NUGက ငွေတိုက်စာချုပ် ဒေါ်လာတစ်ဘီလီယံဖိုးထုတ်ရောင်း

အာဏာသိမ်းစစ်ကောင်စီကငွေတိုက်စာချုပ်များထုတ်ရောင်းသော်လည်းဝယ်သူမရှိချိန်တွင်အမျိုးသားညီညွတ်ရေးအစိုးရ(NUG)က အတိုးမဲ့ငွေတိုက်ချုပ်များအဖြစ် ဒေါ်လာ တစ်ဘီလီယံဖိုး ရောင်းချမည်ဖြစ်ကြောင်း ယနေ့(အောက်တိုဘာ ၂၇ ရက်) ထုတ်ပြန်သည်။

အဆိုပါငွေတိုက်စာချုပ်များကို နွေဦးတော်လှန်ရေး အထူးငွေတိုက်စာချုပ်ဟု ခေါ်ဆိုပြီး သက်တမ်း(၂)နှစ်ရှိမည်ဖြစ်ကြောင်းအမျိုးသားညီညွတ်ရေးအစိုးရ အဖွဲ့၊ စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာနက ထုတ်ပြန်ထားသည်။

ကမ္ဘာ့သမိုင်းတွင် တော်လှန်ရေးအစိုးရက အတိုးမဲ့ငွေတိုက်စာချုပ်များထုတ်ရောင်းခြင်းသည် ပထမဦးဆုံးအကြိမ်ဖြစ်ပြီး စစ်အာဏာရှင်ကို အဆုံးစွန်တော်လှန်မည့် မြန်မာပြည်သူများအတွက် သမိုင်းမော်ကွန်းဖြစ်သည်ဟုNUGက ဖော်ပြထားသည်။

အဆိုပါငွေတိုက်စာချုပ်များကို ဒေါ်လာ ၁၀၀၊၅၀၀၊ ၁ ၀၀၀နှင့် ၅,၀၀၀ တန်စာချုပ်များအဖြစ် နိုဝင်ဘာလဆန်းတွင် ရောင်းချမည်ဟု NUG စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာန ဦးတင်ထွန်းနိုင်က ပြောသည်။

Public Service Announcement

ထိုငွေတိုက်စာချုပ်များကို နိုင်ငံခြားဘဏ်စာရင်းများဖြင့်သာ ဝယ်ယူနိုင်မည်ဖြစ်ပြီး ပြည်တွင်းဘဏ်များကတစ်ဆင့်ဝယ်ယူနိုင်မည် မဟုတ်ကြောင်းလည်း ၎င်းကဆိုသည်။

NUG၏ ငွေတိုက်စာချုပ်များသည် စီးပွားရေးအကျိုး အမြတ်ထက် တော်လှန်ရေးတွန်အားပေါ်မူတည်နေပြီး စိတ်ခံစားချက်ဖြင့် ဝယ်ယူကြမည်ဖြစ်ကြောင်း စီးပွား ရေးလုပ်ငန်းရှင်တစ်ဦးက ပြောသည်။

“အတိုးလိုချင်တာထက် လူထုက တော်လှန်ရေးဆိုတဲ့ စိတ်နဲ့ပဲဝယ်ကြမှာပါ။ဝယ်ပြီးတော့ ငွေပြန်မယူဘဲ စာချုပ် ကို သိမ်းထားမယ့်သူတွေလဲရှိလာမှာ”ဟု စီးပွားရေးလုပ်ငန်းရှင်တစ်ဦးက ပြောသည်။

ငွေတိုက်စာချုပ်ဆိုသည် အစိုးရတစ်ရပ်အတွက် ဘတ်ဂျတ်လိုငွေကို အများပြည်သူထံမှချေးငွေရယူခြင်းဖြစ်သည်။ ထိုချေးငွေအတွက် အစိုးရက နှစ်အလိုက် အတိုးသတ်မှတ်ပေးထားသော ကတိကဝတ်စာချုပ်များထုတ်ပေးခြင်းကို ငွေတိုက်စာချုပ်ဟုဆိုသည်။

မြန်မာနိုင်ငံတွင် ငွေတိုက်စာချုပ်များကို ငွေတိုက်ဦးစီးဌာနအစား ဗဟိုဘဏ်က ဘဏ်များကို ထုတ်ရောင်းပေးလေ့ရှိသည်။ အရပ်သားအစိုးရလက်ထက်တွင် ငွေတိုက်စာချုပ်များကို သက်တမ်း နှစ်နှစ်နှင့် သက်တမ်း လေးနှစ်ခုဟူ၍ နှစ်မျိုးရောင်းချခဲ့ပြီး အတိုးနှုန်းမှာ တစ်နှစ်လျှင် ၇ ဒသမ ၂၅ နှင့် ၇ ဒသမ ၅ ရာခိုင်နှုန်းဖြစ်သည်။

စစ်တပ်က အာဏာသိမ်းပြီးနောက် ပထမဦးဆုံးအနေဖြင့် ၂၀၂၁ဖေဖော်ဝါရီ ၁၈ရက် ငွေတိုက်စာချုပ် ကျပ် ဘီလီယံ ၂၀၀ဖိုးကိုလေလံစနစ်ဖြင့် အကြမ်းဖက်စစ်ကောင်စီက ထုတ်ရောင်းခဲ့သည်။ သို့သော်လည်း လေလံပွဲရလာဒ်များ ထုတ်ပြန်ရာတွင် ကျပ်၁ ဒသမ ၇ ဘီလီယံသာ ရောင်းချနိုင်ခဲ့သည်ဟု ငွေတိုက်ဦးစီးဌာနက ထုတ် ပြန်သည်။

အကြမ်းဖက်စစ်ကောင်စီက ငွေတိုက်စာချုပ်များအနက် (၂)နှစ်သက်တမ်းရှိသည့် ငွေတိုက်စာချုပ်ကို အတိုးနှုန်း ၈ဒသမ ၇၅ ရာခိုင်နှုန်းပေးမည်ဟု ထုတ်ပြန်ထားသည်။ သို့သော် စစ်ကောင်စီက ထုတ်ရောင်းသည့် ငွေတိုက်စာချုပ်များကို ဝယ်ယူသူမရှိဟု ဘဏ်အသိုင်းအဝိုင်းသိရသည်။