နွေဦးတော်လှန်ရေးကာလတွင် ချင်းအမျိုးသားတပ်ဦး(CNF/CNA) နှင့်အတူ တိုက်ပွဲဝင်ခဲ့သည့် ဆေးတက္ကသိုလ် ကျောင်းသား ကိုနိုင်ထူးလွင်သည် ဖလမ်း- ဟားခါးလမ်း တိုက်ပွဲတွင် ကျဆုံးခဲ့ကြောင်း CNF ပြောရေးဆိုခွင့်ရှိသူ ဆလိုင်းထက်နီက အတည်ပြုသည်။
ဖလမ်း- ဟားခါး လမ်းတွင် ရီယာလ်သီး ရွာအနီး ကားလမ်းဘေး တစ်နေရာတွင် အောက်တိုဘာ ၂၃ရက်က တွေ့ရှိခဲ့သည့် အမျိုးသားအလောင်းမှာ မကွေးမြို့တွင်နေထိုင်သော ရန်ကုန် ဆေတက္ကသိုလ်(၂) ကျောင်းသား အသက် ၂၀အရွယ် ကိုနိုင်ထူးလွင်ဖြစ်သည်ဟု The Chin Journal က ဖော်ပြသည်။
“အောက်တိုဘာ ၁၃၊ ၁၄ရက် ဖလမ်းနဲ့ ဟားခါးကြား တိုက်ပွဲမှာ တိုက်ပွဲကနေ ခဏဆုတ်တဲ့အချိန်မှာ ကျွန်တော်တို့ ဆေးဆရာဝန်က ဆုတ်လမ်းက မှားသွားတယ်။ အဲဒီကတည်းက ပျောက်သွားတာ။ ကျွန်တော်တို့ လိုက်ရှာတာ မတွေ့ဘူး။ ဒါပေမဲ့ မနေ့က အလောင်းက ရိယာလ်သီး ကျေးရွာ၊ စစ်ကောင်စီကနေ နေအိမ်တွေ ဘုရားကျောင်းတွေ မီးရှို့တဲ့ရွာနားက တောထဲမှာ ပြန်တွေ့ရတာပေါ့” ဟု ဆလိုင်းထက်နီက ပြောသည်။
အဆိုပါ လူငယ်သည် စစ်တပ်အာဏာသိမ်းပြီးနောက်ပိုင်း ပြည်မမှလာရောက်ပြီး CNF ၏ ချင်းအမျိုးသားတပ်မတော်တွင် ဆေးဆရာဝန်အဖြစ် တာဝန်ထမ်းဆောင်ရင်း ဖလမ်း- ဟားခါးလမ်း တိုက်ပွဲ၌ ကျဆုံးခဲ့ခြင်းဖြစ်သည်ဟု ၎င်းကရှင်းပြသည်။
Public Service Announcement
ထို့အပြင် ထန်တလန်မြို့နယ် ချင်းပြည်ကာကွယ်ရေးတပ်ဖွဲ့(CDF) မှ လူငယ်နှစ်ဦးသည်လည်း အောက်တိုဘာ ၂၃ရက်က ရှေ့တန်းတစ်နေရာ၌ ကျဆုံးခဲ့သည်ဟု CDFက ထုတ်ပြန်ထားသည်။
အသေးစိတ်အခြေအနေကို မသိရသေးသော်လည်း အဆိုပါလူငယ် ၂ဦးသည် စစ်ကောင်စီကထောင်ထားသော မိုင်းနင်းမိ၍ ကျဆုံးခဲ့ ခြင်းဖြစ်သည်ဟု ဆလိုင်းထက်နီက ပြောသည်။
စစ်အာဏာရှင်ဖြုတ်ချရေးတိုက်ပွဲဝင်ရင်း ဘ၀နှင့် အသက်ကို ပေးခဲ့ရသူများကိုလေးစားဂါရ၀ပြုကြောင်း လည်း ဆလိုင်းထက်နီက ပြောသည်။
လတ်တလောတွင် စစ်ကောင်စီတပ်သည် ချင်းပြည်နယ်တွင်းသို့ အင်အားဖြည့်တင်းပြီး ထိုးစစ်ဆင်ရန် ပြင်ဆင်နေရာ ချင်းလက်နက်ကိုင်အဖွဲ့များက ပြန်လည်ခုခံတိုက်ခိုက်သွားမည်ဟု CNFက ပြောသည်။
