မြန်မာ ကျောင်းသားတွေကို လက်ခံ သင်ကြားပေးနေတဲ့ တရားမဝင် ကျောင်းတစ်ခု ဖွင့်လှစ်ထားတယ်ဆိုတဲ့စွပ်စွဲချက်အတွက် ခရစ်ယာန် ဘုရားကျောင်းတစ်ခုကိုထိုင်းရဲတပ်ဖွဲ့ကစီးနင်းစစ်ဆေးခဲ့ပါတယ်။
ဇန်နဝါရီ ၂၉ ရက်နေ့တုန်းက ဆူရတ်ဌာနီမှာရှိတဲ့ ဖန်ဂန် ရဲတပ်ဖွဲ့ဟာ ခိုဖန်ဂန်ခရိုင်၊ ဖန်ဂန်ခရိုင်ခွဲမှာ ဖွဲ့စည်းပါဝင်တဲ့ ဖန်ဂန်နိုင်ငံတကာ ခရစ်ယာန် ဘုရားကျောင်းကို ဝင်ရောက် စစ်ဆေးခဲ့တယ်လို့ ဒေသခံ မီဒီယာတွေက ဖော်ပြခဲ့ပါတယ်။
အဲဒီအခါမှာစာသင်နေတဲ့မြန်မာကျောင်းသူကျောင်းသား ၁၉၀ ကျော်နဲ့ မြန်မာ သင်ကြားရေးဝန်ထမ်း ၄ ဦးကို ရှာတွေ့ခဲ့တယ်လို့ ဆိုပါတယ်။ ဘုရားကျောင်းမှာ ဖွင့်ထားတဲ့ ကျောင်းဖက်ကတော့ ကလေးတွေရဲ့ မိဘတွေဟာ ခိုဖန်ဂန်မှာ ရှိနေတဲ့ ရွှေ့ပြောင်း လုပ်သားတွေဖြစ်ပြီး မိဘတွေအလုပ်ချိန်အတွင်းကလေးတွေကိုမစောင့်ရှောက်နိုင်တဲ့အတွက် အဲဒီကျောင်းမှာ လာထားကြတာလို့ ပြောပါတယ်။ ကျောင်းက ကလေးတစ်ဦးစီအတွက် တစ်လကို ဘတ် ၃၀၀ နဲ့ ၅၀၀ ကြားကောက်ခံတယ်လို့လည်း သိရပါတယ်။
ဖန်ဂန် ရဲတပ်ဖွဲ့က အခုကိစ္စနဲ့ ဆက်နွှယ်သူ အားလုံးဟာ ခွင့်ပြုချက် မရဘဲ ကျောင်းတစ်ကျောင်းကို တရားမဝင် ဖွင့်လှစ်ထားမှု၊ အလုပ်လုပ်ခွင့် ပါမစ်မရှိဘဲ နိုင်ငံခြားသားတွေကို အလုပ်ပေးထားမှုတွေအတွက် တရားစွဲဆို ခံရမယ်လို့ ပြောပါတယ်။
Public Service Announcement
ရဲတပ်ဖွဲ့ဟာမြန်မာသင်ရိုးဖတ်စာအုပ် ၃၁ အုပ်ကိုလည်း သက်သေခံတွေအဖြစ်သိမ်းယူခဲ့တယ်လို့ဆိုပါတယ် ။ ဖြစ်စဉ်နဲ့ ဆက်စပ်သူတွေကို ခိုဖန်ဂန် ရဲစခန်းဆီ ပို့ဆောင်ထားကြောင်းလည်း သိရပါတယ်။
ကိုးကား -Khaosod
