မန္တလေးတိုင်း မြင်းခြံမြို့နယ်အတွင်းက ကျေးရွာတွေမှာ ပြီးခဲ့တဲ့ရက်ပိုင်းက ဖြစ်ပွားခဲ့တဲ့ တိုက်ပွဲတွေကြောင့် အရပ်သားပြည်သူ ၁၀,၀၀၀ ဝန်းကျင် ထွက်ပြေးတိမ်းရှောင်နေရတယ်လို့ ဒေသခံတွေ ထံကနေ သိရပါတယ်။
ဖေဖော် ဝါရီ ၂၈ရက်ကနေ မတ်လ ၄ရက်အထိ ၅ ရက်တာအတွင်း မြင်းခြံမြို့ရဲ့အရှေ့မြောက်ဘက်ရှိ ကျေးရွာတွေအနီးမှာဖြစ်ပွားခဲ့တဲ့ တိုက်ပွဲတွေကြောင့် ကျေးရွာ ၇ ရွာက ပြည်သူတွေ တိမ်းရှောင်နေရတာပါ။
မတ်လ ၅ ရက်စပြီး တိုက်ပွဲတွေ ပြန်ငြိမ်သွားပေမယ့် လေကြောင်းတိုက်ခိုက်မှု တွေ ဆက်ရှိနေသေးတယ်လို့သိရပါတယ်။
Public Service Announcement
” လေကြောင်းကနေ ဆက်တိုက်ဗုံးချတာတွေလုပ်နေသေးတော့ ရွာတွေထဲမှာ မနေရဲ အကုန်ရှောင်နေရတယ်၊ ပြန်မကပ်ရဲကြဘူး”လို့ ဒေသတွင်းတော်လှန်ရေးတပ်ဖွဲ့ဝင် သတင်းရင်းမြစ်က ပြောပါတယ်။
တိုက်ပွဲငြိမ်သွားပေမယ့် နှစ်ဖက် စစ်ရေးအခြေနေ တင်းမာမှုရှိနေတယ်လို့အဲဒီတော်လှန်ရေးတပ်ဖွဲ့ဝင်က ဆက်လက်အသိပေးပါတယ်။
အရပ်သားတွေနေရပ်စွန့်ခွာ ထွက်ပြေးတိမ်းရှောင်နေရတဲ့ ရွာတွေကတော့ တူရွင်းဘို့၊ ဓူဝံ၊ ကျောက်ဖြူကန်၊ ဆိပ်ကုန်း၊ ကျီးပင်ကန်၊ ကျောက်ပြုတ်၊ ယုန်ထိုးစတဲ့ ကျေးရွာတွေဖြစ်ပါတယ်။
ဖေဖော်ဝါရီ ၂၈ ရက် က လုံခြုံရေး ကင်းစောင့်နေတဲ့ PDF တပ်ဖွဲ့ဝင် တစ်ဦးစစ်ကောင်စီတပ်ကင်းပုန်းနဲ့ တိုးပြီး ဖမ်းဆီး သတ်ဖြတ် ခံရာကနေ မြင်းခြံနယ်မှာထိတွေ့ တိုက်ပွဲ စဖြစ်တာလို့သိရပါတယ်။
တိုက်ပွဲဖြစ်ပြီး စစ်ကောင်စီတပ်က ပြန်ဆုတ်ရာမှာ မြင်းခြံမြို့ပေါ် နဲ့ဆိုရင် ၇ မိုင်ခန့်သာဝေးတဲ့ ဓူဝံရွာကို ဖေဖော်ဝါရီ ၂၈ ရက်မှာ မီးရှို့သွားသလို မတ် ၁ ရက်မှာ တူးရွင်းဘို့ရွာ ၊ မတ်လ ၂ ရက်မှာ ကျောက်ပြုတ်ရွာ တွေလည်းဆက်တိုက် မီးရှို့ခံခဲ့ရပါတယ်။
