံများက ပြောသည်။
ထို့အပြင် ယမန်နေ့ကပင် ရှမ်းပြည်နယ်မြောက် ပိုင်း လားရှိုးမြို့ကို စစ်ကောင်စီက တနေ့တည်းလေးကြိမ် လေကြောင်းတိုက်ခိုက်ခဲ့ရာ ပြည်သူထိခိုက်မှုများရှိခဲ့သည်။
မြန်မာနိုင်ငံတစ်ဝန်း ဇူလိုင်မှ စက်တင်ဘာအထိ ၃ လတာ ကာလအတွင်း တိုက်ပွဲများနှင့် စစ်ကောင်စီတပ်၏ ပစ်မှတ်ထားတိုက်ခိုက်မှုကြောင့် ပြည်သူ ၁,၂၄၄ ဦးသေဆုံးခဲ့ကြောင်း ဉာဏ်လင်းသစ်သုတေသနအဖွဲ့က ထုတ်ပြန်ထားသည်။
