လေးမျက်နှာမြို့ခံလူငယ်တစ်ဦးအား စစ်ကောင်စီ၏ရဲများ ဖမ်းဆီးသတ်ဖြတ်

မိထက်/People’s Spring

ဧရာဝတီတိုင်း၊ လေးမျက်နှာမြို့တွင် လမ်းသွားလမ်းလာလူငယ်တစ်ဦးအား စစ်ကောင်စီ၏ ရဲတပ်ဖွဲ့က ဖမ်းဆီးသတ်ဖြတ်ပြီး မိသားစုအား ရုပ်အလောင်းလာထုတ်ခိုင်းသည့်ဖြစ်စဉ် ဖြစ်ပွားခဲ့သည်။

လေးမျက်နှာမြို့၊ အမှတ်(၁)ရပ်ကွက်မှ လူငယ်တစ်ဦးအား မတ်လ ၂ရက် ညပိုင်းတွင် မြို့တွင်းတံတားစစ်ဆေးရေးဂိတ်၌ ရဲတပ်ဖွဲ့က ဖမ်းဆီးပစ်ခတ်ခဲ့ခြင်းဟု ဒေသခံတစ်ဦးက ပြောသည်။

” နယ်ထိန်းဒုရဲအုပ်ကောင်းထက်လင်းက ဦးဆောင်ဖမ်းတာ။ ညဦးပိုင်း တံတားကိုဖြတ်တော့ ဆိုင်ကယ်ရပ်မပေးလို့ဆိုပြီးတော့ ပစ်ဖမ်းတာ။ပြီးတော့ ရဲစခန်းကို ခေါ်သွားတယ်။ သေသွားတော့ အလောင်းလာထုတ်ခိုင်းတယ်”ဟု မြို့ခံတစ်ဦးက ပြောသည်။

Public Service Announcement

လေးမျက်နှာမြို့သည် ဟင်္သာတခရိုင်အတွင်းပါဝင်ပြီး ရခိုင်ရိုးမနှင့်ဆက်စပ်နေသည်။ အနီးပတ်ဝန်းကျင်မြို့နယ်များဖြစ်သည့် ရေကြည်နှင့် ငါးသိုင်း‌ချောင်းမြို့၌ စစ်ရေးတင်မာနေစဉ် စစ်ကောင်စီက ရဲတပ်ဖွဲ့ဝင်များ၊ ပြည်သူ့စစ်များဖြင့် စစ်ဆေးမှုတင်းကြပ်နေသည်။ ယခုဖြစ်သည် အရပ်သားလူငယ်အား သေနတ်ဖြင့်ပစ်ခတ်သတ်ဖြတ်မှုအတွက် အရေးယူခြင်းမရှိဘဲ မြို့ခံများနှင့်မိသားစုဝင်များကို ခြိမ်းခြောက်နေသည်။

ပြီးခဲ့သည့် ဖေဖော်ဝါရီလကုန်ကလည်း ရေကြည်မြို့နယ်အတွင်း ဖမ်းဆီးခံရသည့် အရပ်သားသုံးဦးအနက် တစ်ဦးသည် ရဲစခန်း၌ ရိုက်နှက်စစ်ဆေးခံရပြီးသေဆုံးခဲ့သည်။ နောက်ထပ်တစ်ဦးကို ရခိုင်ရိုးမအတွင်းခေါ်ဆောင်သွားပြီး သေနတ်ဖြင့် ပစ်ခတ်သတ်ဖြတ်ခဲ့သည်။ ကျန်တစ်ဦးမှာလည်း ဆက်လက်ဖမ်းဆီးခံထားရဆဲ ဖြစ်သည်။

လက်ရှိတွင် ဧရာဝတီတိုင်းအတွင်း သာပေါင်း၊ ရေကြည်မြို့နယ်တို့နှင့် ရခိုင်ရိုးမ ဆက်စပ်ဒေသများတွင် အာရက္ခတပ်တော်(AA)ပူး‌ပေါင်းတပ်များနှင့် စစ်ကောင်စီ တိုက်ပွဲများဖြစ်ပွားနေသည်။