'/%3E%3C/svg%3E){kind=small}
■နောက်ဆက်တွဲ ငလျင်အန္တရာယ်ကြောင့် ကြံ့ခိုင်မှုမကောင်းသည့် အဆောက်အအုံများ ၊ အက်ကွဲနေသောဆည်တမံများအနီး မနေထိုင်ရန် NUG သတိပေး
■စစ်ကောင်စီ၏ မိုးဇလက မြေငလျင်သတင်း မထုတ်ပြန်သေး
မတ်-၂၈၊၂၀၂၅။ရွှေပြည်စိုး/People’s Spring
ငလျင်ကြီးကြောင့် စစ်ကိုင်း၊ မန္တလေး၊ နေပြည်တော်၊ တောင်ကြီး၊ ပဲခူးတိုင်းတို့တွင် လူသေဆုံးမှုများနှင့် ထိခိုက်ပျက်ဆီးမှုများရှိနေပြီး နောက်ဆက်တွဲငလျင်များလှုပ်နိုင်၍ ကြံ့ခိုင်မှုမကောင်းသည့်အဆောက်အအုံများ၊ စိုးရိမ်စရာရှိသော ဆည်တမံများအနီး၌ မနေထိုင်ကြရန် အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)ကသတိပေးလိုက်သည်။
Public Service Announcement
“အလွန်အားပြင်းသည့် ငလျင်၏ နောက်ဆက်တွဲ ငလျင်ငယ်တွေလှုပ်ခတ်နိုင်တာကြောင့် ယိုင်နဲ့သွားတဲ့ အဆောက်အအုံတွေထဲမှာ ဆက်မနေကြဖို့၊ ငလျင်ကြောင့် ဆည်တာတမံတွေ အက်ကွဲမှုရှိမရှိ စစ်ဆေးပြီး လိိုအပ်ရင် ကြိုတင်ရွှေ့ပြောင်းကြဖို့နဲ့ အချို့ဒေသတွေမှာ ငလျင်ကြောင့် သဲအရည်ပျော်ခြင်းတွေဖြစ်ပေါ်နိုင်တဲ့အတွက်သတိပြုနေထိုင်ကြပါရန်ထပ်မံအသိပေးအပ်ပါတယ်” ဟု MOHADMကသတိပေးထားသည်။
မြေငလျင်ကြီးသည် မန္တလေးမြို့တဖက်ကမ်း စစ်ကိုင်းမြို့အနီးရှိ ရေမျက်အင်းကိုဗဟိုပြု၍ ရစ်ချ်တာစကေး ၇ုဒဿမ ၇အဆင့်ဖြင့်ယနေ့ နံနက် ၁၂နာရီ ၅၀မိနစ် ဝန်းကျင်၌ ပထမအကြိမ်လှုပ်ခဲ့သည်။ ၁၂ မိနစ်ခန့်အကြာတွင် ( မွန်းလွဲ၁နာရီ ၂မိနစ်) ၊တံတားဦးမြို့နယ် ၊ မန္တလေးလေဆိပ်အနီးဗဟိုပြု ၍ ပြင်းအား ရစ်ချ်တာစကေး ၆ ဒဿမ ၄ အဆင့်ရှိ အင်အားပြင်းငလျင်ထပ်မံလှုပ်ခတ်ခဲ့သည်။
မန္တလေးမြို့သည် ထိခိုက်ပျက်စီးမှုအများဆုံးဖြစ်နေပြီး အထပ်မြင့်အဆောက်အအုံပြိုကျပျက်စီးမှုမှုများရှိနေသည်။ လူသေဆုံးမှုအရေအတွက်များပြားကြောင်းကနဦးသိထားရပြီး အသေးစိတ်မသိရသေးပေ။
“ကျမရှေ့တင် တိုက်ပြိုကျပြီသေတာမနည်းဘူး။ ပထမတကြိမ်လှုပ်တော့ ဒဏ်ရာရသူတွေကို ဆွဲထုတ်နေချိန်မှာ ထပ်ပြိုတာ” ဟု ချမ်းအေးသာဇံမြို့ခံတစ်ဦးကပြောသည်။
မန္တလေးမြို့ ငလျင်ဘေးကို လူမှုရေးအဖွဲ့များက အရေးပေါ်ကယ်ဆယ်ရေးများလုပ်ဆောင်နေသော်လည်း လုံလောက်မှုမရှိကြောင်း မြို့ခံများကပြောသည်။
စစ်ကောင်စီထိန်းချုပ်ထားတဲ့ မိုးလေဝသနဲ့ ဇလဗေဒ ညွန်ကြားမှုဦးစီးဌာနက ငလျင်လှုပ်ပြီး ၂ နာရီကျော်သည့်တိုင် မတ် ၂၈ မွန်းလွဲ ၃ နာရီကျော်အထိ့ သတင်းထုတ်ပြန်ခြင်းမရှိသေးပေ ။
