စစ်တွေမြို့အနီး တိုက်ပွဲပြင်းထန်လာ

အိမ်သွင်/People’s Spring

ရခိုင်ပြည်နယ် မြို့နယ်၊စစ်တွေမြို့နယ်အတွင်း စစ်ကောင်စီတပ် နဲ့ အာရက္ခတပ်တော်(AA)က တိုက်ပွဲဆက်ပွားနေပြီးဖေဖော်ဝါရီလ (၁၁)ရက်​နေ့ ညမှာ စစ်တွေမြို့အဝင်အမြင့်ကျွန်းက စစ်ကောင်စီစခန်းအနီး တိုက်ပွဲ​တွေပြင်းထန်ခဲ့ပါတယ်။

စစ်တွေမြို့မှာ စစ်တပ်ကဘအခိုင်အမာတပ်စွဲထားတဲ့ ရွှေမင်းဂံ၊ ပါဒလိတ် ၊ အမြင့်ကျွန်း စတဲ့နေရာ​တွေကစစ်တပ်စခန်း​တွေကို AA က ဖေဖော်ဝါရီလဆန်းကစပြီး လက်နက်ကြီး​တွေနဲ့ပစ်ခတ်တိုက်ခိုက်ခဲ့ပါတယ်။ ဒီရက်ပိုင်းမှာ​တော့ အမြင့်ကျွန်းကို AA ကအနီးကပ်တိုက်ခိုက်ခဲ့တာလို့ဒေသခံတစ်ဦးကပြောပါတယ် ။

“မျှော်လင့်ထားတဲ့အတိုင်းပါပဲ။ AAက ထိုးစစ်အရှိန်မြှင့်တဲ့သဘောပါ။ တိုက်ပွဲတွေက ပုံစံပြောင်းလာပါတယ်။ လက်နက်ကြီးတွေပစ်ခတ်နေရာကနေ အပြန်အလှန်တိုက်ပွဲဖြစ်တဲ့ပုံစံဖြစ်လာတယ်။ ရှေ့ဆက်ဘာတွေဖြစ်မယ်တော့ မခန့်မှန်းနိုင်ဘူး”ဟု ဒေသခံတဦးကပြောပါတယ်။

Public Service Announcement

AAဟာ ၂၀၂၄ ခုနှစ် ဒီဇင်ဘာလကစပြီး စစ်တွေမြို့အနီးက စစ်ကောင်စီဂိတ်စခန်း​တွေကို တိုက်ခိုက်ခဲ့တာဖြစ်ပါတယ်။

စစ်တွေမြို့အနီးဝန်းကျင် မှာ ပုဏ္ဏားကျွန်း၊ ပေါက်တော ၊ ရသေ့တောင် မြို့ ​တွေရှိပြီး အားလုံးကို AAက သိမ်းပိုက်ထိန်းချုပ်ထားပါတယ်။ စစ်​ကောင်စီတပ်ကလည်း ပင်လယ်ကမ်းရိုးတန်းထွက်ပေါက် ရေလမ်းကြောင်းကို ပိတ်ဆို့ထားသလို စစ်​တွေမြို့တွင်းမှာလည်း ခံစစ်ပြင်ဆင်ထားပါတယ် ။

“ကျောက်တော်မှာ ရတဲ့ လက်နက်ကြီးတွေကို စစ်တွေမှာ AA ထုတ်သုံးနေပြီ”လို့ ရခိုင်စစ်ရေးလေ့လာသူတစ်ဦးကပြောပါတယ်။

စစ်ကောင်စီတပ်ကလည်း ပုဏ္ဏားကျွန်း၊ ပေါက်တောနဲ့ ရသေ့တောင် မြို့နယ်​တွေဘက်ကိုလက်နက်ကြီးနဲ့ပစ်ခတ်လို့ အရပ်သားသေဆုံးမှုအချို့ရှိခဲ့ပါတယ်။

AAက ရခိုင်ပြည်နယ်မှာရှိတဲ့ မြို့နယ် ၁၄ မြို့နယ်ကို သိမ်းပိုက်ထိန်းချုပ်ထားပြီး စစ်​တွေ ၊ ​​ကျောက်ဖြူ ၊မာန်​အောင် မြို့နယ်တို့ကိုပဲ သိမ်းပိုက်ဖို့ ကျန်​တော့တာဖြစ်ပါတယ်။

