အိမ်၊ခြံ၊မြေနှင့် ရွှေအရောင်းအဝယ်အတွက် ဘဏ်စနစ်ကိုမဖြစ်မနေသုံးရန် စစ်ကောင်စီ၏ဗဟိုဘဏ် စီစဥ်နေပြန်

အိမ်၊ခြံ၊မြေနှင့် ရွှေများရောင်းဝယ်ယူရာတွင် ငွေကြေးပေးချေမှုများအတွက် ဘဏ်စနစ်မဖြစ်မနေ အသုံးပြုပေးချေရန် အကြမ်းဖက်စစ်ကောင်စီ၏ ဗဟိုဘဏ်က စီစဉ်နေသည်။

အိမ်၊ခြံ၊မြေနှင့်ရွှေများ အရောင်းအဝယ်ပြုလုပ်ရာတွင် ပမာဏတစ်ခုကျော်လွန်ပါက ငွေပေးချေမူကို ဘဏ်ဖြင့်သာ မဖြစ်မနေဆောင်ရွက်ရန် ဖြစ်ကြောင်း အာဏာလုစစ်ကောင်စီ၏ ဗဟိုဘဏ်ဒုတိယဥက္ကဌ ဒေါ်သန်းသန်းဆွေက စီစဉ်နေခြင်းဖြစ်သည်။

ထိုစနစ်အကောင်အထည်ဖော်ရေးအတွက် အကြမ်းဖက်စစ်ကောင်စီ၏ ဗဟိုဘဏ် ဒုဥက္ကဌသည် ရန်ကုန်နှင့် မန္တလေးမြို့တို့ရှိ ရွှေလုပ်ငန်းရှင်များနှင့် အိမ်၊ခြံ၊မြေဝန်ဆောင်မှုအသင်းတို့က အောက်တိုဘာ ၂၆ ရက်တွင် တွေ့ဆုံခဲ့သည်။ ထိုအစည်းအဝေးတွင် စစ်ကောင်စီ၏ လက်အောက်ခံ ဌာနများဖြစ်သည့် ပြည်တွင်းအခွန်များဦးစီးဌာန၊ ငွေကြေးဆိုင်ရာစုံစမ်းထောက်လှမ်းရေးအဖွဲ့အများအပြင် အရပ်အဖွဲ့အစည်းများဖြစ်သည့် ဘဏ်များအသင်း၊ ကုန်သည်စက်မူအသင်းချုပ်တို့လည်း ပါဝင်တတ်ရောက်ခဲ့သည်။

ထိုတွေ့ဆုံမှုတွင် အိမ်၊ခြံ၊မြေနှင့် ရွှေအရောင်းအဝယ်ပြုလုပ်ရာတွင် ငွေကြေးဆိုင်ရာ စုံစမ်းထောက်လှမ်းရေးအဖွဲ့ထံ သတင်းပေးပို့ရန်လည်းပါဝင်သည်။

Public Service Announcement

ငွေကြေးပမာဏသတ်မှတ်ရန် ဆွေးနွေးနေဆဲဖြစ်သည်ဟု ရွှေလုပ်ငန်းရှင်အသင်းမှ တာဝန်ရှိသူတစ်ဦးကပြောသည်။ ထိုစနစ်ကိုလုပ်ဆောင်ရန် စည်းရုံးရမည့် ကာလတစ်ခုလိုအပ်နေပြီး ထပ်မံဆွေးနွေးရဦးမည်ဟု ၎င်းက ဆိုသည်။

ယခုကန့်သတ်ထိန်းချုပ်သည် ပြည်တွင်းဘဏ်များ ပြန်လည် လည်ပတ်နိုင်ရန်အတွက် အဓိက ဖြစ်နိုင်ပြီး အခွန်နှင့် ငွေကြေးစီးဆင်းမှုကို ထိန်းချုပ်လို့သဘောဖြစ်သည်ဟု အိမ်၊ခြံ၊မြေအကျိုးဆောင်လုပ်ကိုင်နေသူတစ်ဦးက ပြောသည်။

ဘဏ်များတွင်ငွေထုတ်ခွင့်မပေးဘဲ ဘဏ်ဖြင့်ငွေပေးချေမှုလုပ်ခိုင်းခြင်းသည် မဖြစ်နိုင်ဟု အိမ်၊ခြံ၊မြေ အကျိုးဆောင်လုပ်ကိုင်နေသူတစ်ဦးက ပြောသည်။

“ဒီလိုလုပ်တယ်ဆိုတာ သူတို့မှာ အကြံတုံး ဉာဏ်တုံးနဲ့ ဘာအတွေးအခေါ်မှ မရှိဘူးဆိုတာပြနေတာပဲ။ တခြားနိုင်ငံသားတစ်ယောက်သာကြားရင် အတော်ဟားခံရမယ့် ကိစ္စဘဲ”ဟု ၎င်းကဆက် ပြောသည်။

စစ်တပ်က အာဏာသိမ်းပြီးနောက် ဘဏ်များမှ ငွေထုတ်ယူခွင့်ကို ကန့်သတ်ထားသည်မှာ ယနေ့အထိ့ဖြစ်သည်။ ဘဏ်များအပေါ် လူထုယုံကြည်မှု နည်းပါးနေသောယခုအချိန်တွင်ဘဏ်များက ငွေထုတ်ပေးမှုကို ရပ်တန့်လုနီးပါးဖြစ်နေသည်။