ထားမြတ်/People’s Spring
ပဲခူးတိုင်းဒေသကြီး၊ ကျောက်တံခါးမြို့နယ်၊ ဆင်ရိုးခင်ကျေးရွာတွင် တပ်စွဲထားသော စစ်ကောင်စီတပ်အား တိုက်ခိုက်ရာတွင် စစ်ကောင်စီတပ်က ၃ဦးသေဆုံးကာ လက်နက်ခဲယမ်းများ သိမ်းရခဲ့ကြောင်း အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာန ၊ပြည်သူ့ကာကွယ်ရေးတပ်မတော် တောင်ပိုင်းစစ်ဒေသက သတင်းထုတ်ပြန်သည်။
အဆိုပါ စစ်ကောင်စီတပ်ဖွဲ့ကို တောင်ပိုင်းစစ်ဒေသ၊ အမှတ် ၂ စစ်ဒေသခွဲ၊ တပ်ရင်း ၃၇၀၂၊ အထူးကွန်မန်ဒိုတပ်ရင်း ရိုးမ ၂ စစ်ကြောင်းနှင့် KNLA တပ်ရင်း ၉ ပူးပေါင်းတပ်ဖွဲ့တို့က နိုဝင်ဘာ ၁ ရက်နေ့က ဝင်ရောက်တိုက်ခိုက်ခဲ့ခြင်းဖြစ်သည်ဟု နိုဝင်ဘာ ၄ ရက်တွင်ထုတ်ပြန်အသိပေးသည်။
တိုက်ပွဲတွင် စစ်ကောင်စီတပ်၏ G3 ၁ လက်၊ G3 ကျည် ၁၇၄ တောင့်၊ G3 ကျည်ဘောက် ၃ ခု၊ ကိုးလုံးကျည် (၂၉) တောင့် နှင့် အခြားလက်လုပ်သေနတ်များကို သိမ်းဆည်းရမိခဲ့သည်ဟုဓါတ်ပုံနှင့်တကွဖော်ပြထားသည်။
Public Service Announcement
အထိနာသည့် စစ်ကောင်စီတပ်သည် ဆင်ရိုးခင်ကျေးရွာထဲသို့ လက်နက်ကြီးများပစ်ခတ်ခဲ့ရာ ပြည်သူ ၂ ဦး ထိခိုက်ဒဏ်ရာရရှိခဲ့ဟု သိရသည်။
နိုဝင်ဘာ ၁ရက်နေ့ကလည်း တောင်ပိုင်းစစ်ဒေသ နယ်မြေရှိ ပဲခူးတိုင်း ကျောက်ကြီးမြို့နယ် ရွာကြီးအင်းကျေးရွာ၌လည်း တိုက်ပွဲဖြစ်ပွားခဲ့ရာ စစ်ကောင်စီတပ် အထိနာခဲ့သည်။
PDF/KNLA ပူးပေါင်းတပ်များ၏ တိုက်ခိုက်မှုကြောင့် ရွာကြီးအင်းရွာ တိုက်ပွဲ၌ စစ်ကောင်စီတပ်က ၁၀ဦး သေဆုံးကာ ၁၅ ဦး ဒဏ်ရာရရှိခဲ့သည်။ထိုတိုက်ပွဲတွင်စစ်ကောင်စီတပ်က လေကြောင်း ပစ်ကူပေးသော်လည်း တော်လှန်ရေး ပူးပေါင်းတပ်မှ ထိခိုက်မှုမရှိ ဆုတ်ခွာနိုင်ခဲ့ကြောင်း တောင်ပိုင်းစစ်ဒေသက ထုတ်ပြန်ထားသည်။