စစ်တွေမြို့မှာ အိန္ဒိယနိုင်ငံကရင်းနှီးမြှုပ်နှံထားတဲ့ ကုလားတန်စီမံကိန်းရှိပြီး အဲဒီစီမံကိန်း​တွေနဲ့ မြို့မထိခိုက်ဖို့အတွက် AAက စစ်ရေးကို ပါးပါးနပ်နပ်ပုံဖော်နေတာဖြစ်တယ်လို့ စစ်ရေးသတင်းရင်းအချို့ကသုံးသပ်​ပြောကြားပါတယ်။

မြို့ခံ​တွေဟာ စစ်ဘေးတိမ်းရှောင်နေကြပြီဖြစ်​ပေမယ့်စစ်​ကောင်စီကစစ်​တွေမြို့ ဘေးပတ်ဝန်းကျင်ရွာ​တွေကဒေသခံ​တွေကိုမြို့တွင်းမှာနေရာချထားတာမျိုးရှိတယ်လို့လည်းသိရပါတယ်။

ပြီးခဲ့တဲ့ရက်ပိုင်းအတွင်း စစ်တပ်ရဲ့ ဒေသစစ်ဆင်ရေးကွပ်ကဲမှုဌာနချုပ် (ဒကစ -စစ်တွေ) လက်အောက်ခံတပ်ရင်း​တွေနဲ့ AAတို့ဟာ ကျားမသောက် ၊ကျောက်တန်းကြီး၊ ကျောက်တန်းချေ ကျေးရွာအနီးဝန်းကျင်မှာ တိုက်ပွဲဖြစ်ပွားခဲ့တယ်လို့​ဒေသခံအချို့က​ပြောပါတယ်။

စစ်တွေမြို့နယ်မှာဖြစ်ပွားနေတဲ့တိုက်ပွဲ​တွေနဲ့ပတ်သက်ပြီး​တော့ AAက အသေးစိတ်သတင်းမထုတ်ပြန်သေး​ပေမယ့် စစ်တွေမြို့အနီးဝန်းကျင်မှာ နှစ်ဖက် အပြန်အလှန် လက်နက်ကြီး၊ စနိုက်ပါ၊

ဒရုန်းပစ်ခတ်တိုက်ခိုက်မှု​တွေ နေ့တိုင်းရှိနေတယ်လို့ ဇန်နဝါရီလ၂၇ရက်နေ့က​နောက်ဆုံးထုတ်ပြန်အသိ​ပေးထားပါတယ်။

AAဟာ ဒီရက်ပိုင်းအတွင်းမှာ ရခိုင်ပြည်နယ်နဲ့ထိစပ်နေတဲ့ ဧရာဝတီတိုင်း၊ ပဲခူးတိုင်း၊ မကွေးတိုင်းနယ်စပ်ဒေသ​တွေက စစ်ကောင်စီစခန်း​တွေကိုလည်းတိုက်ခိုက်​နေပါတယ်။

တပ်မ(၉၉)လက်အောက်ခံ အမှတ်(၉၉၂) နည်းဗျူဟာအဖွဲ့ ယာယီနည်းဗျူဟာမှူး ဒုဗိုလ်မှူးကြီးကျော်ကျော်သက် ဦး​ဆောင်တဲ့ စစ်သား ၃၆၀​ကျော်ပါစစ်​ကြောင်းကို AA က မ​ကွေးတိုင်းအစပ်မှာစစ်​ကြောင်းပျက်​အောင်တိုက်ခိုက်ပြီး ဒုဗိုလ်မှူးကြီးကျော်ကျော်သက်အပါအဝင်စစ်သား ၂၀ ​လောက်ကိုစစ်သုံ့ပန်းအဖြစ် ​​ဖေ​ဖော်ဝါရီ လဆန်းမှာဖမ်းဆီးနိူင်ခဲ့ပါတယ်။

စစ်ကောင်စီတပ်က တပ်သား​တွေဟာ တိုက်ခိုက်လိုစိတ်နည်းပါးပြီး လေ့ကျင့်မှုအားနည်းသလို၊ စိတ်ဓာတ်အားနည်းမှု​တွေ ကြောင့် စစ်ရှုံး​နေတယ်လို့ AA ကဖမ်းဆီးထားတဲ့ ဒုဗိုလ်မှူးကြီးကျော်ကျော်သက်ကဝန်ခံပြောဆိုထားပါတယ်။