နိုင်ပကောင်း/People’s Spring
ကရင့်လက်နက်ကိုင်အဖွဲ့ အစည်းတစ်ခုဖြစ်တဲ့ ဒီမိုကရေစီ အကျိုးပြု ကရင့် တပ်မတော် (DKBA) က ဒုတိယစစ်ဦးချုပ်ရာထူးအပါအဝင် ထိပ်ပိုင်းရာထူးနေရာ အချို့ ကို အပြောင်းအလဲ ပြုလုပ်လိုက်တယ်လို့ ဒီဇင်ဘာလ ၃ ရက်က ကြေညာပါတယ်။
တပ်ဖွဲ့ရဲ့ ဗဟိုအလုပ်အမှုဆောင်ကော်မတီ အစည်းအဝေးဆုံးဖြတ်ချက်အရ ဗဟိုစစ်ကွပ်ကဲရေးမှုး ဗိုလ်မှုးချုပ် စောရွှေဝ ၊ ဗဟို အခြေချ စစ်ဗျုဟာမှုး ဗိုလ်မှုးကြီးစောဆန်းအောင် ၊ ဒုစစ်ဦးစီးချုပ် ဒု ဗိုလ်ချုပ်ကြီး စောတာ့ခူးတို့ ကို ရာထူးအပြောင်းအလဲပြုလုပ်တာလို့ သိရပါတယ်။
ဗဟိုစစ်ကွပ်ကဲရေးမှူး ဗိုလ်မှူးချုပ်စောရွှေဝကို ဒုဗိုလ်ချုပ်ကြီးအဆင့်ဖြင့် ဒုစစ်ဦးစီးချုပ်၊ ဗဟိုအခြေချစစ်ဗျူဟာမှူး ဗိုလ်မှူးကြီးစောဆန်းအောင်ကို ဗိုလ်ချုပ်အဆင့်ဖြင့် စစ်ဦးစီးအရာရှိချုပ်၊ ဒုစစ်ဦးစီးချုပ် ဗိုလ်ချုပ်ကြီးစောတာ့ခူးကို DKBA ဗဟိုအကြံပေးအဖွဲ့ (နာယက)အဖြစ် တာဝန်ထမ်းဆောင်ဖို့ တာဝန်ပေးလိုက်တာပါ။
Public Service Announcement
အခုလို ထိပ်ပိုင်းနေရာတွေကို အပြောင်းအလဲ ပြုလုပ်တာက ဒုချုပ် ဖြစ်သူ ဒုဗိုလ်ချုပ်ကြီး စောတာ့ခူး ကျန်းမာရေးအရ အဖွဲ့အစည်း တာဝန်တွေကို ထိထိရောက်ရောက်မလုပ်ဆောင်နိုင်တာကြောင့် ဖြစ်တယ်လို့ DKBA တပ်ဖွဲ့ ပြောရေးဆိုခွင့်ရှိသူ ဗိုလ်မှုးကြီး စောစိန်ဝင်းကပြောပါတယ်။
“နဂိုဒုချုပ်ကတော့ ကျန်းမာရေးကတော့ အဖွဲ့အစည်းရဲ့အလုပ်တွေကို ထိထိရောက်ရောက်မလုပ်နိုင်ဘူးပေါ့လေ ၊အလားတူ ဦးစီးချုပ်ကလည်း အသက်အရွယ် လူငယ်တစ်ယောက်လို မသွားလာနိုင်တဲ့အခါကျတော့ အဲ့ဒီနားမှာ ဒုချုပ်ကို အစားထိုးအလဲအလှယ်လုပ်တဲ့သဘောပေါ့ ၊ တပ်ဖွဲ့ရဲ့ ဦးဆောင်မှုအခန်းကဏ္ဍ နည်းနည်းအားကောင်းလာအောင်ပေါ့” လို့ ဗိုလ်မှုးကြီးစောစိန်ဝင်းက ပြောပါတယ်။
DKBA ရဲ့ စစ်ဦးစီးအရာရှိချုပ် ဖြစ်လာသူ ဗိုလ်ချုပ်စောဆန်းအောင်ဟာ ယခင်စစ်အစိုးရ လက်ထက် ကကျင်းပတဲ့ ၂၀၁၀ ရွေးကောက်ပွဲ ကာလအတွင်း မြဝတီ မှာ စစ်ကောင်စီတပ်နဲ့ဖြစ်ပွားတဲ့တိုက်ပွဲတွေကို ဦးဆောင်တိုက်ခိုက်ခဲ့သူ ဖြစ်ပါတယ်။
“ဆန်းအောင်ကလည်း သူက SAC (စစ်ကောင်စီ)နဲ့သော်လည်းကောင်း ၊သက်ဆိုင်ရာတော်လှန်ရေးအဖွဲ့အစည်းတွေနဲ့သော်လည်းကောင်း ၊ကရင်လက်နက်ကိုင်တော်လှန်ရေးအဖွဲ့နဲ့သော်လည်းကောင်း အကုန်လုံး သဟဇာတ ဆက်ဆံတတ်တယ်လေ” လို့ DKBA ပြောရေးဆိုခွင့်ရှိသူ ဗိုလ်မှုးကြီးစောစိန်ဝင်းက ဆိုပါတယ်။
လက်ရှိ DKBA တပ်ဖွဲ့ရဲ့ ရပ်တည်ချက်ကတော့ မည်သူနဲ့မျှ ရန်သူမဖြစ်ရေးမူနဲ့ အဖွဲ့အစည်းအားလုံးနဲ့ သဟဇာတ ဖြစ်အောင် ဆက်ဆံ ရပ်တည်သွားမယ်လို့ ဗိုလ်မှုးကြီးစောစိန်ဝင်က ပြောပါတယ်။
ကရင်ပြည်နယ်၊ မြ၀တီမြို့နယ် ဒေါနတောင်အရှေ့ဘက်ခြမ်း ထိုင်းနယ်စပ် ဝေါ်လေမြို့အနီး ဆုံဆည်းမြိုင်ကျေးရွာမှာ ဗဟိုဌာနချုပ်တည်ရှိတဲ့ DKBA တပ်ဖွဲ့ဟာ ဦးသိန်းစိန်အစိုးရ လက်ထက်မှာ တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ရေးထိုးခဲ့တဲ့တိုင်းရင်းသား လက်နက်ကိုင်အဖွဲ့ ဖြစ်ပါတယ်။
၂၀၂၁ ခုနှစ် မှာ စစ်တပ်က တကျော့ပြန်အာဏာသိမ်းပြီးနောက် DKBA ဟာ စစ်ကောင်စီနဲ့ နေပြည်တော် မှာ တွေ့ဆုံဆွေးနွေးတာတွေ ပြုလုပ်ခဲ့ပါတယ်။
