မတ်-၂၈၊၂၀၂၅။ရဲခေါင်/People’s Spring
ရှမ်းပြည်တောင်ပိုင်း၊ အောင်ပန်းမြို့နယ်တွင် အင်အားပြင်းငလျင်ကြောင့် ဟိုတယ်အောင်ပန်းပြိုကျမှုအတွင်း ပိတ်မိနေသူများအား ရှာဖွေကယ်ဆယ်ရေးလုပ်ဆောင်နေကြောင်း ဒေသခံအချို့ကပြောသည်။
အောင်ပန်းမြို့နယ်၏ လမ်းမကြီးဘေးရှိ ခြောက်ထပ်အမြင့်ရှိ ဟိုတယ်အောင်ပန်းသည် အလုံးစုံပြိုကျခဲ့ခြင်းဖြစ်ပြီး ဝန်ထမ်းများနှင့် တည်းခိုသူ ၂၀ထက်မနည်းပိတ်မိနေကြောင်း ဒေသခံတို့၏ ပြောဆိုချက်အရ ကနဦး ယူဆထားရသည်။
“ငလျင်လှုပ်တာ။ငလျင် တအားကြမ်းတယ်။ဟိုတယ်အောင်ပန်း ပြိုသွားတာ။ဒီထဲမှာ လူတွေအများကြီး ပိတ်မိနေတယ်။ရသလောက်ကယ်ရမယ်”ဟု အောင်ပန်းမြို့လူမှုကူညီရေးအဖွဲ့ဝင်တစ်ဦးက ရုပ်သံဖိုင်မှတ်တမ်းရိုက်ကူး၍ ယနေ့(မတ်လ ၂၈ရက်) နေ့လည် ၂ နာရီခန့်တွင် လူမှုကွန်ယက်၌ ဖြန့်ဝေထားသည်။
Public Service Announcement
လက်ရှိတွင် မီးသတ်ဌာနမှ မော်တော်ယာဥ်သုံးစီးရောက်ရှိနေပြီး ကယ်ဆယ်ရေးလုပ်ငန်းများ စတင် ဆောင်ရွက်နေကြောင်း သိရသည်။
“ပြိုကျတဲ့အချိန် ဟိုတယ်ထဲကလူတွေ မထွက်နိုင်ဘူး ပြောတယ်။အခုတော့ မီးသတ်က လူတွေ စပြီး ရှာဖွနေကြပါပြီ”ဟု ပြိုကျသွားသည့် ဟိုတယ်အောင်ပန်းအနီးဝန်းကျင် ရောက်ရှိနေသူတစ်ဦးက ပြောသည်။
ငလျင်သည် ရစ်ချ်တာစကေး ၇ဒဿမ ၇အဆင့်ဖြင့် ယနေ့(မတ်လ ၂၈ရက်) နံနက် ၁၂နာရီ ၅၀မိနစ်တွင် ပထမအကြိမ်လှုပ်ခတ်ပြီး နောက်ဆက်တွဲငလျင်အချို့ဆက်လှုပ်ခဲ့သည်။
အင်အားအလွန်ပြင်းထန်သောငလျင်ဖြစ်၍ နောက်ဆက်တွဲငလျင်များ ထပ်လှုပ်နိုင်ကြောင်းပညာရှင်အချို့က သတိပေးသည်။
